#मदतुन साटि आड्सेर वार्ता कीर्तन
पाटा वारुस्वन साटि: दाविद्ना कीर्तन
69
1 बगवंता, नाकुन बचि कीम! ना गोटि वेरि येर पोङ्सेर मंता.
2 निलन साटि बतय आसरा सेले.
अद डेह्डता कोल डोड्डोतगा मिन्ज्चेर मंतोन.
ऊसतङ हेल्वङ उंडे इचुर अदिक नाकुन मुडुसेर मंतङ.
अद कोल येतगा रोपो कोंडे मासि मंतोन.
3 मदतुन साटि, केय्सि केय्सि नावा गुड्न्गा वच्चि सोत्ता.
ना बगवंतन साटि सूड्सि सूड्सि ना कड्क डोपोङ सोत्तङ.
4 बतय गल्ति सेल्वेके गिर ना पोरो पगा पिय्वलिर
नावा तलदङ केलकुन तेर अदिक मंतेर.+
लबडुन पिय्सि नाकुन बय्मन आसि,
जक्ले सूड्वलिर बेय वेलेटिर मंतेर.
नना बततुंते लूटि किय्मकियो अदेन बर्पेय किय्वल आसेर मंता.
5 बगवंता, नना पिसन मोडि ताक्ता नीकुन टावये.
नावङ पाप्क निह्गटल मक्सि मंदा परोङ.
6 पर्बु! स्वर्ग्नङ दलम्क्नोर अदिकारि आय्वल येहोवा देवा!
नी साटि सूड्सेर मंवलिरकुन ना हिंदल लजन वाटेङ किय्मा.
इज्रयेल पर्जतोर बगवंता!
नीकुन मह्क्वलिरकुन ना हिंदल हिजत सोंवक्ने सूडा.
7 नी हिंदल नना गल्ति कीतोना लेकते वातोन.
नी हिंदले नावा लजा सोन्जि मोकोम तोह्वक आतोन.
8 ना लाग्तुरकुन नना लङ्नोना आसि सोत्तोन.
ना अवना पीटे पुड्तुरकुन नना पर्देसिन मोडि आतोन.
9 नीवा रोतुन बारेते ना रोपो मंवल बेय डगुर आसा
नाकुन मेय्सि तिन्जेर मंता.
नी पोरो वाड्तङ अव बदिङ ना पोरो अर्सि मंतङ.+
10 नना उपस मन्जि बेय आड्सेर मत्तेके,
अदेन बारेते गिर नाकुन चेडि कीसेर मंतेर.
11 नावा दुक्सतुन तोहन साटि नना पोते गूंडि कीतोन.
इदेन बारेते गिर वूर नाकुन चेडि कींतेर.
12 बह्रि पाटक्नगा उच्चि मंवलिर, ना बारेते चह्डिङ वड्कंतेर.
कल-पिदेडलिर, ना बारेते पाटङ वारंतेर.
13 बति येहोवा देवा, ननते नीकुन पार्तना कीसेर मंतोन.
नीकुन पुर्सद मनेके नाकुन जवब सीम.
बगवंता नीवा मारियो अद पेर्मतुन पिय्सि
अनि नीवा बचि किय्वल सतेमुन पिय्सि नाकुन जवब सीम.
14 नना गाडे मासि मिन्ज्वक्ने डेह्डता कोल डोडोतल नाकुन तपुसा.
ना पोरो पगा पिय्तुर वूरा केय्दल अनि अद कोल येतल नाकुन तपुसा.
15 येतङ ऊसन ना पोरोडल पोङसिय्मा.
कोल सम्दुर नाकुन मिङनल सूड्मा.
वीच्ना डोडोता तोड्दगा नाकुन अरा सिय्मा.
16 येहोवा देवा, नीवा मारियो अद पेर्मा वेले चोकोट्ना आंदु.
तान पिय्सि नाकुन जवब सीम.
नीवा किवुल अनि दयतुन पिय्सि ना बाजुन तिरिया.
17 नी सेव्कल आय्वल नाकुन पेरे-गेह्मा.
नना आपतितगा कोंडे मासि मंतोन.
