कीर्तना 78

बगवंतल अनि वोनुर पर्जा

आसप्ना कीर्तन: इदेनगा इज्रयेल पर्जतुन बगवंतल बद तीर्दे ताकुस्तोर इंवल चरित्रा मंता.

1 ना लोकुर्निट! ना बोदतुन दिहंते केन्जट.

ना तोड्दल वाय्वलिक गोस्टिन केन्जट.

2 तोले वेह्‍तङ गियंतङ गोस्टिन बारेते मीकुन वेहंतोन.

नना मी सङा सिरिप नमुनङ येच्चिने मीकुन वेहंतोन.⁺

3 इव गोस्टिङ ममोट केन्चि करि कीतोम.

मा तोत्तुर अवेन माकुन वेह्‍तेर.

4 येहोवा देवन डगुर-पान सिय्वलिक कार्यन,

वोना ताकदुन, वोर कीतङ मय्मतङ कार्यन

मकुस्वक्ने अवेन मावुर मरि-मियडुन वेहंतोम.

अनि वाय्वल पिडितुरकुन अवेन पचर कींतोम.

5 बगवंतल याकोब्ना कांदांतुर सङा नियम इर्तोर.

इज्रयेल पर्जता केय्दे दर्मा-ग्रंत्ना कानुन सीतोर.

बारितेके वूर अव कानुन्क तीर पिसेर तम्वुर मरि-मियडुन

अवेन बारेते वेहना इन्जेर आगे सीतोर.

6 इदेन हिंदल वाय्वल पिडितगा पुट्वल मरि-मियड इद सम्दो करि कीसि,

मल्सि तम्वा मरि-मियडुन इव सम्दोन बारेते करुसना.

7 अद तीर्दे वीर सम्दिर बगवंतन पोरो बरोसा इरना.

अनि बगवंतनङ कार्यन मरुङ्वक्ने,

वोनङ आगेङ पिय्सि ताकना.

8 वीर तम्वुर तोत्तोर मोडि असले आय्वा.

तोत्तुर बगवंतन मर्ला बड्सि, वोन उल्टा आतेर.

वीर तम्वङ दिलकुन सुद्रन कीतुर वूर आयुर.

अनि बगवंतना गोस्टि तीर मन-दिलतगा बरोसते ताक्वलिर गिर आयुर.

9 येप्रायिम्ना कांदांतुर आय्तर्क पिय्सि वातेर.

बति लडेय किय्वल वकत्ने पेजे मल्सि सोडितेर.

10 बगवंतना नियम तीर वूर पिस्मकि.

वोना दर्मा-ग्रंत्ना कानुन तीर ताक्ले वूर पसंद किय्मकि.

11 वोर तंवङ कामकुन अनि मय्मतङ कार्यन वूरकुन तोह्‍तोर.

बति वूर अवेन मरुङ्तेर.

12 वूरुर तोत्तुर सूड्सेर मनेकेने,

ईजिप्ट देस्ना सोयन इंवल येरियतगा

वोर बगवंतल मय्मतङ कार्यङ कीतोर.⁺

13 वोर सम्दुरतुन रंड ईसन मोडि पाकि कीसि,

अद येतुन गोडन दात निपुस्तोर.

अनि तान रोपोडा वत्ता बोमितल वूरकुन ताकुस्तोर.⁺

14 दिवोस्नगा टेपते अनि रात पूरो गिर

तड्मिता वेड्चिते वूरकुन सरि ताकुस्तोर.⁺

15 वोर बोडि गुटनगा बंडन चीरि पेयुस्तोर.

अनि मुक्तरि येर वूरकुन बर्पुर उंले सीतोर.

16 बंडतल वोर येतङ ऊसङ वायुस्तोर.

लविडा येतुन मोडि वोर पोङुस्तोर.⁺

17 तेर बति, वूर वोन उल्टा पाप्क कीसेर वातेर.

सर्वा सक्ति वाले बगवंतन अव बोडि गुटनगा मर्ला बड्तेर.

