Lʉʉka 15

Ɨkɨhwanɨkɨsio ɨkya ngʼholo jɨno jɨsovile

(Mataayi 18:12-14)

Ɨkɨghono kɨmonga, avasongesia songo na vahosi avange, vakava vilʉta kwa Yesu kʉkʉmpʉlɨkɨsia. 2 Pe aVafalisayi na vavʉlanɨsi va ndaghɨlo, vakatengʉla pikungʼulasia viiti, “Ongo ʉmuunhu ʉjʉ, ikukala na vahosi ndavʉle ava! Kange ilia navo!”

3 Pepano ʉYesu akavavʉʉla ɨkɨhwanɨkɨsio ɨkɨ akati, 4 “Nave jʉmonga mʉlyʉmue alɨ ni ngʼholo kɨlʉndo, neke jɨmonga jɨsove, kyaivomba kɨki? Kyangʼhaani nɨkʉvavʉʉla, ɨkʉsileka isingi sila fijigho budikalʉbale na budikalʉbale, na kulʉta kulonda jɨno jɨsovile, kuhanga ajaaghe. 5 Neke kyaajaghile, ɨkʉjɨveghala nʉ lʉkeelo, 6 na kuvuja najo kʉ kaaja. Angafike pa kaaja, pe ɨkʉvakemeela avamanyaani na vabadɨngʼhani vaake, ɨkʉvavʉʉla kuuti, ‘Hovokaghi palɨkɨmo nuune, ʉlwakʉva ɨngʼholo jango jɨno jɨveele jɨsovile, nɨjaghile!’

7 “Nɨkʉvavʉʉla, enendɨɨkɨ fye luliiva lʉkeelo lʉkome kʉkyanya, pano ʉmhosi jʉmo ilaata inyɨvi saake. Ʉlʉkeelo ʉluo luliiva lʉkome, kukila ʉlʉkeelo vwɨmɨla avaanhu fijigho budikalʉbale na budikalʉbale avagholofu, vano vasila vʉfumbue ʉvwa kʉlaata.”

Ɨkɨhwanɨkɨsio ɨkya lʉtalama lʉno lʉsovile

8 ɄYesu akavavʉʉla ɨkɨhwanɨkɨsio ɨkɨngɨ akati, “Tʉʉti ʉmʉkɨjʉʉva jʉmonga alɨ ni ndalama kɨjigho, neke ʉlʉtalama lʉmo lʉsove, asivombe kɨki? Kyaikʉnga ɨtaala, na kufyaghɨla ɨnyumba jooni, ilonda kuhanga alwaghe. 9 Kyande alwaghile, ɨkʉvakemeela avamanyaani na vabadɨngʼhani vaake, na kʉkʉvavʉʉla kuuti, ‘Mʉhovokaghe palɨkɨmo nuune, ʉlwakʉva ʉlʉtalama lwango lʉno lʉkasovile, nɨlwaghile!’

10 “Nɨkʉvavʉʉla kuuti, enendɨɨkɨ ʉNgʉlʉve iliiva nʉ lʉkeelo pamaaso gha vanyamhola vaake, pano nambe ʉmhosi jʉmo ilaata inyɨvi saake.”

Ɨkɨhwanɨkɨsio ɨkya nhaata ʉnya lʉsʉngʉ ʉlʉvaha

11 ɄYesu akavavʉʉla ɨkɨhwanɨkɨsio ɨkɨngɨ akati, “Kwealyale ʉmuunhu jʉmonga, jʉno alyale na vaswambe vavɨlɨ. 12 Ʉnswambe ʉnʼdebe, akalʉta kwa viise akati, ‘Ghwe nhaata, nisʉʉma ʉmheele ʉvʉhaasi vwango.’ Pe ʉviise akavaghavɨla, nʉjʉnge ʉvʉhaasi vwake.

13 “Ye fikilile ifighono ndafilɨngi, ʉnʼdebe jʉla akakongʼhania ifiinu fyake fyoni, akavʉʉka ilʉta kʉ ɨɨsi ɨja kʉ vʉtali. Ye afikile ʉkuo, akatengʉla kulia fivi ɨkyʉma kyake, kuhanga kumala kyoni. 14 Ye amalile kyoni, ɨnjala jɨkaghua mʉ ɨɨsi jɨla, pe ʉmwene akava nsila nambe kɨmonga. 15 Pepano, akalʉta kwa muunhu jʉmonga ʉghwa ɨɨsi jɨla, akasʉʉma ɨkɨbalʉla. Ʉmuunhu jʉla, akantwala kʉ mʉghʉnda kusuvila ingʉbe saake. 16 Ʉnʼdɨɨmi jʉla alyale nɨ njala, akanoghelwagha kulia amabandu ghano sikalisagha ingʉbe. Neke nakwealyale nambe muunhu, jʉno alyampeliile kɨmonga ɨkya kʉlia.

