कीर्तना 74

देस्नुर बचे मायना इन्जेर कीता पार्तना

आसप्ना कीर्तन

1 बगवंता, निमे माकुन बस्केट सुटि कीसिन मंदंति कि?

निमे मेह्‍वलिक गोरेना मंदा आय्वलिर मा पोरो नीवा सोङ बारि तोह्‍चेर मंति?

2 निमे नेमि कीति वूर पर्जता कांदांतुन हेतु कीम.

वूर नीवा जाय्जतुन मोडि मंदना इन्जेर काबाड्ति.

निमे मंवल इद सियोन गुटतुन हेतु कीम.

3 दुस्मन-दारलिर, पवित्रा जागतगा मंवल सम्दोतुन करब कीतेर.

अद करब आसि मंवल जागतगा ताक्सि सूडा.

4 निमे माकुन बेटे माय्वल जागतगा नी पगा-दार्क हंकत कीसेर मंतेर.

लडेयतगा तमोय मेय्तोम इन्जेर तम्वङ जेंडङ पोरो तह्‍तेर.

5 वूर तम्वङ मर्स्क तह्‍चि केडतङ मरकुन नट्क्तपिनय

अद गट्ना दिसेर मंता.

6-7 इंकेने वूर दुस्मन-दार्क मर्स्क अनि सुत्तेङ पिय्सि,

नीवा पवित्रा जागतगा मंवलिक सोबतङ सम्दो वसतुन वोह्‍चि वाट्तेर.

नीवा पवित्रा जागतुन डुंडुसि वाट्तेर.

नीवा पोरोल मंवल जागतुन उल्टि कीसि बे-सुदुड कीतेर.

8 बगवंतना पार्तना-विंति किय्ले मीरे माय्वलिक जागन

उल्टि कीसि नासेडम कीकट इन्जेर निर्नय कीतेर.

अनि देस्नगा मंवलिक अव सम्दो जागन डुंडुसि वाट्तेर.

9 चमत्कार्दङ निसनिङ बवे माकुन दिस्वक आतङ.

अनि बोरे पर्वक्तलिर गिर सेल्वक आतेर.

इहिन उंडे बचेजेल जर्गंतयो मह्‍गटल बोने टावा सेले.

10 बगवंता, दुस्मन-दार्क उंडे बचेजेल माकुन चेडि कींतेर?

वूर पगा-दार्क नी पोरोडा हिजत बस्केट वोंतेर कि?

11 मदत किय्वल नीवा तिना केयदुन बारि मुड्डुस्ति?

अद नीवा केय चह्‍चि वूरकुन मूरि कीसि वाटा.

12 तोलेता कालम्नले, बगवंतल ना राजल आसि मंतोर.

दर्तुरितुरकुन बचि किय्वल कार्या जर्गुस्वल वोरे आंदुर.

13 नीवा बलमुन पिय्सि सम्दुरतुन पाकि कीति.

अद येतगा मंवलिक पेर्सङ जिव्रस्नङ तलन वोह्‍ति.⁺

14 मगुडा तलतुन^* निमे वोह्‍चि टुक्डेङ कीति.

अनि ताना मेंदोडुन बोडि गुटनगा मंवलिर^* तिंदन साटि सीति.⁺

15 निमे येतङ जलन अनि लव्डिन पुटुस्ति.

अनि बस्केट पोङ्वलिक लव्डिन निमे आटि कीति.

16 रात-दिहा रंडुते नीवङे आंदुङ.

पोड्द अनि नेलेन्जुन निमेय गडि कीति.

17 दर्तुरितुन सिवङ नेमि कीतोनि निमेय आंदि.

येदि अनि पीनि गालुमकुन निव्डि कीतोनि निमेय आंदि.

18 येहोवा देवा, पगा-दार्क नी पोरो बदि दोस्वडुन

अनि अकल सेलुर वूर नीवा पोरोडुन रेह्‍चि वड्क्वडुन हेतु कीम.

19 केडता जिव्रसुन दात मंवलिरा केय्दे पारेवत दात मंवलिर नी पर्जतुन हव्लि किय्मा.

तक्लिब्क्नगा अर्सि मंवलिर नी पर्जतुन बस्केट्के मरुङ्मा.

20 दुनियतगा सिकटि मंवलिक जागङ

दुस्रुरकुन दाबि किय्वलिरा केय्दे आगुटे मासि मंतङ.

अदेन साटि निमे वाग्दन सीति अद नियमुन बारेते हेतु कीम.

21 दाबे मासि मंवलिर सिर्मिंदिङ आसि पेजे मल्सि सोंदा सिय्मा.

तक्लिब्क बोगे माय्वलिर अनि गरिब्क नी पोरोडुन डगुर-पान सियिर.

22 बगवंता तेच्चि नी मांदुन पिय्सि लडेय कीम.

अकल सेलुर वूर दिवोस पूरो नीकुन रेह्‍चि वाट्वल गोस्टितुन हेतु कीम.

23 नीकुन उल्टा तेद्वलिरा लोलि उंडे अदिक बडे मासेर मंता.

वीर नी पगा-दार्क किय्वल लोलितुन मरुङ्मा.