सारल मोड्डन जल्मा सिय्वल
21
1 येहोवा बगवंतल सारन वेह्ता तीरे तना सीता वाग्दंतुन पूरि कीतोर.
2 अद बहन इत्तेके, वोर वेडिल-पांदे मनेके, बगवंतल अब्राहमुन सङा वेह्ता तीर बरोबर वकत्ने,+ सारल पीटे मन्जि, वोन साटि मोड्डन जल्मा सीता.
3 वोर मरिन इसक इन्जेर अब्राहम पोरोल दोस्तोर.
4 तनकुन बगवंतल हुकुम सीता तीर इसकुन आट (8) रोज्क्ने अब्राहम तोल कत्रि कियुस्तोर.
5 तंवोर मरि इसक जल्मा आनेके, अब्राहमुन नूर (100) साल्क्ना वहि मत्ता.
6 अस्के सारल, “बगवंतल नाकुन कुसिते कवनल कीतोर.
इद केन्ज्तुर वूर ना बरोबर कुसिते कवनिर.
7 नना मोड्डन जल्मा सींतोन इन्जेर बोर वेहा पर्ंदुर? बति वोर अब्राहम वेडिल मनेकेन, वोन साटि वोरोर मोड्डन जल्मा सीतोन” इन्जेर इत्ता.
हगरतुन अनि इस्मयेलतुन रोतल सारि किय्वल
8 इसक बेर्सिकुन पाल मरुङ्तोर.
अद नेटि अब्राहम उंदि डगुर जेवुन सीतोर.
9 अस्के अब्राहमुन अनि ईजिप्ट देस्ना दासि हागरतुन जल्मा आतोर वोर कांडि, इसकुन चेडि किय्वल सारल सूड्ता.
10 अनि अब्राहमुन सङा, “इद दासिन अनि तेनोर कांडिन तेंड्सि पूडा.
तेनोर कांडि, ना मरि इसकुन बरोबर जाय्जतुन पोरो ईसदारल आया परोर” इन्जेर सारल वेह्ता.
11 इस्मयेल गिर तंवोर मरि आता काड्कि, इद गोस्टित हिंदल अब्राहमुन बेय दुक्सा लाग्ता.
12 बति बगवंतल अब्राहमुन सङा, “वोर मरिन साटि अनि अद दासिन साटि, निमे बतय रंदि किय्मा.
सारल वेह्ता तीरे निम कीम.
बारितेके इसक्ना मरि-मियडे नी संतान आंता.
13 अद दासिनोर पेडल गिर नी पीटोर मरि आता काड्कि, वोना संतांदुन बडि कीसि, डगुर-जाति कींतोन” इन्जेर वेह्तोर.
14 दुस्रो नेटि बेय सक्रेन अब्राहम तेच्चि, हागरतगा सारिङ सीसि, येता तिति सेटते कान्जुसीतोर.
अनि तंवोर पेडन गिर तान सङा सारि कीतोर.
ते अद दासि पेसिसि, बेर्सेबतङ बोडि गुटनेके सोन्जि, हिके-हके वेलिसेर मत्ता.
15 अद तितिता येर मार्ता.
अस्के अद दासि-वेय्लो वोर पेडन उंदि पोदेलत बूड इर्ता.
16 अनि, “ना पेडना मरन सूडा परोन” इन्जि, जरसि लङ* सोत्ता.
अनि वोन बाज तिरिसि उच्चि, बेय दुक्सते आड्ता.
हागरतुन सङा दूतल वड्क्वल
17 वोर कांडिना आड्वल बगवंतल केन्ज्तोर.
ते बगवंतनोर दूतल स्वर्गनल हागरतुन केय्सि, “हागर नीकुन बतल आता?
निम वेरिमा. बगवंतल वोना आड्वल केन्ज्तोर.
18 निमे तेच्चि अगा सोन्जि, वोर पेडन सुम्जि कीम.
बारितेके वोना संतांदुन गिर डगुर-जाति कींतोन” इन्जेर तान सङा वेह्तोर.
19 अनि बगवंतल हागर्तङ कडकुन येता चेल्मे दिसनल कीतोर.
अस्के अद अगा सोन्जि, तितिते येर तचि कांडिन उह्ता.
20 बगवंतल वोर कांडिन सात मत्तोर.
वोर कांडि चुडुडल डगुर आसि, अव मेटनगा मन्जेर बान पाय्वडगा चतुर आतोर.
21 वोर पारन इंवलिक मेटनगा पिसेर मनेके, अवल ईजिप्ट देसनल उंदि पेडिन तचि वोनङ मर्मिङ कीता.
अबिमेलेक राजन तोडो अब्राहम वाग्दन किय्वल
22 अद गट्कते, अबिमेलेक तंवुर सिपयिरोर कमंडर पीकोलतुन सङा अब्राहमुन बेटे माय्ले वातोर.
अनि अब्राहमुन सङा, “निमे किय्वल सम्दोतगा बगवंतल नीकुन सात मंतोर.
23 अदेन साटि नना नी पोरो दया तोह्ता तीरे, ‘नीकुन, नी पेडन, नी तङ्मरिन* मोसेम किय्वक्ने, नना पर्देसिन दात मंवल इद देसुन पोरो अनि मी पोरो दया तोहंतोन’ इन्जेर बगवंतना पोरोडे निमे वाग्दन कियना” इन्जेर अबिमेलेक इत्तोर.
24 ते अब्राहम, “हो! वाग्दन कींतोन” इन्जेर इत्तोर.
25 उंदि दिया अबिमेलेक्नुर दासिर अब्राहम्ना उंदि कुहितुन आगुटि कीतेर.
ते इदेन बारेते अब्राहम अबिमेलेकुन पिरदि कीतोर.
26 ते अबिमेलेक, “बोर इद कीतेरो नाकुन टावा सेले.
निमे गिरे नाकुन वेह्मकि.
नेट्क वेरि इदेन बारेते केन्ज्मकि” इन्जेर वेह्तोर.
27 अस्के अब्राहम, गोरेङ, मूरङ तचि अबिमेलेकुन सीतोर.
इहिन वूर इविर उंदि नियम इर्तेर.
28 अस्के अब्राहम तंवा गोरेनल येडुङ (7) पाट पोरिकुन येर्प्तोर.*
29 ते अबिमेलेक, “निमे अवेन बारि अलदि कीति?” इन्जेर अब्राहमुन पूसि कीतोर.
30 अस्के अब्राहम, “ननय इद कुहितुन काच्तोन इंवल निसनित साटि, निमे इव पाट पोरिकुन येतना” इन्जेर इत्तोर.
31 अगा वूर इविर आसि नियम इर्ता काड्कि, अद जागतुन बेर्सेबा* इन्जेर केय्तेर.
32 अहन वूर बेर्सेबतगा नियम इर्ता पेजे, अबिमेलेक अनि सिपयिरोर कमंडर पीकोलु अगटल पेसिसि, पिलिस्तियुल्क्ना देस्ने मल्सि सोत्तेर.