Ɨkalata ɨja vʉvɨlɨ ɨja
Yohani
Amasio amalongosi
1
Ʉne ne mʼbaha mʉ kɨpʉgha ɨkya vɨtɨki,
nɨkʉkʉlembela ʉve ghwe mʉkɨjʉʉva ghwe nsalʉlua.
Nɨkʉkʉlembela ʉve palɨkɨmo na vanaako vano nɨvaghanile kyangʼhaani.a
Nakwekʉti nɨvaghanile jʉʉne,
looli na vange vooni vano vavʉkagwile ʉvwakyangʼhaani.
2 Tʉvaghanile,
ʉlwakʉva ʉsue numue tʉvʉkagwile ʉvwakyangʼhaani,
kange tuvisagha nʉ vʉkagʉsi ʉvuo ifighono fyoni.
3 Ʉlʉsʉngʉ nɨ lɨpyana nʉ lʉtengaano kuhʉma kwa Ngʉlʉve ʉNhaata na kwa Yesu Kɨlɨsite ʉMwanaake fivisaghe palɨkɨmo nusue tweni,
tukalaghe mʉ vwakyangʼhaani na mʉ lʉghano.
Ʉvwakyangʼhaani nʉ lʉghano
4 Nɨkahovwike fiijo ye nɨpʉliike kuuti avanaako vamonga vikukala mʉ vwakyangʼhaani,
ndavʉle ʉNgʉlʉve ʉNhaata alyatʉlaghiile.
5 Lɨno ghwe mʉkɨjʉʉva ghwe mʉghanɨke,
nɨkʉkʉsʉʉma kuuti ʉvɨngɨlɨlaghe ʉlʉlaghɨlo lʉno lwiti,
tʉghananaghe.
Ʉlʉlaghɨlo ʉlʉ lʉno nɨkʉkʉlembela nalʉpia,
looli lwe lʉla lʉla lʉno tʉlyale nalwo kuhʉma ye tukwɨtɨka.b
6 Ʉlʉghano ʉlwa kyangʼhaani kwe kʉvɨngɨlɨla indaghɨlo sa Ngʉlʉve.
Ʉlʉ lwe lʉlaghɨlo lʉno mʉkapʉliike kuhʉma ʉlʉtasi kuuti,
mʉghananaghe.
Mʉvisaghe maaso na vasyangi
7 Nijova ʉlʉlaghɨlo ʉlwa lʉghano,
ʉlwakʉva avasyangi mwevale vinga mʉ ɨɨsi.
Avasyangi avuo navikwɨtɨka kuuti ʉYesu Kɨlɨsite alyale nʉ mʼbɨlɨ ndavʉle ʉmuunhu.
Ʉmuunhu jʉno naikwɨtɨka ʉluo,
ʉjuo nsyangi,
kange ghwe mʉlʉgʉ ghwa Kɨlɨsite.
8 Lɨno,
mʉvisaghe maaso na vaanhu avuo,
kuuti ɨmbombo jɨno tʉvombile jɨleke pisova vʉvʉle,
neke mʉpelue ʉlʉhombo lʉno lʉnoghiile.
9 Ʉmuunhu ghweni jʉno naivɨngɨlɨla imbʉlanɨsio sa Kɨlɨsite,
kange ivʉlanɨsia sino nasikwɨtɨngʼhana ni sa Kɨlɨsite,
ʉjuo naalɨ vʉmo nʉ Ngʉlʉve.
Looli ʉmuunhu jʉno ivɨngɨlɨla,
alɨ vʉmo nʉ Ngʉlʉve ʉNhaata nʉ Mwanaake.
10 Lɨno,
ʉmuunhu jʉno ikwisa kʉlyʉmue na kuvʉlanɨsia imbʉlanɨsio sino nasikwɨtɨngʼhana ni sa Kɨlɨsite,
namʉngamwʉpɨlaghe nambe kʉkʉmhʉngɨla hwene nʼjiinu.
11 Ʉlwakʉva ʉmuunhu jʉno ɨkʉmhʉngɨla ʉmuunhu ndavʉle ʉjuo enendɨɨkɨ,
iiva vʉhangɨlanɨsi nʉ mwene mʉ nyɨvi sino ivomba.
Amasio agha kʉhwesia
12 Nɨlɨ ni singi nyinga isa kʉvavʉʉla,
neke nanilonda kʉkʉvalembela mʉ kalata,
ʉlwene nihʉvɨɨla kukwisa kʉlyʉmue kuuti tʉtangʼhane,
neke tʉjove,
pe tʉhovoke fiijo.
13 Avaana va nnino,c
jʉno asalulue nʉ Ngʉlʉve,
vikʉkʉhʉngɨla.