पुट्गड्मि 46

बगवंतल याकोबुन वाग्दन सिय्वल

1 ते याकोब तन्गा मत्ता सम्दो दन-दव्लतुन पिय्सि, यात्रा किय्वल सुरु कीतोर.

अहन यात्रा कीसेर, बेर्सेबतगा वासि, तंवोर बाबो इसक्नोर बगवंतन बलिदान्क सीतोर.

2 अंटिता रातुन बगवंतल याकोबुन दर्संते दिसि, “याकोब!

याकोब!” इन्जेर केय्तोर. अद केन्चि, “वेहा पर्बु” इन्जेर इत्तोर.

3 ते वोर, “ननय बगवंतना आंदुन.

नी बाबोनोर बगवंतना ननय आंदुन.

निमे ईजिप्ट सोंले वेरिमा.

अगा नीवा संतांदुन बडि कीसि, डगुर जाति कींतोन.

4 ईजिप्ट्नगा नना गिर नी सङा वांतोन.

नीवा संतांदुन अगटल मलुसि तरंतोन.

योसेप नी सङा मनेके, सांतिते परन सुटि कींति” इन्जेर इत्तोर.

याकोब्ना कुटुंबतुर ईजिप्ट देस्ने सोंवल

5 ते याकोब बेर्सेबतल पेसितोर.

वोनुर मर्क परो राजल सारि कियुस्तङ कासुक्नगा बाबोन, तम्वङ वेय्लोकुन अनि तम्वुर मरि-मियडुन उपुसीतेर.

याकोब्ना कुटुंबा ईजिप्ट वाय्वल

6-7 वूर तम्वा डोर-जंवर, कनान देस्ने कमय कीता दन-दव्लत सम्दोतुन पिय्सि, ईजिप्ट्नगा वातेर.

इद तीर्दे याकोब तंवा कुटुंबतुन (मरि-मियड अनि तङ्मरि-तङ्मियकुन) ईजिप्ट्नगा पिय्सि वातोर.

याकोब्ना कुटुंबता वेलि

8-9 याकोब अनि वोनुर मर्क ईजिप्ट्नगा वातेर.

वूरङ पोरोल्क: याकोब्नोर मडनोर मरि रूबेन.

वेनुर मर्क: हनोक, पल्लु, हेस्रोन, कर्मि.

10 सिमियोंतुर मर्क: येमुयेल, यामिन, वोहद, याकिन, सोहर, साव्लु (कनांता वेय्लोनोर मरि आंदुर).

11 लेविनुर मर्क: गेर्सोन, कहत, मेरारि.

12 यूदनुर मर्क: येरु, वोनन, सेलल, पेरेसु, जेरहु.

येरु, वोनन कनान देस्ने मार्तेर.

पेरेसुनेर मर्क: हेस्रोन, हामुल.

13 इसकार्तुर मर्क: तोला, पुव्या, यासुब^*, सिम्रोन.

14 जेबुलुंतुर मर्क: सेरेद, येलोन, यहलेल.

15 वीर सम्दिर लेयना पीटेते पुट्तेर आंदुर.

पदना-आरम्नगा मनेके दीनल इंवल मियडुन गिर अद जल्मा सीता.

ताना संतांदुर सम्दिर तीसा मुविर (33) जन्क.

16 गादुनेर मर्क: सिप्योन, हग्गि, सूनि, येस्बोन, येरि, अरोदि, अरेलि.

17 आसेरुनेर मर्क: इमनल, इस्वल, इस्वि, बेरियल, वीरा सेलडा पोरोल सेरह.

बेरियनेर मर्क: हेबेर, मल्कियेल.

18 वीर सोडा (16) जन्क संतान लाबंता मियड लेयना दासि जिल्पल अनि याकोब्ना संतान आंदिर.

19 याकोब्ना वेय्लो राहेल्तुर मर्क: योसेप, बेंयमीन.

20 योसेपुन, मनसे अनि येप्रायिम इंवलिर इविर मर्क पुड्तेर.

वीरकुन ईजिप्ट्नगा वोनु इंवल नगुडोर कटोडल पोतिपेरना मियड आसेनत जल्मा सीता.

21 बेंयमींतेर मर्क: बेलल, बेकेर, अस्बेल, गेराल, नयमान, येहि, रोस, मुप्पीम, हुप्पीम, आर्दु.

22 याकोबुन, राहेलतुन चोव्दा (14) जन्क संतान आतेर.

23 दानुनोर मरि हुसीम.

24 नप्तालिनुर मर्क: यहसेल, गूनि, येसेर, सिल्लेम.

25 वीर येड्विर लाबंता मियड राहेल्ता दासि बिल्हल अनि याकोब्ना संतान आंदिर.

26 याकोब्नङ कोर्यकुन सुटि कीसि, वोना पीटे पुट्तुर वोन सङा ईजिप्ट वातुर वूर सम्दिर साट सार्विर (66) जन्क.

27 याकोब, योसेप अनि ईजिप्ट्नगा योसेपुन पुट्तेर इविर मरकुन मीरि कीसि, याकोब्ना कुटुंबतुर सम्दिर सत्तर (70) जन्क मांदि.

याकोब ईजिप्ट येव्वल

28 तमकुन गोसेंतगा बेटे मायिर इन्जेर याकोब तमकुन तेर मुने यूदन योसेप्नगा सारि कीतोर.

वूर सम्दिर गोसेंतगा येव्ता पेजे,

29 योसेप तंवा रतुन तयर कियुसि, तंवोर बाबो याकोबुन बेटे माय्ले, गोसेंतगा सोत्तोर.

अनि बाबोन बेटे मासि, उर्न्गि कीसि, बेय आड्तोर.

30 अनि याकोब योसेपुन सङा, “निमे उंडे पिसिन मंति.

नी मोकोम सूड्तोन.

इङे नना सांतिते परन सुटि किया परंतोन” इन्जेर इत्तोर.

31 योसेप सम्दो कुटुंबतुन सूड्सि, “नना परोनगा सोन्जि ‘कनान देस्ने मंवलिर ना कुटुंबतुर वातेर.

32 वूर्गा मंवल सम्दो डोर-जंवरतुन पिय्सि, वातेर.

वूर डोर-जंवरतुन मेह्‍चेर, पोसि किय्वलिर आंदिर’ इन्जेर वेहंतोन.

33 परो राजल मीकुन केय्सि, ‘मिरट बतल काम कींतिट?’ इन्जेर पूसि कीनुर.

34 ते मिरट गोसेन येरियतगा पिसेर मंले, ‘नी सेव्कलिर आय्वलिर मा तोत्तुर अनि ममोट मा चुडु-गादडल इंके वेरि गिर डोर-जंवरतुन मेह्‍चेर, अवेन पोसि किय्वलिर आंदुम’ इन्जि वेहना” इन्जेर सूचना कीतोर.

बारितेके गाय्किरकुन ईजिप्ट्नुर पसंद कियुर.