Yohani 8

Ʉmʉkɨjʉʉva jʉno alyakolilue ivwafuka

ɄYesu akavʉʉka, akalʉta kʉ kɨdunda ɨkya Miseituni. 2 Palwakɨlo ye kʉkiile, ʉYesu akagomoka mʉ lʉvɨɨka ʉlwa nyumba ɨnyɨmɨke ɨja kufunyila. Avaanhu vinga vakalʉta pa mwene, pe akikala, akatengʉla kʉkʉvavʉlanɨsia. 3 Ye ivʉlanɨsia, avavʉlanɨsi va ndaghɨlo sa Moose na Vafalisayi, vakamʉleeta kwa mwene ʉmʉkɨjʉʉva jʉmonga jʉno akolilue ivwafuka, vakamʼbɨɨka pakate pa lɨpʉgha lya vaanhu. 4 Vakamʼbʉʉla ʉYesu vakati, “Ghwe Mʼbʉlanɨsi, ʉmʉkɨjʉʉva ʉjʉ akolilue ivwafuka. 5 ɄMoose mʉ ndaghɨlo saake, alyatʉlaghiile kuuti ʉmʉkɨjʉʉva ndavʉle ʉjʉ, atovwaghe na mavue kuhanga afue. Ʉve ghwiti ndaani?”

6 Avavʉlanɨsi va ndaghɨlo na Vafalisayi valyamposisie ʉluo kʉkʉmʉghela, kuuti vaave nɨ kɨteghe ɨkya kʉmhɨghɨla. Neke ʉYesu akinama, akalemba nɨ kyove kyake pa lɨhanga. 7 Ye vajiighe vifikʉmposia, akinamʉka, akavamʉla akati, “Ʉnsila nkole pakate palyʉmue, aave ghwa kwanda kʉkʉntova nɨ lɨvue ʉmʉkɨjʉʉva ʉjʉ.” 8 Pe akinama kange, akalemba pa lɨhanga.

9 Ye vapʉliike ʉluo, vakatengʉla pivʉʉka jʉmo jʉmo, kutengʉlɨla avagoyo kuhanga ʉnʼdebe. Akajigha jʉ Yesu nʉ mʉkɨjʉʉva jʉla ɨmile pala pala. 10 ɄYesu ye ikwinamuka, akamposia akati, “Valɨ kʉʉghi vano vikʉkʉhɨgha? Nakwale nambe jʉmo jʉno ɨkʉkʉhɨgha kuuti ʉnoghiile kubudua?” 11 Ʉmʉkɨjʉʉva jʉla akamwamʉla akati, “Ghwe Mʉtwa, nakwale nambe jʉmo!” Pepano ʉYesu akamʼbʉʉla akati, “Na jʉʉne nanɨkʉkʉhɨgha. Lʉtagha, looli kuhʉma ʉnsiki ʉghʉ, nʉngavombaghe inyɨvi kange.”

ɄYesu ghwe lʉmuli lwa ɨɨsi

12 ɄYesu akatengʉla pijova kange na vaanhu vinga vala akati, “Ʉne nɨlɨ lʉmuli lwa vaanhu mʉ ɨɨsi. Ʉmuunhu jʉno ɨkʉmbɨngɨlɨla ʉne, naighendagha mʉ ngʼhiisi nambe lʉsiku, looli iiva nʉ lʉmuli lʉno lʉkʉmʉlongosia kʉ vwʉmi ʉvwa kʉvʉsila kʉsila.” 13 AVafalisayi ye vapʉliike isio, vakamʼbʉʉla ʉYesu vakati, “Ʉvwolesi vwako navwa kyangʼhaani, ʉlwakʉva ghukwoleka jʉʉve imhola saako.” 14 ɄYesu akavamʉla akati, “Nambe nikwoleka jʉʉne imhola sango, ʉvwolesi vwango vwa kyangʼhaani, ʉlwakʉva nɨkagwile kʉno nɨhʉmile, na kʉno nilʉta. Ʉmue namʉkagwile kʉno nɨhʉmile nambe kʉno nilʉta. 15 Ʉmue muhɨgha kulɨngʼhana na masaaghe ghiinu, neke ʉne nanihɨgha muunhu. 16 Poope nambe nɨhɨghe, ʉvʉhɨghi vwango vwa kyangʼhaani, ʉlwakʉva nanihɨgha ne mwene, looli nʉ Nhaata jʉno asungʼhile ʉne. 17 Mʉ ndaghɨlo siinu lɨlembilue kuuti, ʉvwolesi vwa vaanhu vavɨlɨ, vwa kyangʼhaani. 18 Mʉ ʉluo, ʉne nikujoleka, najʉ Nhaata jʉno asungʼhile ikwoleka kuuti ʉne neene veeni.”