18 “माकुन चोकोट्ना काने पह्‍जे” इन्जेर कह्‍वेरे मासेर वोन तल्क्तेर.

इहिन वूर तम्वा दिलतगा बगवंतन परिक्सा कीतेर.⁺

19 “इव बोडि गुटनगा बगवंतल माकुन काने सिया परनुर कि?

20 वोर बंडतुन पाता पेजे, तान्गटल येर बुड्कि पासेर वाता.

ते वोर माकुन काने सिया परनुर कि?

वोर तंवा पर्जतुन सविङ सिया परनुर कि?”

इन्जेर वूर बगवंतन उल्टा वड्क्तेर.

21 येहोवा देवल इव गोस्टिङ केन्चि सोङुन वातोर.

याकोब्ना कांदांतुन डुंडुसिय्ले तड्मि रमा रमा कीतोर.

इज्रयेल पर्जत पोरो वोना सोङ पूटे माता.

22 बारितेके, वूर बगवंतनगा बरोसा इर्मकि

अनि वोर बचि कींतोर इन्जेर गिर नंमकि.

23 तेर बति वोर, पोरो मंवलिक आगसकुन आगे सीतोर.

अव आगस्क्नङ पाटक कोलि कीसि,

24 वूर तिंले मंना इंवल कानेतुन अरुस्तोर.

आगस्ना कानेतुन वूरकुन सीतोर.⁺

25 बगवंतनुर दूतलिरा काने माय्नलिर तित्तेर.

बगवंतल अद कानेतुन वूर साटि बर्पुर रोह्‍तोर.

26 आगस्नगा सिडयिङ बाजनल वडि वायुस्तोर.

तंवा बलमुन हिंदल काल्वडा बाजनल वडि वायुस्तोर.

27 डुर्डत मोडि वूरकुन पह्‍जे मत्तङ अच्चोङ सविङ अरुस्तोर.

सम्दुर्ता उस्केत मोडि कहा परुर अच्चोङ पिटेन, वूर्गा वायुस्तोर.

28 इव पिटेन वूर मंवल टिकनत नड्डुम,

अनि वूरङ डेरन सिर्मुट रेयनल कीतोर.

29 वूर निसा निसा आनल तित्तेर.

बारितेके वूर कोर्ततुन वोर बगवंतल सीतोर.

30 तेर बति वूरा आसा पूरे माय्वक मोदोले,

अव सविङ उंडे गिर वूरा तोड्दगा मनेकेने,

31 बगवंतना सोङ वूर पोरो रेय्ता.

वूर्गटल कहितुर ताकद वालिरकुन जक्तोर.

इतेके वूर इज्रयेल पर्जतुर डियुरा जीवा येत्तोर.

32 इहिन जर्ग्ता तेर बति, वूर उंडे गिर पाप्क कीसेरेन मत्तेर.

वोर कीतङ अव मय्मतङ कार्यन सूड्सि गिर वोन नंमकि.

33 अदेन साटि, हूकुर दिस्वक आतपिनय वूरङ दिवोस्क वीड्सि सोनल कीतोर.

वूर पिस्वलिक साल्क डगुक आपतिङ वायुसि वीडुस्तोर.

34 वूर्गटल कहितुरकुन बस्केते जक्ंदुरो,

अस्के मेय्तुर वोना बाज तिरिंदिर.

अनि तम्वा बर्पुर मंदे वोर बगवंतन विनंति कींदिर.

35 बगवंतल तमकुन काबाड्वल आंदुर इन्जेर करि कीतेर.

अनि सम्दोत पोरो अदिकार वाले बगवंतल तमकुन मह्‍क्सि,

बचि किय्वल आंदुर इन्जेर वूर हेतु कीतेर.

36-37 तेर बति, वूरा दिल उंदि तीर वोन पोरो निल्सि मन्मकि.

अनि वोना नियमुन वूर बरोसते पिय्सि ताक्मकि.⁺

वूर सिरिप पोरो पोरो तम्वङ गोस्टिने वोन डगुर-पान सीतेर.

अनि तम्वङ वेन्जेक्ने, लबड वेह्‍तेर.

