Malɨka 10

Ʉlʉfingo ʉlwa vʉtolani

(Mataayi 19:1-12; Lʉʉka 16:18)

ɄYesu akavʉʉka ilʉta kʉ kɨghavo ɨkya Yudea, kukilila ɨmwambo ɨja kɨkogha kya Yolidani. Amapʉgha gha vaanhu ghakava ghilʉta kange kwa mwene, pe akavavʉlanɨsyagha ndavʉle lwale lwiho lwake. 2 Pepano aVafalisayi vamonga vakalʉta kʉkʉmʉghela, vakamposia vakati, “Asi, lukwɨtɨkɨsɨvua mʉ ndaghɨlo siitu ʉmʉghoosi kʉkʉntavʉla ʉnʼdala ghwake?” 3 ɄYesu akavaposia akati, “ɄMoose alyavalaghiile kɨki?” 4 Vakamwamʉla vakati, “ɄMoose alyɨtɨkisie kulemba ɨkalata ɨja kʉtavʉla ʉnʼdala na kʉkʉmʉleka.”

5 ɄYesu akavavʉʉla akati, “ɄMoose alyavalembiile ʉlʉlaghɨlo ʉluo, ʉlwakʉva namupʉlɨka mʉ sino muvʉlanɨsɨvua. 6 Kuhʉma ʉNgʉlʉve ipela ɨɨsi, ‘Alyapelile ʉmʉghoosi nʉ nʼdala.’ 7 ‘Mʉ ʉluo, ʉmuunhu ɨkʉmʉleka ʉviise nʉ ngʼina, neke ivisagha nʉ nʼdala ghwake, 8 vavɨlɨ ava viiva mʼbɨlɨ ghʉmo.’ Apuo naviiva vavɨlɨ kange, looli viiva mʼbɨlɨ ghʉmo. 9 Lɨno, kɨno ʉNgʉlʉve alʉngile, ʉmuunhu naangalekanɨsyaghe.”

10 Ye vingiile kange mʉ nyumba, avavʉlanɨsɨvua vaake vakamposia ɨmhola ɨja lɨsio ɨlio. 11 ɄYesu akavamʉla akati, “Ʉmuunhu ghweni jʉno itavʉla ʉnʼdala na kutoola ʉjʉnge, iiva mʼbwafu amhokile ʉnʼdala ghwake ʉntasi. 12 Ghwope ʉnʼdala angamʉleke ʉmʉghoosi na kutolua kwa jʉnge, ghwope iiva mʼbwafu.”

ɄYesu ɨkʉvafuunya avaana avadebe

(Mataayi 19:13-15; Lʉʉka 18:15-17)

13 Avaanhu vakamʉletela ʉYesu avaana avadebe avabasie kuuti avafuunye, neke avavʉlanɨsɨvua vaake vakavadalɨkɨla avaanhu vala. 14 ɄYesu ye alʉvwene ʉluo, akakalala, akavavʉʉla avavʉlanɨsɨvua vaake akati, “Mʉvaleke avaana avadebe visaghe kʉlyʉne, namʉngavasighaghe, ʉlwakʉva ʉVʉtwa vwa Ngʉlʉve vwa vaanhu vano valɨ ndavʉle avaana ava. 15 Kyangʼhaani nɨkʉvavʉʉla niiti, ʉmuunhu ghweni jʉno naɨkʉmwɨtɨka ʉNgʉlʉve ndavʉle ʉmwana ʉnʼdebe, naalingila mʉ Vʉtwa vwa Ngʉlʉve.” 16 Pe akava ɨkʉvaghumbatɨla avaana vala, akavɨɨka amavoko ghaake pa veene kʉkʉvafuunya.

Ʉlʉtalamu ʉlwa mmofu kukwingila mʉ Vʉtwa vwa Ngʉlʉve

(Mataayi 19:16-30; Lʉʉka 18:18-30)

17 ɄYesu ye ivʉʉka ilʉta, ʉmuunhu jʉmonga akiisa lʉvɨlo, akafughama pa mwene, akamposia akati, “Ghwe Mʼbʉlanɨsi ghwe nnofu, nɨvombe kɨki neke nɨɨve nʉ vwʉmi ʉvwa kʉvʉsila kʉsila?” 18 ɄYesu akamwamʉla akati, “Kɨki kʉkʉnhambʉla kuuti nɨlɨ nnofu? Nakwale ʉnnofu, looli jʉ Ngʉlʉve mwene. 19 Ʉsimanyile indaghɨlo isa Ngʉlʉve: ‘Nʉngabudaghe, nʉngavwafukaghe, nʉngahɨjaghe, nʉngolekaghe isa vʉdesi, nʉngasyangaghe, ʉmwoghopaghe ʉvaaso nʉ mamaajo.’ ” 20 Ʉmuunhu jʉla akamwamʉla akati, “Mʼbʉlanɨsi, isio sooni nɨsigadɨliile kuhʉma ʉvwana vwango.”

