Sura ni Suro
Yohane
anu karombelana
Tabea
1
1 Sura ei lako si aku Tomana nu topepotuu si Pue Ala, kupakatu si Tina anu napelisi ni Pue Ala, ai i ope-ope sira anamu anu kupokaasi mpuu. Baria aku ngkida anu mampokaasi komi, agaiana sira mbui ope-ope tau anu manginsani patudu anu mamonso mampokaasi komi. 2 Lawi i Pue Ala ria i rarata ai simbela-mbela ai kita duduuna kasae-saeana.3 I Pue Ala Tuamata ai i Yesu Kerisitu AnaNa mowati kita lako i kabula nu raraNa, motudoka kita asiNa, mpane mokiraka kita kalompe nu katuwu. Pesarumakaku bona ope-ope etu ria si kita i rara nu kabulana rarata ai kamaasita.
Inee nipawia pepotuumi si Kerisitu
4 Matono mpuu raraku lawi ria sira basangkia anamu, babeiara mangula patudu anu mamonso, ewa anu naparentaika kita ni Pue Ala Tuamata. 5 Mewali, kuperade si iko tina, bona mombepokaasi kita sadua ai sadua. Anu kuuki ei, baria parenta anu bou. Sawaa ei iamo parenta anu taepemo lako ni mpolinguruna. 6 Eimo anu rauli asi: mampeulai kita parenta ni Pue Ala. Mpane parentaNa anu niepe lako ni mpolinguruna ei: sangangaa mombepokaasi kita.
7 I sumalele dunia ria mawori topeakalangi anu mangkeni patudu anu mepakawuli. Baria sira mampotuu ka i Yesu Kerisituna anu maimo i dunia mewali manusia. Tau anu ewa etu, topodongko sira ai iwali ni Kerisitu sira. 8 Etumo mpane sangangaa mainga-inga komi, lawi ane nipawia pepotuumi si Pue Yesu, baria ria bunduna pobagoki mobambari Ngkora Magali si komi. Sangangaa mepotuu liliu komi si Pue, bona i eo pobotusi kasopoa dunia ina nisumba sinangka surungina pepotuumi.
9 Ope-ope tau anu mandoa dala ntani lako i patudu anu mamonso ai baria sira mangula patudu ni Kerisitu, tau aretu baria sira mosintuwu ai i Pue Ala. Tau anu mangula liliu patudu ni Kerisitu, siramo anu mosintuwu ai i Pue Ala Tuamata ai i Yesu AnaNa. 10 Mewali, ane ria tau anu dongka i boeami anu mangkeni patudu anu mosisala ai patudu ei, inee sira nikambaroka ba nidoko i rara nu tombimi. 11 Lawi ima ngkida anu modoko sira, tau aretu mbui mobabei sira babeiara anu madaa etu.
Kasopoa lolita
12 Maisi mpuu anu kupenoka kupadongkaka komi, agaiana baria kuposondoka ane wule mesurai ngkida aku. Lawi tunggaiaku ina lau komi kusondaki, mpane ope-ope etu ina kupadongkaka komi, bona maruminsi kamatonona rarata.
13 Maisi tabea dongka si iko tina, lako i ope-ope ana nu pokamu anu napelisi ni Pue Ala.