38 तेर बति वोर किवुल वाले आता काड्कि,

वूरा गल्तितुन पिय्सि मूरि किय्वक्ने,

वूरङ पापकुन मापि किय्वल आंदुर.

तंवा सोङुन तोह्‍वक्ने,

वेले जोकङ अदेन आपुस्वल आंदुर.

39 बारितेके वडि दिस्वक बहंते दांतयो,

अह्‍ने वूर सातेके दिस्वक सोंवलिर आंदिर इन्जेर बगवंतल हेतु कीतोर.

40 बोडि गुटनगा वोन पोरो वूर बचोङेय जोकङ मर्ला बड्तेर.

अनि अव बोडि गुटनगा वोन बचोङेय जोकङ वूर दुक्सा लागुस्तेर.

41 गडि गडि वोर बगवंतन परिक्सा कीसेर वोना हवड सूड्तेर.

गडि गडि इज्रयेल पर्जतोर पवित्रा बगवंतन नारज कीतेर.

42 वोना बुजा बलमुने आयि सेलेके,

पगा-दार्क्ना केय्दल तमकुन वोर मोक्डो सुटि कियुस्ता दिवोसुने आयि,

वूर असले हेतु किय्मकि.

43 ईजिप्ट्नगा मय्मतङ कार्यङ कीसि तोह्‍तोर.

अनि सोयन येरियतगा चमत्कार्क कीसि तोह्‍तोर.

तेर बति वूर अव सम्दोन हेतु किय्मकि.

44 लव्डिना पोङ्वल येतुन नेतुडुन मोडि मार्युसीतोर.

ईजिप्ट्नुर अवेना येर उंडा पर्मकि.⁺

45 वोर वूर पोरो कस्क्वलिक वीसिना जूंडुन रोह्‍तोर.

अव वूरकुन कोडिसि नुक्सन कीतङ.

वूर्गा पेंनेन रोह्‍तोर.

अव वूरा जागतुन करब कीतङ.⁺

46 वोर वूरा पंटतुन पुडकुन दन कीतोर.

वूर मेह्‍नत कीता पंडितुन जाडि-कोडन दन कीतोर.⁺

47 गार-बंडन हिंदल वूरङ आङुर वेलिन करब कीतोर.

अनि बर्पितुन हिंदल वूरङ तोया मरकुन नासेडम कीतोर.⁺

48 वूरङ पियङ-कालकुन गार-बंडन दन कीतोर.

वूरङ हेरेङ-गोरेना मंदन तीज-बीजकुन दन कीतोर.

49 वोर तंवा तड्मित दात पोत्वल सोङुन, वूर पोरो तोह्‍तोर.

गंडम्क वायुस्वलिक बगवंतनुर दूतलिरा गुब्डतुन रोह्‍तोर.

50 तंवा सोङुन तोह्‍ले उंदि सरि पुटुस्तोर.

मरंतल वूरा जीवतुन तपु सिय्मकि.

बति वूरा जीवतुन नुक्सन किय्वल बेमरितुन रोह्‍तोर.

51 ईजिप्ट पर्जतुर सम्दिर मडनुर मरकुन जक्तोर.

हामुना कांदांतुर सम्दिर मडनुर मर्क्ना परन येत्तोर.⁺

52 बति तंवा पर्जतुन वोर गोरेन मोडि तंवा सङा वोतोर.

गोरेना मंदतुन गाय्कि बहंते ताकुसंतोरो,

अह्‍ने बोडि गुटनगा वोर वूरकुन ताकुस्तोर.⁺

53 वूर पर्जा वेरिवक्ने, वूरकुन बतय आय्वक्ने चोकोटे ताकुस्तोर.

बति वूरुर पगा-दारकुन सम्दुरतगा मुडुस्तोर.⁺

54 अनि तंवा पर्जतुन, तना नेमि कीसि पवित्रा कीता देस्नङ सिवनगा ताकुस्तोर.