21 ɄYesu akamʉlola, akamʉghana, akamʼbʉʉla akati, “Ghwaghilue ɨkɨɨnu kɨmo. Ʉlʉte ʉghʉsie fyoni fino ʉlɨ nafyo, neke indalama sino ʉpatile ʉvapeele avakotofu. Apuo pe ghuuva nɨ kyʉma kʉkyanya. Pepano ghwisaghe ʉmbɨngɨlɨlaghe.” 22 Ʉmuunhu jʉla ye apʉliike isio, akiluka kʉ maaso, akavʉʉka asukuniile, ʉlwakʉva alyale nɨ kyʉma kinga.

23 ɄYesu akalola imbale sooni, akavavʉʉla avavʉlanɨsɨvua vaake akati, “Lʉtalamu kyongo avanya kyʉma kukwingila mʉ Vʉtwa vwa Ngʉlʉve!” 24 Avavʉlanɨsɨvua vakadegha amasio ghaake. ɄYesu akavavʉʉla kange akati, “Vanango, lʉtalamu kyongo kukwingila kʉ Vʉtwa vwa Ngʉlʉve! 25 Kɨhʉʉgʉ ɨngamɨla pikila pa kalyoli ka honelo, kukila ʉmmofu kukwingila mʉ Vʉtwa vwa Ngʉlʉve.”

26 Avavʉlanɨsɨvua vaake vakadegha kyongo, vakiposania vakati, “Pe veeni lɨno jʉno anoghiile kupokua?” 27 ɄYesu akavalola, akati, “Kʉ vaanhu lʉtalamu, neke kwa Ngʉlʉve sooni sivombeka.”

28 ɄPeteli akamʼbʉʉla akati, “Lola, ʉsue tʉfilekile fyoni, tʉkʉkʉvɨngɨlɨla ʉve.” 29 ɄYesu akati, “Kyangʼhaani nɨkʉvavʉʉla, ʉmuunhu jʉno ajɨlekile ɨnyumba, nambe avanine, nambe avalʉmbʉ, nambe ʉngʼina, nambe ʉviise, nambe avaana, nambe amaghʉnda vwɨmɨla ʉne nɨ Mhola ɨNofu, 30 ʉjuo mʉ masiki agha ipelua finga kukila fino afilekile. Ipelua ɨnyumba, avanine, avalʉmbʉ, nʉ ngʼina na vaana na maghʉnda. Nasi mhumuko sikʉmwaghagha. Kange, ʉnsiki ghʉno ghukwisa, alapelua ʉvwʉmi ʉvwa kʉvʉsila kʉsila. 31 Neke vinga vano va kwanda valaava va vʉsililo, ava vʉsililo valaava va kwanda.”

ɄYesu ijova ʉlwa vʉtatu ɨmhola ɨja kʉfua na kusyʉka kwa mwene

(Mataayi 20:17-19; Lʉʉka 18:31-34)

32 ɄYesu na vavʉlanɨsɨvua vaake valyale mʉ sɨla vifilʉta kʉ Yelusalemu. ɄYesu akava ɨkʉvalongolela. Avavʉlanɨsɨvua vaake vakadegha, nava vaanhu vano vakavɨngɨsaniagha vakoghopa. Pepano ʉYesu akavatoola kange vala kɨjigho na vavɨlɨ, akalʉta navoope palʉbale, akatengʉla pikʉvavʉʉla sino kyaivombelua. 33 Akati, “Lolagha, tulʉta kʉ Yelusalemu, ʉkuo ʉne ne Mwana ghwa Muunhu nilʉta kukwohelua kʉ vavaha va vatekesi na vavʉlanɨsi va ndaghɨlo. Aveene kyavikʉhɨgha kuuti nɨbudue. Kange, kyavikʉmbɨɨka mʉ mavoko gha vano naVayahudi, 34 voope vikʉnyovelelagha, vikʉfunyilagha amati, vikʉngʼhopagha ni mijeledi na kʉkʉmbuda. Neke ɨkɨghono ɨkya vʉtatu nisyʉka.”

