योसेप्ना पिलन
44
1 योसेप तंवोर कारोबारिन सङा, “वूरङ पोतेङ पियनचोर चंदिता रासि निहा.
अनि बोनङ वोन पोतेनगा कोतङ गिर इरा.
2 सेव्टतोना पोतेतगा गटि वाट्वडुन करुम नावा कूरता कोजा अनि वोर येत्ले तत्तङ कोतङ इरा” इन्जेर इत्तोर.
ते योसेप हुकुम सीता तीर, वोनोर कारोबारि कीतोर.
3 उज्डे माता पेजे, वूरकुन अनि वूर सङा गादिन सारि कीतोर.
4 वूर अद नगुडल वेले लक सोंवक मनेकेन, योसेप तंवोर कारोबारिन केयुसि, “वूर्गा सोन्जि बेटे मासि, ‘ममोट मीकुन चोकोट सूड्तोम.
बति माकुन बारि वायुट कीतिट?
5 ना माल्कल बतते उंटोरो, बतते सगुन सूडंतोरो अद कोजतुन मिरट कल्सि, बारि गल्ति कीतिट?’ इन्जेर वूरकुन पूसि कीम” इन्जेर वेह्तोर.
6 वोर वूर्गा सोन्जि, योसेप वेह्तप पूसि कीतोर.
तादलिर्गा कारोबारिन सारि किय्वल
7 ते वूर, “वोर साब इहिन बारि वड्क्तोर? ईतल कले दंदा नी सेव्कलिर आय्वल ममोट बस्केन कियोम” इन्जेर कारोबारिन वेह्तेर.
8 इचुला!
मोदोल जोका मा पोतेनगा पुड्तङ कूरतङ कोतन मलुसि, कनान देसनल तत्तोम. ते नी माल्कना रोतल ममोट सोनेय आयि चांदिय आयि कल्कोमिय?
9 अद नी सेव्कलिर आय्वल मह्गा बोन्गन पुटर्ते, वोर सायना अनि ममोट सम्दिर गिर मी दासिर आसि मंद्कोम” इन्जेर इत्तेर.
10 अद केन्चि, “मिरट वेह्ता तीरे कीकिट मन्जे.
बोन्गते अद कोजा पुटंतयो वोरे नाकुन दासि आंतोर.
बति मेय्तुर सम्दिर बे-कसुर वालिर आंतेर” इन्जेर इत्तोर.
बेंयमीन गल्तितगा साप्डे माय्वल
11-12 अस्के सम्दिरे सपा-सिपा गादिनल पोतेङ बूड रेह्चि, मडनोना पोतेतल मोदोल कीसि, सेव्टतोना पोते वेरि मह्क्तेर.
ते अद कोजा बेंयमींता पोतेतगा पुट्ता.
13 अस्के वूर तम्वङ कप्डिङ दुक्सते सरुसि, पोतेन गादिन पोरो वाट्सि, पेजे मल्सि नगुडे वातेर.
14 यूदल अनि वोनुर तादल-तमुक सम्दिरे योसेप्ना रोन येव्तेर.
अस्के योसेप रोने मत्ता काड्कि, वोन मुने सोन्जि, गप्ने बोमितगा अर्सि, काल कर्तेर.
15 अस्के योसेप, “मिरट बारि इहिन कीतिट? ना दात्नोर मायनल सगुन सूड्सि करि कीनुर इंवल मीकुन वोड्कि सेले बतल?” इन्जेर पूसि कीतोर.
16 ते यूदल, “साब!
बहन इन्जेर वेह्कोम? बतल इन्जेर वेह्कोम? ममोट बे-कसुर वालिर इन्जेर बतल गवा तोह्कोम? नी सेव्कलिर आय्वलिर ममोट मोदोल कीता पाप्ना कसुडा सिक्सा, इंके बगवंतल माकुन मलुस्तोर. इचुला! अद कोजा बोन्गा पुड्तयो वोन बरोबर ममोट गिर नीकुन दासिर आंतोम” इन्जेर इत्तोर.
17 ते योसेप, “सेले सेले!
मी सम्दिरकुन सिक्सा वाटोन.
