पुट्गड्मि 49

याकोब तंवुर मरकुन आक्रितङ गोस्टिङ वेह्‍वल

1-2 याकोब तंवुर मरकुन सङा, “ना मर्क्निट!

नह्‍गा वासि, केन्जट. मिह्‍गटल हर वोरोन बविसत्ने बतल जर्ग्वल मंतयो वेहंतोन.

- रूबेन -

3 रूबेन, निमे नावोर मडनोर मरिनि आंदि.

ना सक्ति, ना ताकद्ना मोदोडा पंडिति आंदि.

निमे सम्दिर्गटल अदिक मान येतनल अनि बलम वालेनि आसि मत्ति बति,

4 निमे आपुसा परुर आतल ऊसत दात्नोनि आंदि.

नीवा निमे मांदुन सोडुस्ति.

बारितेके नी बाबो पाट आता वेय्लोन सङा मींड्सि,⁺

नावा कटुडुन बे-सुदुड-पान कीति.

- सिमियोन अनि लेवि -

5 सिमियोन अनि लेवि मिरट उंदि तीर्दा मन वालिर आंदिट.

मीवङ आय्तर्क नासेडम किय्ले वाडकम कींतिट.

6 नना मिरट कुसये वड्क्वडगा वायोन.

मीवङ पिलन्क्नगा नना मीरे मायोन.

बारितेके मिरट सोङुन वासि, माय्नलिर्क जक्तिट.

⁺

मीवा कुसित साटि कोंदनङ काल्क्नङ सीरङ तिवुस्तिट.

7 मीवा वेरिनल मंवल सोङुन पोरो सापेना वांता.

अद दया सेल्वक्ने किय्वडुन पोरो सापेना वांता.

नना मीकुन नावा संतांदुन नड्डुम पग्रि कींतोन.

नना पूरो इज्रयेलतगा मीकुन बेंदुर हके कींतोन.

- यूदल -

8 यूदा, निमे नी पगा-दारकुन मेयंति.

नी तादल-तमुर नीकुन डगुर-पान सीसि, काल करंतेर.

9 यूदा ना मरि निमे इंकेने सिकरि कीसि,

वाता अद जवन चिहोत दात्नोनि आंदि.

⁺

निमे आरम कीसेर मींड्सि मनेके,

नीकुन तेह्‍ले, बोरे दर्यम कियुर.

10 यूदा, नी कांदांतुर राजलिर आसि, राज ताकुसींतेर.

राज ताकुस्वल अदिकारि वानल वेरि, अद राज ताकुसेर मंदंतेर.

वोर राज ताकुस्वल अदिकारिन सम्दो जातिनुर मानि कीसि ताकंतेर.

11 बेय मुक्तरि आङुर्क्ना पंटा मत्ता काड्कि,

निमे अव वेलिनगा नीवा मूरतुन

अनि बेय साद्ता आङुर्क्ना वेलितगा,

पड्डतुन गिर दोहा परंति.

नीवङ कप्डिङ सुका परनच्चोर

वेले आङुर्क्ना रसा निह्‍गा मंदंता.

12 नीवङ कड्क वेले आङुर्क्ना रसा उंवडुन हिंदल,

अद रसतुन तेर अदिक रङ वरे मासि मंदंतङ.

नीवङ पल्क वेले पाल उंवडुन हिंदल,

अद पालदुन तेर अदिक दव्रलिक मंदंतङ.

- जेबुलुन -

13 जेबुलुन निमे सम्दुर्ता डर्डित करुम पिसंति.

अद जागा रूकङ आग्ले चोकोट कामि सींता.

नीवा सिवा सीदोन चहर वेरि मंदंता.

- इसकार -

14 इसकार निमे बेय वेले वजन वोह्‍वल गादित मोडितोनि आंदि.

नी पोरो हके-हिके वाड्ता वजंतुन नड्डुम अविसि मींड्सि मंदंति.

15 निमे आरम किय्वल जागा अनि नी सिर्मुट मंवल

बोमि नीकुन बेय चोकोट दिसंता.

अदेन साटि वजन वोह्‍ले सेटा वरुसि,

जुल्मते चाकिरि किय्वल दासि माय्ननि आंति.

- दान -

16 दान निमे इज्रयेल्तङ कांदान्क्नुर मोडि

नी पर्जता नायम तिवुसंति.