अनि तंवा तिना केय्दे लडेय कीसि मेय्ता अद पवित्रा गुटतगा वूरकुन ताकुस्तोर.⁺

55 अद देसनल दुस्रोक जातिनुरकुन पूडि सीतोर.

वूरा जाय्जतुन ईसङ कीसि इज्रयेल पर्जतुन तूसि सीतोर.

अदेन साटि वूर इज्रयेल लोकुर दुस्रुर लोकुरङ रोह्‍क्नगा पिस्तेर.⁺

56 तेर बति वूर सम्दोत पोरो अदिकार वाले बगवंतन परिक्सा कीसि वोन मर्ला बड्तेर.

अनि वोनङ कानुन्क पिय्सि ताक्मकि.⁺

57 वूर तम्वुर तोत्तुर मोडिन, बगवंतनल पेजे पासि कसुर कीतुर आतेर.

पसि किय्वलिक बानकुन मोडितुर आसि बह्‍के मातेर.

58 अनि वूर पूजङ किय्ले डङलिक जागङ दोह्‍चि, वोन सोङ वायुस्तेर.

अवेनगा मूर्तिङ इर्सिकुन, कुटा कुटा आसि सोङुन वानल वोन कीतेर.

59 बगवंतल इद सम्दो सूड्सि वूर पोरो काकत वातोर.

अनि वूर इज्रयेल पर्जतुन तंवा मंदल तेंड्सि वाड्तोर.

60 अस्के वोर सिलोहुतगा मंवल तंवा जागतुन सुटि कीतोर.

इतेके माय्नलिर नड्डुम मंवल तंवा पार्तना-विंति किय्वल डेरतल सोडितोर.⁺

61 वोर तंवा बलम आय्वल पर्जतुन, दासि-पांदे इर्ले दुस्रुरा केय्दे हव्लि कीतोर.

इतेके तंवा मय्मतुन तोह्‍वल निसनितुन पगा-दार्क्ना केय्दे हव्लि कीतोर.⁺

62 तंवा पर्जतुन तल्वर्क्ना दन कीतोर.

अनि वोर तंवा जाय्जत आय्वल पर्जत पोरो सोङ तोह्‍तोर.

63 इज्रयेल पर्जतुर डियुरकुन तड्मि डुंडुसि वाट्ता.^*

ते वूरङ डिया पेकिन मर्मि पाटङ सेल्वक आतङ.

64 वूरुर कटोडलिर तल्वर्क्ना पाल आतेर.

बति रांडे वेय्लोकुन वूर साटि आड्ले मोका सिय्मकि.

65 अस्के, जोपनल तेद्वल वोरोन दात,

कल उटा निसते हंकत किय्वल सिपायिन दात पर्बु तेत्तोर.

66 वोर तंवुर पगा-दारकुन पेजे मलुसि पूडि सीतोर.

बस्केन तला तह्‍वक वूरा हिजत तेंड्तोर.

67 अद आता पेजे योसेप्ना कांदातुरकुन वोर वोप्मकि.

अनि येप्रायिम्ना कांदांतुरकुन आच्मकि.

68 बति वोर यूदना कांदांतुरकुन आच्तोर.

अनि तना पेर्मते सूड्वल सियोन गुटतुन कोर्तोर.

69 आगस्नगा तंवा रोतुन दोह्‍तपिनय, तंवा पवित्रा मंदिर दोह्‍तोर.

बोमितुन निव्डि कीतपिनय, बस्केट मंले तान दोह्‍तोर.

70 तंवोर सेव्कल आय्वल दाविदुन आच्चि,

वोन गोरेना मंदता डोड्डितल केय्सि नेमि कीतोर.⁺

71 गोरेङ मेह्‍वडल वोन बंद कीसि,

तंवा पर्जा आय्वल याकोब्ना संतांदुन

अनि तंवा सोंता ईसा आय्वलिर

इज्रयेल पर्जतुन पोरो गाय्किन दात वोन नेमि कीतोर.

72 वोर बर्पुर दिल्दे वूरकुन ताकुस्तोर.

वोर वूरकुन वेले बुदि-गियंते ताकुस्तोर.