येहोसुवा 6

येरिको नगुडुन आगुटि किय्वल

1 अद गट्कते इज्रयेल पर्जता वेरेते, येरिको नगुडुर बोरे रोपो-बह्‍रि सोंवक्ने तानङ पाटकुन बंदोबस्त केह्‍चि वाट्तेर.

2 अस्के येहोवा बगवंतल येहोसुवन सङा, “सूडा! नना येरिको नगुडुन, तानोर राजन अनि ताकद वालिर सिपायिरकुन गिर नी केय्दे हव्लि कीसेर मंतोन. 3 लडेय किय्वलिर मिरट सम्दिर येरिको नगुडुन सिर्मुट उंदि दिवोस्नगा उंदि चुट तिरियना. इहिन मिरट सारुङ रोज्क कियना. 4 नियम्ना संदोकतुन मुने येड्विर जन्क कटोडलिर, येडुङ पोडेल सींक्नङ तुरङ पिय्सि मुने ताकना. येडवा दिवोसुन नेटि मिरट येडुङ जोकङ नगुडुन सिर्मुट तिरिसेर मनेके, वूर अव तुरन उह्‍कना. 5 आपुस्वक्ने उंदि तीर उह्‍क्वलिक तुरना आवज केन्चि, मी पर्जा सम्दिर बेय जोर्ते हंकत कियना. मिरट इहिन कीनेकेन नगुडा गोडा उल्टे मासि अरंता. अस्के मी सिपायिर सम्दिर सड्कल रोपो नेङा वचो” इन्जेर वेह्‍तोर.

6 ते नूनुनोर मरि येहोसुवल कटोडलिरकुन केयुसि, “बगवंतना नियम्ना संदोकतुन कान्चि ताकट. तान मुने येड्विर जन्क कटोडलिर, येडुङ पोडेल सींक्नङ तुरङ पिय्सि मुने ताकना” इन्जेर वूरकुन वेह्‍तोर.

7 अनि वोर सिपायिर सङा, “देट ताकट! नगुडुन सिर्मुट उंदि चुट तिरियना. आय्तर्क पिय्सि मंवलिर सिपायिर येहोवा बगवंतना संदोकतुन मुने ताकट” इन्जेर वेह्‍तोर.

8-9 येहोसुवल पर्जतुन आगे सीता पेजे, आय्तर्क पिय्सि मंवलिर सिपायिर मुने ताक्सेर मत्तेर. वूर पेजेय येड्विर कटोडलिर पोडेल सींक्नङ येडुङ तुरन पिय्सिकुन, येहोवना चर्नते अवेन उह्‍क्सेर सोन्जेर मत्तेर. वूर पेजेय दुस्रुर कटोडलिर येहोवना नियम्ना संदोकतुन कान्चि ताक्तेर. वीर कटोडलिर पेजेय उंडे कहितुर सिपायिर सोन्जेर मत्तेर. अहन चुट तिरिवल वकत पूरो गिर वूर कटोडलिर अव तुरङ उह्‍क्सेरेन मत्तेर. 10 बति येहोसुवल, “मिरट हंकत कीम्ट इन्जेर नना मीकुन वेह्‍वल दिनम वेरि, मिरट दब मंदना. मी तोड्दल उंदि गोस्टि गिर केन्जा वाय्वा. बस्केते नना वेहंतोनो, अस्केने मिरट लडेय्ता हंकत कियना” इन्जेर पर्जतुन आगे सीतोर.

11 ते वूर अद तीर्दे येहोवा बगवंतना नियम्ना संदोकतुन अद नगुडुन सिर्मुट उंदि चुट तिरुसीता पेजे, वूर तम्वङ डेरङ मंवल जागतगा वासि, अद नेटि नर्का मुकम कीतेर.

12-13 दुस्रो नेटि बेय सक्रेन येहोसुवल तेत्तोर. आय्तर्क पिय्सि मंवलिर सिपायिर मुने ताक्सेर मत्तेर. वूर पेजेय येड्विर कटोडलिर पोडेल सींक्नङ येडुङ तुरन पिय्सिकुन, येहोवना चर्नते अवेन उह्‍क्सेर सोन्जेर मत्तेर. वूर पेजेय दुस्रुर कटोडलिर येहोवना नियम्ना संदोकतुन कान्चि ताक्तेर. वीर कटोडलिर पेजेय उंडे कहितुर सिपायिर सोन्जेर मत्तेर. अहन चुट तिरिवल वकत पूरो गिर वूर कटोडलिर अव तुरङ उह्‍क्सेरेन मत्तेर. 14 अद तीर्दे रेंडवा दिया गिर नगुडुन सिर्मुट उंदि चुट तिरिसि तम्वङ डेरनगा मल्सि वातेर. अहन वूर सारुङ दियङ कीसेर वातेर.