17 “Pambele akasaagha mʉ mwojo ghwake akati, ‘Ongo avavombi vooni ava nhaata ghwango, vilia na kusighasia, kɨki ʉne nifua apa nɨ njala! 18 Lɨno, nigomoka kwa nhaata, na kʉkʉmʼbʉʉla kuuti, “Ghwe nhaata, nɨmhokile ʉNgʉlʉve, nɨkʉhokile na jʉʉve. 19 Lɨno, nanɨnoghiile kuuva mwana ghwako, ʉmbɨɨke nɨɨve ʉmo mʉ vavombi vaako.” ’

20 “Pe akavʉʉka igomoka kwa viise. Ye alɨ piipi na pa kaaja, ʉviise akamwagha pa vʉtali, akamʼbonela ɨkɨsa. Akalʉta lʉvɨlo, akamʉyayɨla na kʉkʉnnonela. 21 Pe ʉmwana jʉla, akamʼbʉʉla ʉviise akati, ‘Ghwe nhaata, nɨmhokile ʉNgʉlʉve, nɨkʉhokile na jʉʉve. Nanɨnoghiile kuuva mwana ghwako.’

22 “Neke ʉviise akavavʉʉla avavombi vaake akati, ‘Mʉleete ngʼhaningʼhaani ʉmwenda ʉnnono mʉmfwasie. Mʉmfwasie nɨ pete mʉ kyove, ni filatu mʉ maghʉlʉ. 23 Mʉtoole ɨngʼombe jɨla ɨnenefu, mʉbude, tʉvɨɨke ɨkɨkulukulu, 24 ʉlwakʉva ʉmwanango ʉjʉ, alyasovile, lɨno avoniike; alyafwile, lɨno asyʉkile!’ Pepano avaanhu vala vooni vakatengʉla kuseeja nʉ lʉkeelo.

25 “Ʉnsiki ʉghuo, ʉmwanaake ʉmʼbaha alyale kʉ mʉghʉnda. Ye igomoka alɨ piipi nɨ nyumba, akapʉlɨka avaanhu vikwɨmba na kuseeja. 26 Akankemeela ʉmʼbombi jʉmonga, akamposia akati, ‘Kʉlɨ kɨki?’ 27 Akamʼbʉʉla akati, ‘Ʉnnunaavo isile, neke ʉnhaata ghwako amʼbudiile ɨngʼombe jɨla ɨnenefu, ʉlwakʉva amwaghile ʉmwana ghwake ajiighe mwʉmi, kange nkafu.’ 28 Ʉmwana ʉmʼbaha jʉla akakalala, akasiita kukwingila mʉ nyumba. Pe ʉviise akahʉma kʉnji, akatengʉla pikʉmpelepesia ingile. 29 Neke ʉmwene akamwamʉla ʉviise akati, ‘Pʉlɨkɨsia! Amaaka ghooni agha nɨvombile ɨmbombo pa kaaja apa, kange nanɨghelile nambe kɨghono kɨmo kupunia sino ʉkʉndaghɨla! Neke ʉne nʉmheliile nambe kapene, kuuti nɨhovoke palɨkɨmo na vamanyaani vango. 30 Looli pano isile ʉmwana ghwako ʉjʉ, jʉno aliile fivi ɨkyʉma kyako palɨkɨmo na vaghendamwalu, ʉmʼbudiile ɨngʼombe ɨnenefu!’

31 “Ʉviise akamʼbʉʉla akati, ‘Mwanango, ʉve ʉlɨ nuune ifighono fyoni, ifiinu fyoni fino nɨlɨ nafyo fyako. 32 Lɨno, tʉnoghiile kuhovoka na kuvɨɨka ɨkɨkulukulu, ʉlwakʉva ʉnnunaavo alyasovile, lɨno avoniike; alyafwile, lɨno mwʉmi!’ ”