बति सिरिप बोन्गते अद कोजा पुड्तयो, वोरे नाकुन दासि आनुर. कड्मतुर मी बाबोनगा सांतिते मल्सि सोंटु” इन्जेर इत्तोर.
बेंयमींतुन साटि यूदल जुल्मा किय्वल
18 अस्के यूदल करुम सोन्जि, “साब!
निमे परो राजन बरोबर अदिकार वालेनि आंदि इन्जेर टावा. दया कीसि, ना पोरो सोङुन वाय्वक्ने नना किय्वल विनंति केन्जा.
19 ममोट मोदोल वातोम अस्के, साब निमे, ‘मीकुन बाबोय आयि तमुर आयि मंतोर बतल?’ इन्जेर माकुन पूसि कीति.
20 अदेन साटि, ममोट नी सङा, ‘माकुन बाबो मंतोर.
वोर वेडिल आतोर.
वोना वेडिल पांदे जल्मा आतोर वोर सेव्टतोर मा तमुर मंतोर.
वोर तमुनोर कास तादल मार्तोर.
अदेन साटि वोन बाबो वेले लाड कींतोर’ इन्जेर वेह्तोम.
21 अस्के, ‘वोर तमुन नह्गा पिय्सि वरट.
नना वोन सूडा लागर’ इन्जेर निमे इत्ति.
22 ते ममोट, ‘वोर तमुर बाबोन सुटि कीसि मंदा परोर.
उंदि मोका वोर बाबोन टूटे मातेके, बाबो परन सुटि कींतोर’ इन्जेर वेह्तोम.
23 बति निमे, ‘मी तमुन मी सङा तर्वेके मिरट मर्ला ना मोकोम सूड्मट’ इन्जेर माकुन हुकुम सीति.
24 अदेन साटि नी गोस्टितुन मा बाबोनगा सोन्जि वेह्तोम.
25 कहि रोज्क आता पेजे, “मा बाबो, ‘मिरट उंदुंदि जोका चंदि येच्चि तरट’ इन्जेर इत्तोर.
26 बति ममोट, ‘अगा सोंदा परोम.
मा सेव्टतोर तमुन मा सङा रोह्तेकेन दांतोम.
वोर तमुर मा सङा मत्तेकेन तपा वोर माय्नन मुने निला परोम’ इन्जेर वेह्तोम.
27 ते मा बाबो, ‘ना बाय्को राहेल इविर मरकुन जल्मा सीता इंवल मीकुन वोड्किय मंता.
28 वूर इविर्गटल वोरोर सेलोर.
वोन केडता बदोय उंदि जंवर तिता बतलो.
अस्केडल वोर नाकुन दिस्मकि.
29 नना पिड्स्तङ केल्क्नोर बुडियना आंदुन.
मिरट सोंवल सर्दगा वोन बतय आयर्ते, अद दुक्सता कबुर केन्चि, नावा परन दांता’ इन्जेर इत्तोर.
30-31 अदेन साटि नी सेव्कल आय्वल मा बाबोनगा वेर तमुन वोय्वेके दाकोम्ते, वेर सेल्वा सूड्सि, दुक्सते तंवा जीवा सुटि कीनुर.
बारितेके बाबो वेन वेले लाड कींतोर.
अहन ममोट पिड्स्तङ केल्क्नोर मा बाबोना परन तेंड्वलिर आंतोम.
32 माल्का! नी सेव्कल आय्वल नना मा तमुन तर्नेके, ‘बाबा! वेन मल्सि निह्गा तर्वेके सोत्तेके, सानल वेरि इद कसुर ना पोरो मनि’ इन्जेर बाबोन गोस्टि सीसि तत्तोन.
33 अदेन साटि वोन बद्लि नाकुन नीवा दासि-पान किय्ले इर्सि, वोन तादलिर सङा सोंदा सीमु.
34 वेर तमुर ना सङा सेल्वा नना बाबोनगा बहन दाया पर्का? दाकते ना बाबोन वाय्वल दुक्सतुन सूडा लागर” इन्जेर यूदल योसेपुन वेह्तोर.