कीर्तना 57

मदतुन साटि किय्वल पार्तना

सव्लुनल दाविद परर आसि बुयरितगा सोत्तोर अस्के इद कीर्तन लिहि कीतोर.⁺

1 ना पोरो दया तोहा बगवंता, ना पोरो दया तोहा.

नावा जीवतुन काबाड्ले नीवा कोरते वासि मंतोन.

इव आपतिङ वीड्सि सोनल वेरि, नीवङ मारेल्क्ना दड्मिते मंदंतोन.

2 सम्दोत पोरो अदिकार वाले बगवंतन

अनि वोर बगवंतना उदेसुन नावा जिन्गनितगा पूरे मानल कींतोर.

3 वोर स्वर्गनल आगे सीसि, नाकुन बचि कींतोर.

दुस्रुर नाकुन मिङना इन्जेर दुक्सा सीसेर मनेके,

बगवंतल तंवा मारियो अद पेर्मतुन अनि बरोसतुन ना पोरो तोहंतोर.

रेला.

4 ना परन चिहोन नड्डुम कोंडे मासि मंता.

नना सोङेटलिर नड्डुम मींड्वल आसेर मंता.

वूरङ पल्क गोर्कङ अनि बानकुन मोडि मंतङ.

वूरङ वेन्जेक दार मंवलिक तल्वरकुन मोडि मंतङ.

5 बगवंता, पोरो हाबडगा गिर निमे डगुर-पान वालेना आंदुन इन्जेर तोहा.

बगवंता, नीवा मय्मा पूरो दर्तुरित पोरो तोहा.

6 नावङ काल्क उरना इन्जेर वूर पासङ दोस्तेर.

नावा परन नारज आसि मंता.

नाकुन अरुस्ले वूर डोडो ताड्तेर बति वूरे तान्गा अर्तेर.

रेला.

7 ये बगवंता, नी पोरो बरोसा इर्सि, नावा दिल गटि-दीर्यते मंता.

अदेन साटि नना नीकुन कीर्तन वार्सेर डगुर-पान सींतोन.

8 ये ना परंति तेदा! कर्नाट अनि चोंड्कत्निट तयर आम्ट!

नना सक्रेन तेच्चि कीर्तन वारंतोन.

9-10 नीवा मारियो अद पेर्मा आगसनल गिर डगुर मंता.

नीवा सतेम हाबडङ टेपङ वेरि लागंता.

अदेन लासि पर्बु! दुस्रोक जातिनुर नड्डुम नीकुन दनेवाद वेह्‍चेर डगुर-पान सींतोन.

अनि पर्जत नड्डुम नीकुन कीर्ति वानल कींतोन.

11 बगवंता, पोरो हाबडगा गिर निमे डगुर-पान वालेना आंदुन इन्जेर तोहा.

बगवंता, नीवा मय्मा पूरो दर्तुरित पोरो तोहा.⁺