19 AVafalisayi ye vapʉliike isio, vakamposia ʉYesu vakati, “ɄNhaata ghwako alɨ kʉʉghi?” ɄYesu akavamʉla akati, “Ʉmue namʉngʼhagwile, ghwope ʉNhaata namʉnkagwile. Mwale mʉngʼhagʉle ʉne, najʉ Nhaata mwale mʉkʉnkagʉla.” 20 ɄYesu alyajovile isio sooni ye ivʉlanɨsia mʉ kyʉmba kɨno kɨkatambʉlwagha kyʉmba kya kʉvɨɨka indalama mʉ nyumba ɨnyɨmɨke ɨja kufunyila. Neke nakwealyale nambe muunhu ʉghwa kʉnkola, ʉlwakʉva ʉnsiki ghwake ʉghwa kʉkolua ghʉlyakyale kufika.

ɄYesu ijova vwɨmɨla kufua kwa mwene

21 ɄYesu akavavʉʉla kange avaanhu vala akati, “Ʉne nilʉta, ʉmue mulikʉndonda, neke mulifua mʉ vʉhosi vwinu. Kange, kʉno nilʉta, ʉmue namʉngafike.” 22 Pe avalongosi va Vayahudi vakiposania vakati, “Kwekʉti ilonda pikubuda? Ongo iiti, ‘Kʉno nilʉta namʉngafike’?” 23 ɄYesu akavamʉla akati, “Ʉmue mʉhʉmile mʉ ɨɨsi ɨjɨ, ʉne nɨhʉmile kʉkyanya. Ʉmue mʉlɨ va mʉ ɨɨsi ɨjɨ, ʉne nanɨlɨ ghwa mʉ ɨɨsi ɨjɨ. 24 Fye nambe nɨvavʉlile kuuti mulifua mʉ vʉhosi vwinu. Nave namukwɨtɨka kuuti, ‘Ʉne Neene Kwale,’ kyangʼhaani mulifua mʉ vʉhosi vwinu.”

25 Pe vakamposia ʉYesu vakati, “Tʉvʉʉle, ʉve veeve veeni?” ɄYesu akavamʉla akati, “Kuhʉma ʉlʉtasi nɨvavʉlile kuuti neene veeni. 26 Nɨlɨ ni nyinga isa kʉjova na kʉkʉvahɨgha ʉmue. Neke ʉne nɨkʉvavʉʉla avaanhu mʉ ɨɨsi muno si sino asungʼhile ʉNhaata kʉkʉvavʉʉla. ɄNhaata jʉno asungʼhile ghwa kyangʼhaani.” 27 Aveene navalyalʉtangʼhinie kuuti ijova navo imhola isa Nhaata ghwake. 28 Pepano ʉYesu akavavʉʉla akati, “Muliiva mʉnhosisie ne Mwana ghwa Muunhu kuuti mʉmbude, pe mulikʉngʼhagʉla kuuti, ‘Ʉne Neene Kwale.’ Kange, mulikagʉla kuuti sooni sino nivomba, nanivomba mʉ vughane vwango, looli nijova sino ʉNhaata ambʉlanisie. 29 Jʉno asungʼhile ʉne alɨ palɨkɨmo nuune, naandekile ne mwene, ʉlwakʉva ifighono fyoni nivomba isa vughane vwake.” 30 ɄYesu ye ijova isio, avaanhu vinga vakamwɨtɨka.