17 निमे सरदुन बग्ला मंवल तरसुन दात्नोनि आंदि.

अद विक वाले तरस कोडता कील्चत कस्कंता.

अदेन साटि कोडतगा उद्वल अरंतोर”

इन्जेर याकोब वेह्‍तोर.

18 अनि, “येहोवा बगवंता! नाकुन बचि कीकि इन्जि सूड्सेर मंतोन”⁺ इन्जेर कोर्तोर.

- गाद -

19 अहन कोर्ता पेजे,

“गाद नी पोरो कले-कङ्रलिर मुच्लि अरंतेर.

बति निमे वूरकुन पिटेडम पूडिसींति.

- असेर -

20 असेर नीवा बोमि बेय चोकोट्ना पंटा सींता.

राजलिर पसंद कीसि तिनल, अद पंटता रासि मंदंता.

- नप्तालि -

21 नप्तालि निमे कुर्सुन दात इचा वाता तीर वित्वनि आंदि.

निमे चोकोट्नङ गोस्टिङ वड्कंति.

- योसेप -

22 योसेप निमे साद्वल आङुर्क्ना वेलित दात्नोनि आंदि.

निमे जलत करुम मन्जि, पङङ गोडत पोरो पार्सेर,

साद्वल वेलितुन दात्नोनि आंदि.

23 बान्क वालिर तम्वङ बान कोलने पासेर

वूर नीकुन तक्लिब सींतेर.

24 बति नीवा बान अनि बान कोलते लडेय कीसि मेय्ले,

नीकुन ताकद नी बाबो याकोब्नोर सक्ति वाले बगवंतल सींतोर.

वोर बगवंतले इज्रयेल्तुरकुन हाले माय्वक मंवल पेर्सा बंडत मोडि

अनि गाय्किन मोडि नीकुन काबाड्वल आंदुर.

25 नी बाबोनोर बगवंतल नीकुन मदत कीसेर मंतोर.

वोर सक्ति वाले बगवंतले नी साटि पोरोडल पिर अरुसंतोर.

बोमित बूडनल जला पुटुसंतोर.

अनि वेले मरि-मियडुन नीकुन सीसि, आसिर्वाद सींतोर.

26 ना मरि!

तोत्तङ डङलिक गुटन तेर नना सिय्वलिक आसिर्वाद्क बस्केट मंवलिक आंदुङ.

नी तादल-तमुकुन नड्डुम राजन मोडि मंवल

नीवा तलत पोरो इव आसिर्वाद्क निल्सि मंदंतङ.

- बेंयमीन -

27 बेंयमीन निमे चीरिवल लांडिगडुन दात्नोनि आंदि.

निमे सक्रे बय्मन-दारकुन पोरो मुच्लि अरंति

अनि अहन लूटि कीततुन पोद्रेक तूसंति”

इन्जेर तंवुर मर्कनल वोरोर वोरोन याकोब वेह्‍तोर.

28 इद तीर्दे वूरोर बाबो वेह्‍चि, हर वोरोन कटनल आसिर्वाद सीतोर.

वीर सम्दिर गिरे इज्रयेल्तुर बारा (12) कांदानुर आंदिर.

याकोब्ना मरन

29 अद आता पेजे याकोब वूर सङा, “इङे नावा परन सुटि कीसि, ना तादुर-बाबुर्गा दांतोन.

ना तादुर-बाबुरकुन माति कीता हेतु जातितोर येप्रोंता वीच्ना बुयरितगन नाकुन माति कीम्ट.

30 अद बुयरि कनान देस्ना माम्रेत सिडयिङ्ना मकपेलतगा मंवल वाव्टगा मंता.

अब्राहम अद बोमितुन हेतु जातितोर येप्रोंतगटल वीचकुन साटि येत्तोर.⁺

31 अगा ना तादो अब्राहमुन, आजि सारन, बाबो इसकुन अनि बेये रिब्कन माति कीता काड्कि, अगने नना लेयन गिर माति कीतोन.

32 अद बोमि अनि अगा मंवल बुयरि हेतु^* जातितुर्गटल येत्ता आंद” इन्जेर वेह्‍तोर.

33 याकोब तंवुर मरकुन हुकुम सीता पेजे, कटुडगा मींड्तोर.

अनि तंवा परन सुटि कीसि, तादुर-बाबुर्गा सोन्जि, मीरे मातोर.