योहानाअ बीहरों कागलों
1
सालामाअ गोठ
1 आंय, वोळीलुंअ वोळील योहान, पोरमेहेरांय पोसोंद केअला मोंडोळामेर्याअ तुमनेंह बादाहांन ईं कागलों लेखुंह।
तुमाहांपेअ आंय हाची रीते माया राखुंह! आंय एखलोज तुमाहांपेअ माया राखुंह एंहकींअ नांह, पेन ईसु ख्रीस्तुंह हीकवुअली हाची गोठ जांअनारें आने माननारें बादें बी तुमाहांपेअ माया राखतेंह! 2 आपुंह बादें पोरमेहेराअ हाची गोठ मानतेंह, आने ते आपुंह कायोम मानतें रीहुं!
3 पोरमेहेर बाहको आने ईसु ख्रीस्त, जो ईया पोरमेहेर बाहकाअ पोयरो हाय तो, ते बेनुं आपुंहपेअ मेरबानी आने दाया केअता रीअ, आने आपनेंह सांती देता रीअ। काहाका, आपुंह तीयाहांपेअ माया राखतेंह आने तीयाहांअ हाची गोठ मानतेंह।
हाची गोठी पोरमाणे एक-बीहरापेअ माया राखा!
4 तुमाहांमेनेअ थोळेंक मांहेंअ पोरमेहेराअ हाची गोठीहींअ पोरमाणे वोरतुअतेंह तों जांयन आंय खुब खुस हाय। जेंहकींअ वोरतांअ पोरमेहेर बाहकांय आपनेंह हुकोम केअयोह, तेंहकींअज तुमां वोरतुअतेंह।
5 आने आमी मोंडोळामेर्याअ मेरालाहां, तुमां कायक केरा एंहडी आंय ओरुज कीअहुं। तुमां कायक नोवों काम केरा एंहडो हुकोम केरांअ खातुर आंय ईं नांह लेखतो। पेन उलटों, पोरमेहेराअ हाची गोठ मानांअ आपुंह चालु केअलों तांहांअ तीयांय आपनेंह जों केरांअ हुकोम केअलो, तों तुमां केअतें रा एंहडो हुकोम केरांअ आंय ईं लेखुंह। तीयांय जो हुकोम केअलो तो ता ओ हाय का, आपुंह एक-बीहरापेअ माया राखजी! 6 पोरमेहेर आपनेंह जे हुकोम देहे तीयाहांअ पोरमाणे जांहांअ आपुंह चालजी तांहांअज आपुंह आखी सेकजी का, आपुंह पोरमेहेरापेअ खोरेखोर माया राखतेंह। पोरमेहेराअ हाची गोठ मानांअ चालु केअलों तांहांअ तुमां ईंज उनाअलें।
7 बीहराहांन ठोगनारा खुब लोक तुमांअ मोंडोळामनेअ नींगीन आमी तुमांअ वीस्ताराअ बीहरा लोकाहीं म फेलाय गीयाह। “ईसु ख्रीस्त मांहुंअ बोंण्यो” एंहकींअ नांय माननारा लोक एज हाय। बीहरा लोकाहांन ठोगनारा आने ख्रीस्तुअ बाबोताम आपुंह जों हीकवुअताह तीयाअ वीरुद केअनारा बी एज लोक हाय। 8 तीयाअ लीदे, ए गुरु लोक तुमनेंह नांय ठोगे तीयाअ कालजी राखजा! जो ते तुमनेंह ठोगे ता, जीया ईनामुअ खातुर आमां तुमांअरी मीलीन मेहनोत केअताह, तों ईनाम तुमां गोमावी दीहा, आने पोरमेहेराअरी कायोमाअ खातुर जोळाअलें रांअ तों पुरों ईनाम तुमनेंह नांय मीले। 9 जों केडों बी ख्रीस्तुंह देदला बोदा ल बोदली टाकेह आने ख्रीस्तुंह देदलो बोद मानतों नांह रेतों ता, तों मांहुंअ पोरमेहेराअरी जोळाअलों नांह रेतों एंहकींअ मानुलोंअ। पेन जों केडों बी ख्रीस्तुंह देदलो बोद मानतों रेहे ता, तों मांहुंअ पोरमेहेर बाहकाअरी आने तीयाअ पोयराअरी जोळाअलों रेहे एंहकींअ मानुलोंअ। 10 ख्रीस्तुंह जों हीकवुअलों तों नांय, पेन बीहरों हीकवुअनारों केडों बी तुमांअहीं आवे ता, तीयाल तुमांअ पोंगाहांम मां आवकारतें! आने केल्ली बी रीते तीयाल सालाम दीईन तीयाल उफ बी मां देतें! 11 ईत राखजा का, जो तुमां तीयाअरी खास सोबोंद राखाह ता, तों जों खाराब काम केअहे तीयाअ खातुर पोरमेहेर तीयाअ आरी-आरी तुमनेंह बी सीक्सा कीअ।
खानगी नोंद
12 आंय तुमनेंह आजी वादारे आखांअ मागुंह तेबी, कागलाम तों नांय लेखुलोंअ एंहडों मांयुं नोक्की केअयोंह। पेन, आंय तुमांअहीं माहरीज आवीन उरु-बुरु गोठ्या केरांअ आस्या राखुंह। तांहांअ आपुंह आरी मीलीन पुरी रीते खुस वीअहुं! 13 पोरमेहेरांय पोसोंद केअलें ईंहींर्येंअ ख्रीस्ती पावुह-बोंअयांह तुमनेंह सालाम देतेंह।