कीर्तना 9

नायम कीम इन्जेर बगवंतन कोर्वल

पाटा वारुस्वन साटि सूचनङ: दाविद्ना कीर्तन.

1 ये येहोवा देवा! नावा बर्पुर दिल्दे, नीकुन डगुर-पान सींतोन.

नीवङ मय्मतङ सम्दो कार्यन बारेते नना पोडि कीसि वेहंतोन.

2 नी बारेते नना वेले कुसिते आनंद येच्चेर मंतोन.

ये सर्वसक्ति वाले बगवंता! नीवा पोरोडुन डगुर-पान सींतोन.

3-4 निमे ना हिंदल आसि नाकुन नायम कीति.

निमे कचुरितगा उच्चि, नायमुन पिय्सि तस्वा कीति.

अदेन साटि, ना दुस्मन-दार्क पेजे मल्तेर.

नी मुने नित्वक्ने वूर नासेडम आतेर.

5 निमे दुस्रोक जातिनुरकुन डटि कीति.

करेबलिरकुन नासेडम कीति.

वूरा पोरोल बस्केट मंवक्ने तेंड्सि वाड्ति.

6 पगा-दार्क पूरो नासेडम आतेर.

वूरङ नगुकुन निमे चिल्के लोपि कीति.

अवेन हेतु कीनल बतय मेय्सि सेले.

7 बति येहोवा देवल बस्केट राजल आसि मंतोर.

नाय्दा तस्वा किय्ले वोर तंवा कचुरि परुसंतोर.

8 येहोवा देवल नियतुन अनि सतेमुन पिय्सि,

पर्जतुन अनि राजकुन उंदि तीर तस्वा किय्वल मंतोर.

9 वोरे दुक्सा बोगे माय्वलिरकुन काबाड्वल आंदुर.

अनि वोरे संकट्ने मंवलिरा जीवा ताव्वल आंदुर.

10 येहोवा देवा, नी चर्नते वाय्वलिरकुन सुटि किय्वनि आय्वि.

अदेन साटि नी पोरोल करि कीतुर वूर, निह्‍गा बरोसा इरंतेर.

11 सियोंतगा मंवल येहोवा देवन डगुर-पान सीम्ट.

वोनङ कार्यन सम्दो जातिनुर नड्डुम पचर कीम्ट.

12 बारितेके दुक्सा बोगे मातुर वूर बक्तलिरा नेतुडा बद्लि येत्नेके,

वूरकुन हेतु कीसि, वूरा पार्तनतुन मर्न्गोर.

13-14 येहोवा देवा, सियोंतुर सम्दिर पर्जतुन मुने,

नीकुन डगुर-पान सिय्ले,

अनि निमे नाकुन काबाड्ततुन हिंदल कुसिते मंले,

ना पोरो दया तोहा.

ना पगा-दार्क नाकुन सीता दुक्सतुन सूडा.

अनि मरंतङ पाटकनल नाकुन तपुसा!

15 सम्दो जातिनुर तमा ताड्तङ डोडोनगा तमय मिन्ज्तेर.

तमा मांडि कीतङ जार्क्नगा, तम्वङे काल्क गूते मातङ.

16 येहोवा देवल पावे मासि, नाय्दे तस्वा कीतोर.

करेबलिर तमा कीतङ अवेनगा कोंडे मातेर.

हिगयोन. रेला.^*

17 करेबलिर अनि बगवंतन मरुङ्वलिर सम्दो जातिनुर,

साना लोकम्नगा अरंतेर.

18 बति गरिबकुन बगवंतल बस्केन मर्न्गोर.

दुक्सा बोगे माय्वलिरा आसा बस्केन नासेडम आयो.

19-20 येहोवा देवा तेदा! माय्नलिरकुन मेया सिय्मा!

नी मुने सम्दो जातिनुरा तस्वा जर्गंता.

येहोवा देवा, वूरकुन वेरे पुटुसा.

तमा सिरिप सादरन माय्नलिरे इन्जेर करि कीनल कीम.

रेला.