Ʉlʉsʉʉmo lwa Yakovo nʉ Yohani

(Mataayi 20:20-28)

35 Pepano avakina Sebedaayi ʉYakovo nʉ Yohani, vakalʉta kwa Yesu vakati, “Mʼbʉlanɨsi, tusʉʉma ʉtʉvombele lʉno tulonda.” 36 ɄYesu akavaposia akati, “Mulonda nɨvavombele kɨki?” 37 Vakamwamʉla vakati, “Ghuliiva ghutema mʉ vʉvaha vwako, tusʉʉma na jʉsue tʉvisaghe nuuve, jʉmo ikale ʉlʉbale lwako ʉlwa kʉndio, ʉjʉnge ʉlwa kʉngʼhɨghɨ.”

38 ɄYesu akavavʉʉla akati, “Namʉkagwile lʉno musʉʉma. Ndepoonu mutavwile kupumuka ʉlʉpumuko lʉno nipumuka, nambe kukwofughua ʉlwofugho ʉlwa vʉfue lʉno nikwofughua ʉne?”

39 Vakamwamʉla vakati, “Eena, tʉnoghiile.” ɄYesu akavavʉʉla akati, “Ɨsɨla ɨja lʉpumuko jɨno nikilila ʉne kyamukilila, na kukwofughua ʉlwofugho ʉlwa vʉfue lʉno nikwofughua ʉne. 40 Neke kʉkʉvapeela kuuva nuune mʉ vʉvaha vwango, jʉmo kʉndio ʉjʉnge kʉngʼhɨghɨ kʉlyʉne, navʉtavʉlɨlua vwango. Looli ʉNhaata ghwango ghwe jʉno alavapeela vano avalɨngʼhanɨkisie ngʼhaani.”

41 Avavʉlanɨsɨvua avange kɨjigho ye vapʉliike isio, vakatengʉla kʉkʉnkalalɨla ʉYakovo nʉ Yohani. 42 Pepano ʉYesu akavakemeela vooni, akavavʉʉla akati, “Mʉkagwile kuuti, avatwa va ɨɨsi vitema avaanhu vaave ni ngʉfu. Kange, vihʉfia ingʉfu isa vʉtavʉlɨlua vwave kʉ vavanda, neke vavakʉndaghe mʉ sooni. 43 Neke kʉlyʉmue nafye lʉngavisaghe. Looli ʉmuunhu jʉno ilonda kuuva mʼbaha mʉlyʉmue, ʉjuo avisaghe mʼbombi ghwinu. 44 Najʉ muunhu jʉno ilonda kuuva mʉlongosi, avisaghe nkami ghwa vooni. 45 Na jʉʉne ne Mwana ghwa Muunhu nanɨlisile kuvombelua, looli nɨlisile kʉkʉvavombela avange na kuhʉmia ʉvwʉmi vwango kuuti nɨvavange vinga.”

ɄYesu ɨkʉnsosia ʉmʼbofu ʉBatimaayo

(Mataayi 20:29-34; Lʉʉka 18:35-43)

46 Pepano ʉYesu na vavʉlanɨsɨvua vaake vakafika mʉ lɨkaaja ɨlya Yeliko. Pambele ye vihʉma palɨkɨmo nɨ lɨpʉgha lya vaanhu mʉ lɨkaaja ɨlio, vakamwagha ʉmʼbofu jʉmonga jʉno akatambʉlwagha Batimaayo, alyale mwana ghwa Timaayo. Ʉmʼbofu ʉjuo akasʉmagha ifiinu. Ɨkɨghono ɨkio, alikalile palʉbale pa sɨla. 47 Ye apʉliike kuuti ghwe Yesu ʉMʉnasaleti ikila mʉ sɨla jɨla, akatengʉla pikemeela fiijo iiti, “Ghwe Yesu Mwana ghwa Davɨdi, ʉsʉngʉkɨle!” 48 Avaanhu vinga vakava vikʉnʼdalɨkɨla na kʉkʉmʼbʉʉla kuuti ajike, neke ʉmwene akaghina kukemeela fiijo iiti, “Ghwe Mwana ghwa Davɨdi, ʉsʉngʉkɨle!”

49 ɄYesu akɨɨma akati, “Mʉnkemeele.” Vakankemeela ʉmʼbofu jʉla vakati, “Ghukangasyaghe, ɨma, ɨkʉkʉkemeela.” 50 Pepano akataagha ʉmwenda ghwake, akɨɨma ngʼhaningʼhaani ilʉta kwa Yesu. 51 ɄYesu akamposia akati, “Ghulonda nɨkʉvombele kɨki?” Ʉmʼbofu jʉla akati, “Mʼbʉlanɨsi, nilonda nɨlolaghe.” 52 ɄYesu akamʼbʉʉla akati, “Lʉtagha, ʉsokile vwɨmɨla ʉlwɨtɨko lwako.” Ʉnsiki ghʉghuo ʉmʼbofu jʉla ye akalolagha, akamʼbɨngɨlɨla ʉYesu mʉ sɨla.