नाकुन वेय्ने जवब सीम.
18 ना करुम वासि नाकुन बचि कीम.
ना दुस्मन-दार्कनल नाकुन तपुसीम.
19 ना पोरो बदि दोस्तेर, लजा वोतेर अनि सिर्मिंदिङ कीतेर इंवल गोस्टि नीकुन वोड्किय मंता.
ना दुस्मन-दार्क सम्दिर नीकुन दिसेरेन मंतेर.
20 ना पोरो बदि दोस्वडुन हिंदल, नावा दिल टूटे माता.
नावा जीवा पूरो कुसुम्ने आता.
ना पोरो दया तोह्वलिर साटि सूड्तोन बति, बोरे सेल्वक आतेर.
सुम्जि किय्वलिर साटि सूड्तोन बति, बोरे दिस्वक आतेर.
21 इदेन बद्लि वूर नाकुन केय्मुल विकुन तिंदन साटि सीतेर.
नना येर वट्क्तेके पुलिता आङुर्क्ना रसा उंडन साटि सीतेर.+
22 वूर आनंद्ने जेवुन्क कीनेके डाप्कनगा उरिर.
अनि सम्दो मुक्तरि मंता इंवल गट्कते वूर जार्क्नगा बेय सप्ने उरिर.
23 वूर गुड्डिर दात आयिर.
हर गट्का वूर काया-कस्टम्ने वरिसि मनिर.+
24 वूर पोरो नी सोङुन तोहा.
नी सोङ्ना तड्मि वूर पोरो मुच्लि अरि.
25 वूरा मंवल टिकना पाडसि सोंनि.
वूरङ डेरनगा बोरे मंवक सतेनास आयिर.+
26 निमे पासि अरुस्ति वोन वूर पीचा पिय्सि पूड्सेर मंतेर.
निमे गायल कीतोना दुक्सतुन बारेते वूर चह्डिङ वेह्चेर मंतेर.
27 कसुड पोरो कसुर अर्सि वूरकुन सिक्सा वायि.
नीवा नियत वूरकुन अंद्वक्ने कीम.
28 जीवते मंवलिरङ पोरोल्क मंवल ग्रंतनल वूरङ पोरोलकुन मोडि कीम.
नियत्नुरङ पोरोल्क मंवल दप्तरतगा वूरङ पोरोल्क लिहि किय्मा.+
29 बति नना विचार्दे, दुक्सा बोगे मासेर मंतोन.
बगवंता! नीवा बचि किय्वल कार्या नाकुन पोरो तहि.
30 कीर्तन्क वार्सेर नना बगवंतना पोरोडुन डगुर-पान सींतोन.
दनेवाद वेह्चेर वोन डगुर-पान सींतोन.
31 इहिन सिय्वडुन कोंदता अर्पनतुन तेर,
कोह्क अनि डेकङ मंवल कुरता अर्पनतुन तेर बगवंतल वेले कुसि आंतोर.
32 इदेन सूड्सि दुक्सते बोगे माय्वलिर बक्तलिर आनंद येतंतेर.
बगवंतन मह्क्वलिर्निट! मीवा परन बेय कुसि-आनंद येति.
33 येहोवा बगवंतल दिक सेलुर वूरा विनंतितुन केन्ज्वल आंदुर.
जेल्दगा कोंडे मासि मंवलिर तंवुरकुन कमि-पांदे सूड्वल आयोर.
34 आगस-दर्तुरि वोन डगुर-पान सियिङ.
सम्दुर्क अनि अवेनगा मंवलिक सम्दो गिर वोन डगुर-पान सियिङ.
35 बगवंतल सियोंतगा* मंवल पर्जतुन बचि कींतोर.
वोर यूदतगा मंवलिक नगुकुन मल्सि दोहंतोर.
अगा बगवंतनुर पर्जा पिसंतेर.
अद वूरा सोंतम आंता.
36 बगवंतनुर सेव्कलिरा संतान तान आगुटि कींतेर.
वोना पोरोडुन बाव-बक्तिता पेर्मते सूड्वलिर अदेनगा पिसंतेर.