Ʉvwakyangʼhaani vʉkʉvavɨɨka avaanhu kuuva vavʉke

31 Pepano ʉYesu akavavʉʉla aVayahudi vala, vano vamwɨtiike akati, “Nave mugadɨlɨla imbʉlanɨsio sango, muuva vavʉlanɨsɨvua vango kyangʼhaani. 32 Apuo pe mukagʉla ʉvwakyangʼhaani vwa Ngʉlʉve. Ʉvwakyangʼhaani ʉvuo, vʉkʉvavɨɨka kuuva vavʉke.” 33 Aveene vakamʼbʉʉla vakati, “Ʉsue tʉlɨ va kɨsina kya Abulahamu. Natʉghelile kuuva vakami va muunhu nambe lʉsiku! Lwandaani ghwiti ʉsue tuvɨkua vavʉke?”

34 ɄYesu akavamʉla akati, “Kyangʼhaani nɨkʉvavʉʉla, ʉmuunhu ghweni jʉno ivomba inyɨvi nkami ghwa nyɨvi. 35 Ʉnkami naikukala mʉ nyumba ɨja ntwa ghwake ifighono fyoni, looli ʉmwana ghwa ntwa ikukala ifighono fyoni. 36 Lɨno, ʉne ne Mwana ghwa Ngʉlʉve nɨngavapoke kuhʉma mʉ nyɨvi, namuuva vakami va nyɨvi kange, looli muuva vavʉke kyangʼhaani. 37 Nɨkagwile kuuti ʉmue mʉlɨ va kɨsina kya Abulahamu, neke mulonda pikʉmbuda, ʉlwakʉva namukwɨtɨka imbʉlanɨsio sango. 38 Ʉne nɨkʉvavʉʉla sino nɨsivwene kwa Nhaata ghwango, neke ʉmue muvomba sino mʉpʉliike kwa nhaata ghwinu.”

39 Aveene vakamwamʉla ʉYesu vakati, “Ʉsue tʉlɨ kɨsina kya Abulahamu.” ɄYesu akavavʉʉla akati, “Mwale mʉʉve va kɨsina kya Abulahamu kyangʼhaani, mwale muvombagha sino alyale ivomba ʉAbulahamu. 40 Ʉne nɨvavʉlile ʉvwakyangʼhaani vʉno nɨpʉliike kuhʉma kwa Ngʉlʉve, ʉmue mulonda kʉkʉmbuda! ɄAbulahamu naalyavombile ndavʉle isio. 41 Ʉmue muvomba imbombo sino ʉnhaata ghwinu ivomba.” AVayahudi vala vakamwamʉla vakati, “Ʉsue natʉlɨ vaana va mʉ lɨsoli, ʉNhaata ghwitu alɨ jʉmo mwene, ghwe Ngʉlʉve.”

42 ɄYesu akavavʉʉla akati, “ɄNgʉlʉve ale aave Nhaata ghwinu, mwale mʉkʉngana ʉne, ʉlwakʉva nɨhʉmile kwa mwene. Ʉne nanisile mʉ vʉtavʉlɨlua vwango, looli ʉNgʉlʉve ghwe jʉno asungʼhile. 43 Kɨki namʉkʉsitangʼhania sino nijova? Namʉkʉsitangʼhania, ʉlwakʉva namulonda kukwʉpɨla imbʉlanɨsio sango. 44 Ʉmue ʉnhaata ghwinu ghwe Setano, mulonda kuvomba sino ilonda ʉmwene. Kuhʉma mʼbʉkʉʉlʉ ʉSetano mʼbudi, nailonda ʉvwakyangʼhaani, ʉlwakʉva mwa mwene ʉvwakyangʼhaani namwevʉle. Kujova ʉvʉdesi, lwiho lwake, ʉlwakʉva ʉmwene nʼdesi, kange ghwe nhaata ghwa vadesi vooni. 45 Lɨno, ʉne nijova isa kyangʼhaani, fye nambe namʉkʉnyɨtɨka.