15 येडवा दिवोसुन नेटि वूर सक्रेन तेच्चि, अद नगुडुन सिर्मुट तिरितेर. बति अद नेटि येडुङ चुट्क तिरितेर. 16 अद येडवा जोका नगुडुन सिर्मुट तिरिता पेजे, कटोडलिर तुरङ उह्‍क्तेर. अस्के येहोसुवल सिपायिर सङा, “इंके हंकत कीम्ट. बारितेके येहोवल इद नगुडुन मीकुन सीसेर मंतोर. 17 येहोवा बगवंतन साटि अर्पना किय्ले इद येरिको नगुडुन अनि तेन रोपो मंवल सम्दोतुन नासेडम कियना. नना मक्डिते रोह्‍तुर वूर कब्रियलिरकुन मदत कीता अद राहबु इंवल लन्जे वेय्लो अनि तानुर लाग्तुर वूरे सिरिप बचे मांतेर. 18 बति बगवंतन साटि अलदि कीतनल मिरट बतय येत्किट्ते, मी पोरो नासेडम वांता. अनि डेरनगा मंवलिर इज्रयेल लोकुर पोरो दुक्सा अनि सिक्सा वायुस्वलिर आंतिट. अदेन साटि अलदि कीतनल बवेने इट्वक मंट. 19 बति सोने, कूरा, पितुड अनि कचिते कीतङ वस्तुङ सम्दो येहोवन साटि अलदि कीतङ आंतङ. अव सम्दोन येहोवना कजनतगा तचि इरना” इन्जेर वेह्‍तोर.

20 बस्केते कटोडलिर तुरङ उह्‍क्तेरो, अस्के सिपायिर बेय जोर्ते हंकत कीतेर. अहन हंकत कीनेके नगुडुन सिर्मुट्ना गोडा उल्टे माता. सिपायिर सम्दिर उल्टे माता अद गोडतुन नीटम तेर्ग्सि, नगुडुन आगुटि कीतेर. 21 अनि वूर सिपायिर, वेय्लो-माय्नलिरा अनि चुडुक-डगुक्ना तेडा सूड्वक सम्दिरकुन तल्वर्क्ने पासि जक्तेर. अह्‍ने कोंदन, गोरेन, गादिन अद नगुडगा मंवल सम्दोतुन तल्वर्क्ने पासि नासेडम कीतेर.

22 ते येहोसुवल, मोदोल मक्डिते सारि कीसि मत्तोर वूर इविर सङा, “अद लन्जे वेय्लोना रोन सोन्जि, मोदोल गोस्टि सीतपे, तान अनि तानुर लाग्तुर सम्दिरकुन अगटल पिय्सि वरट” इन्जेर वेह्‍तोर.

23 अदेन साटि मक्डिते सोत्तुर वूर सोन्जि, राहबुन, तानुर बेये-बाबन, तादल-तमुन अनि तानुर लाग्तुर वूर सम्दिरकुन बह्‍रि पिय्सि वातेर. अनि वूरकुन, इज्रयेल्तुरङ डेरना जागतल बह्‍रि मंदा सीतेर.

24 अद आता पेजे वूर अद नगुडुन तान्गा मंवल सम्दितुन तड्मिते डुंडुस्तेर. अनि सिरिप सोने, कूरा, पितुड अनि कचिता सामंतुने येहोवा बगवंतना कजनतगा तचि इर्तेर. 25 राहब इंवल लन्जे, येरिकोतुन सूड्ले येहोसुवल सारि किय्वलिर मक्डिते सोत्तुर वूर कब्रियलिरकुन मकुसि इर्ता. अदेन साटि वोर तान अनि तानोर बाबोना रोतुरकुन अनि तानुर लाक्तुर सम्दिरकुन जीवते इर्तोर. नेंड वेरि तानुर लोकुर इज्रयेल पर्जत नड्डुम पिसेर मंतेर.

26 अद गट्कते येहोसुवल पर्जतुन दम्कि सीसि, “बोर्ते येरिको नगुडुन दोह्‍लेन आंतोरो, वोर येहोवा बगवंतना सापेना लाग्तोर आंतोर. वोर ताना बुनदि दोह्‍तेके वोनोर मडनोर मरिना परन दांता. वोर तानङ कावक निपुस्तेके वोनोर सेव्टतोर मरिना परन दांता” इन्जेर वोट वाड्तोर.

27 अद तीर्दे येहोवल, येहोसुवन सात मत्ता काड्कि, वोना कीर्ति पूरो देस्नगा पग्रे माता.