2
1 તીંહીંઅ લીદો, માંયોં માંઅ જીવોમ એંહડો નોકકી કોઅનો , “માંય ફાચુ તુમાંઅહીં આવીન ઓનો કોળોક રીતો આખીન તુમહાંન દુખી નેંય કોઓં.” 2 કાંહાંનકા, જો માંય તુમાંઅહીં ફાચુ આવીન તુમહાંન દુખી કોઅતુ તા, માંન ખુસ કોએ એંહડો કોડો બી નેંય વેતો. કેવકા, તેંહડામ તુમું બાદેજ દુખી વેતે કને? 3 તીંહીંઅ લીદો, તુમાંઅહીં આવાઅન બોદલો માંયોં તુમાંપોઅ આગલો કાગોલ લેખનો, ઈંહીંઅ ખાતોર કા, તુમહાં જો ખોટો કોઅયોહ તીંહીંઅ માટો તુમહાંન દુખ વેય, ઓનો હાતીઅ માંય આવોં તેંહડામ જીંયહાંપોઅ રેખ માંન ખુસી મીલનુંઅ જોજવે, તીંયહાંપોઅ રેખ, એટલે કા, તુમાંપોઅ રેખ માંન દુખ નેંય મીલે. માંન ખાતરી આથી કા, માંયોં તુમહાંન જો કોઆંન તીયો કાગોલોમ લેખનો, તેવુજ તુમું કોઅહા ઓનો તાંહાંઅ માંય બી ખુસ વેહીં ઓનો તુમું બી ખુસ વેહા. 4 માંયોં ભારી દુખી વેયન, નો તોતલુઅતો જીવો ઓનો રોળતા-રોળતા તુમહાંન તો કાગોલ લેખનો. તો કાગોલ માંયોં તુમહાંન દુખી કોઆંન માટો નોખો લેખ્યો, પોન માંય તુમહાં બાદહાંપોઅ કોત્તી બાદી માયા રાખોંહ તો તુમું જાંઆ, તીંહીંઅ માટોજ લેખનો.
પાવુલોઅ વીરુદ ખોટો કોઅનારાન માફી આપાઅન બાબોતોમ
5 આમુ માંય, જીયા ખોટો કોઅયોહ ઓનો આય બાદો દુખ પાળ્યોહ, તીયાઅ બાબોતોમ લેખાઅન માગોંહ. તીયા માંન એખનાન નેંય, પોન તુમહાંન બાદહાંન બી દુખ પાળ્યોહ, ઓનો તુમહાં બાદહાંપોઅ તીંહીંઅ થોળી-ઘોણી ઓસોર પોળીહ. (માંય થોળી-ઘોણી ઈંહીંઅ ખાતોર આખોંહ, તીયો ગોઠીન માંય વાદવાઅન નાંહ માગતુ.) 6 તેબી, તો માંહુંઅ તીયા કોઅન્યો ખોટાયોઅ લીદો દુખી વેયોહ તીંહીંઅ લીદો, તીયાન તુમહાં વેઅનો ઘોણહાં મીલીન જે સીકસા કોઅયીહ તોતીહ પુરતી આહાય. 7 એટલે, આમુ તા તુમાંઅ તીયાન માફી આપીન, આરી-આરી તીયાન ઉફ બી આપનુંઅ જોજવે. નેતા, કોદાચ તો ભારી દુખી વેઈ, ઓનો કોદાચ તો એવ વીચારીઅ કા, તુમું તીયાન કોય દીહ બી માફ નાંહ કોઅનારે. 8 તીંહીંઅ લીદો, માંય તુમહાંન કાલાવાલા કોઓંહ કા, તુમું તીયાન માફી આપીન ઓનો તુમાંઅ સોંગોતોમ તીયાન ફાચુ હાદી નેયન, તીયાન ફાચી ખાતરી કોઆવી આપા કા, તુમું ખોરેખોર તીયાપોઅ માયા રાખતેહ.
9 તુમાંઅ ખાસ ખોબરી તોરીકો માંન માનીન તુમું બાદયો બાબોતહીંમ માંઅ આખ્યા પોરમાણો ચાનતેહ કા નાંહ તો પારખાઅનુંજ, માંયોં તો કાગોલ લેખનો. 10 તીંહીંઅ લીદો, જેવ તુમહાં પેલ્લાઅ માંઅ સાલાહ માનની તેવુજ આમુ બી માંઅ સાલાહ માનીન, તીયો માંહાંઅન માફી આપા. ઈયો માંહાંઅન જેંહડામ તુમું માફી આપતેહ, તેંહડામ માંય બી તીયાન માફી આપોંહ. તીયા માંઅ વીરુદ જો ખોટો કોઅયોહ, તેજ ખાસ બાબોત આહાય એવ માંન નાંહ લાગતો. (જો માફ કોઆંન જેંહડો વેય તા, માંયોં તીયાન, ખ્રીસ્તોન માથો રાખીન તુમાંઅ હારાઅ માટો માફ કોઈ દેદોહ), 11 ઈંહીંઅ ખાતોર કા, ઈયો સોંજોગોન આજી વાદારુ ખારાબ કોઈન, સેતાન આપોપોઅ જીત નેંય મેલવે. કેવકા, સેતાન કોંહડયા-કોંહડયા મુસીબોતી આપહોંમ પેદા કોએહ, તીંહીંઅ આપહોંન ખોબોરુજ આહાય.
તુરોવા સેરોમ પાવુલોઅ ટુકી મુલાકાત
12 એફેસુ સેરોમ રેખ તુમહાંન કાગોલ લેખનો હાતીઅ માંયોં જો-જો કોઅનો, તીંહીંઅ ગોઠ આમુ માંય ચાલુ રાખોંહ: ખ્રીસ્તોઅ બાબોતોઅ હારી ગોઠ જાહેર કોઆંન માટો માંય તુરોવા સેર પોચ્યુ તેંહડામ માંન ખોબોર પોળી કા, તાંહીં તો કામ કોઆંન માટો માલીખો માંન હારી તોક પુરી પાળીહ. 13 પોન માંઅ મોનોમ ભારી ઉચાટ આથુ. કાંહાંનકા, માંઅ મેરાલુ પાવોહ તીતુ તુમાંઅ ખોબોર નેયન તાંહીં નોખુ આલુ. તીંહીંઅ લીદો, તાંહીંરોઅ વીસવાસી લોકહોંપોઅ રાજાય માગીન, માંય તીયાન હોદુ માકેદોનીયા રાજોમ ગોયુ.
ખોટાયોઅ તાકોતોપોઅ ખ્રીસ્તો મેલવુઅન્યો જીતોમ ખ્રીસ્તોઅ ખોબર્યોહોંઅ ભાગ