बगवंतना लेङ पिड्गुन दात मंदंता
दाविद्ना कीर्तन.
29
1 ये, बगवंतनेर मर्क्निट! येहोवा देवन डगुर-पान सीम्ट. वोना मय्मतुन अनि बलमुन डगुर-पान सीम्ट.+
2 येहोवा देवना पोरोल वेले डगुर आता काड्कि,
वोना पोरोडुन हेतु कीसि मानि कीम्ट.
सुदुड इंवल सोबतुन पोंड्सि, येहोवा देवना पार्तना-विंति कीम्ट.
3 येहोवा देवना लेङ जलदुन पोरो केन्जा वासेर मंता.
वोर मय्मवालेना लेङ पिड्गुन दात आवज सींता.+
डगुक सम्दुरकुन पोरो येहोवा देवल ताक्सेर मंतोर.
4 येहोवा देवना लेङ बलम वाले आंदु.
वोना लेङ मय्मा वाले आंदु.
5 येहोवा देवना लेङ गट मंवलिक देवदार मरकुन उरुसंता.
वोर लेबनोंतङ* अव मरकुन टुक्डेङ कींतोर.
6 लेबनोंतङ गुटन पड्डन मोडि डेह्कनल कींतोर.
अनि हेर्मोन* गुटन कुरन मोडि डेह्कनल कींतोर.
7 येहोवा देवना लेङ हाबडगा मिड्च्वडुन पाकि कींता.
8 येहोवा देवना लेङ बोडि गुटन हालि कींता.
येहोवा देवल कादेस्नङ बोडि गुटन हालि कींतोर.
9 येहोवा देवना लेङ कुर्सुन वहनल कींता.*
अनि केडतङ मरक्नङ आकिन कुसनल कींता.
वोना पवित्रा जागतगा मंवलिक सम्दो, वोने मय्मा वायना इंतङ.
10 येहोवा देवल जल गंडम्ना येतुन पोरो उच्चि मंतोर.
वोर बस्केट महा राजल आसि उच्चि मंदंतोर.
11 येहोवा देवल तंवा पर्जतुन ताकद सींतोर.
येहोवा देवल तंवुरकुन सांति अनि आसिर्वाद सींतोर.