46 “Asi, ghwe veeni pakate palyʉmue jʉno ndepoonu ikwoleka kyangʼhaani kuuti ʉne nɨlɨ mhosi? Nave sino nɨkʉvavʉʉla sa kyangʼhaani, kɨki namʉkʉnyɨtɨka? 47 Ʉmuunhu ghwa Ngʉlʉve ivɨngɨlɨla sino ijova ʉNgʉlʉve. Ʉmue namuvɨngɨlɨla sino ijova ʉNgʉlʉve, ʉlwakʉva namʉlɨ vaanhu vaake.”

ɄYesu mʼbaha kukila ʉAbulahamu

48 AVayahudi vakamʼbʉʉla ʉYesu vakati, “Asi, nase seene pano twiti ʉve ʉlɨ Nsamalia, kange ʉlɨ nɨ lɨpepo ɨlɨlamafu?” 49 ɄYesu akavamʉla akati, “Ʉne nanɨlɨ nɨ lɨpepo ɨlɨlamafu. Ʉne nɨkʉmwoghopa ʉNhaata ghwango, neke ʉmue namʉkʉnyoghopa. 50 Ʉne nanilonda avaanhu vanginie, looli kwale ʉnya kʉnginia, ʉmwene ghwe mhɨghi ghwa kyangʼhaani. 51 Kyangʼhaani nɨkʉvavʉʉla, ʉmuunhu jʉno ivɨngɨlɨla sino nivʉlanɨsia, ʉvʉfue navʉlamwagha lʉsiku.”

52 Pepano aVayahudi vakamʼbʉʉla ʉYesu vakati, “Lɨno, tʉkagwile kuuti ʉlɨ nɨ lɨpepo ɨlɨlamafu! ɄAbulahamu alyafwile, voope avavɨli valyafwile, lwandaani ʉve ghwiti, ‘Ʉmuunhu jʉno ivɨngɨlɨla sino nivʉlanɨsia, ʉvʉfue navʉlamwagha lʉsiku’? 53 Kwekʉti ʉve ʉlɨ mʼbaha kukila ʉnkʉʉlʉ ghwitu ʉAbulahamu? ɄAbulahamu alyafwile, avavɨli voope valyafwile. Neke ʉve ghukuvɨɨka veeve veeni?” 54 ɄYesu akavamʉla akati, “Nɨngighinie jʉʉne, ʉlughinio lwango luuva lʉsila mbombo. ɄNhaata ghwango, jʉno ʉmue mwiti ghwe Ngʉlʉve ghwinu, ghwe mwene ɨkʉnginia ʉne. 55 Ʉmue namʉnkagwile ʉNgʉlʉve, ʉne nɨnkagwile. Nɨngati nanɨnkagwile ʉNgʉlʉve, niiva nʼdesi ndavʉle ʉmue. Ʉne nɨnkagwile ʉNgʉlʉve, kange sino ijova nikʉnda. 56 Ʉnkʉʉlʉ ghwinu ʉAbulahamu alyahovwike fiijo ye akagwile kuuti ʉne nilikwisa, ye anyaghile, akava nʉ lʉkeelo fiijo.”

57 Pepano aVayahudi vakamposia ʉYesu vakati, “Ʉve nʉfikisie nambe amaaka fijigho fihaano, ʉAbulahamu ʉmmanyile ndaani?” 58 ɄYesu akavamʉla akati, “Kyangʼhaani nɨkʉvavʉʉla niiti, ʉAbulahamu ye akyale kuholua Ʉne Kwenɨlɨ.” 59 AVayahudi ye vapʉliike isio, vakahola amavue kuuti vantove, vamʼbude. Neke ʉmwene akifisa, akahʉma mʉ lʉvɨɨka ʉlwa nyumba ɨnyɨmɨke ɨja kufunyila.