Piɛr hǝ̃ǝ̃lnãw 3

Yesu jol'n bǝ̃ǝ̃'n cɔ̃mmã

Mã́ã cituubii ɲimãã, mǝ̃̀ yal mǝ̃̀ sɛbɛba hǝ̃ǝ̃lnã wɩ̀-i nnĩĩ nã mǝ̃̀ hã-ɲã́ã̀.

Gɩ̀ sɛbɛba hǝ̃ǝ̃lba min kusunã, mǝ̃̀ caa mǝ̃́ ver ǹ-tu ɲì nã nǝ̃ gɩ̀ ɲin'n cɔ̃mmã, ɲí da ǹ-suro ǹ-hiraa vyanɲã hǝ̃ǝ̃l.

Gùú ji ce ɲì kãnɩmmã́ ba kãnɩmfɩnfammã gɩ̀ ɲinɲã nã.

2 Ɲi da ǹ-ba ɲì kãnãã Dũnnũ tanhiilaaba mãã wùu hiil-ba bà dǝ, bà cãwanĩɛ̃ga nã, nã̀ã ba ɲì kãnãã Yitiiw mãã Kortiiw wù tĩɛ̃taabà kállá-ɲã́ã̀ nǝ̃ wù hlũũ'n nǝ̃ǝ̃lii mãã.

3 Ɲi mãã ɲì saa ɲí fǝ̃ǝ̃ dìí mãã dɩ́ kaalaa ɲì yunɲã nã, dɩ̀-i nnĩĩ: fǝ̃́ǝ̃lã̀ wà cuu tãl'n bǝ̃ǝ̃gu, cwaadaabà ji suro ǹ-ba bà duu bà yisɩnã cɔ̃mbɩblammã nã, nã̀ã ba bà hiil ɲì kwãmmã nã.

4 Bà ji ba bà waa wà: «Wù sáa wùu wa wu ga ver ǹ-jo-ì?

Wɩ̀-i haa-ì?

Yì tǝbà jáa kurǝǝ, nǝ̃ wù sǝ wùu hi ǹ-ver ǹ-jo, cuuw nǝ̃ wù tantammã nã-i, kuu'n sáa ver wù nã.»

5 Gɩ̀ tuutaabà sǝ̃n hũɔ̃ ǹ-hiraa dɩ̀ nã wà Dũnnũ nǝ̃́ǝ̃lã́ drɔkuɔli nǝ̃ ɲũũrũũgu nǝ̃ wù cãwan-i.

Wù híilá hlɔ̃mmã hũm nã-i, nã̀ã fǝ̃ǝ̃ ǹ-tɩgɩnǝ̃ǝ̃ mã nã ǹ-ce ɲũũrũũkuɔli nǝ̃-mã.

6 Haasǝgu, Dũnnũ nṹɔ̃́ dɔkɩnkandi gùú nã mãã, gùú hũmmãã júó ǹ-ji suu cuuw nã ǹ-guu wù nã.

7 Nǝ̃ yindiɛ yo, gɩ̀-lǝ gùú Dũnnũ cãwandɩ dɩndɩ-i dìi blǝ drɔkuɔli nǝ̃ ɲũũrũũgu ǹ-kra ǹ-ba dɩ̀ fennãã dǝ̃ǝ̃mã nã.

Gɩ̀-lǝ gùú yuugɩ-i Dũnnũẁ ji jar cuu sugolli, nã̀ã guu bàá mãã bà sǝ̃n nɔ̃ bà hã-yǝ, bà nã.

8 Nǝ̃ mã́ã cituubii ɲimãã, gɩ̀ saa ɲí fǝ̃ǝ̃ dɩdarǝ: yuugɩ dɩn gɩ́ nǝ̃ nã́ã́ bii tonnũɔ̃sɔ̃ trãngwaahǝ̃ǝ̃l-i Dũnnũẁ saa, nǝ̃ bii tonnũɔ̃sɔ̃ trãngwaahǝ̃ǝ̃lẁ ba nã́ã́ yuugɩ dɩn-i wù saa.

9 Dũnnũẁ plã wù nũɔ̃gu dìí nã mãã, wù síì hǝ̃ǝ̃sǝ nã̀ã ce-dǝ.

Cwaadaabà ne wà Dũnnũw sɩrĩɛ̃.

Dìí sǝ, wú nǝ̃ wùu fɛ̃ wù hiɛga yì yiɛgu, yí da ǹ-nǝ̃nǝ̃ǝ̃ nã̀ã tuu ǹ-tu, curo'n báa ji guu nã.

10 Yitii'n jol'n yuugɩ̀ ji tugulǝǝ yì nã nã́ã́ ŋmãllĩĩw mãã wù tugulǝǝ cwaaba nã nĩĩgu.

Gɩ̀-lǝ gɩ̀ yuugu, drɔkuɔlɩ ji du nǝ̃ fãngããgu nã̀ã vaalaa.

Dǝ̃ǝ̃mã̀ ji ye ǹ-gu drɔɲinɲã nã.

Ɲũũrũũɲinɲã min ɲì ji guu nã.

11 Ɲin ɲã́ã́ɲã min ɲì mãã ɲì ji guu nã gɩ̀-lǝ gɩ̀ nã, ɲi saa ɲí fǝ̃ǝ̃ ɲì diicerǝri.

Ɲi saa ɲí ba ɲì wáà yiyalɩmmã nã, nã̀ã ɲǝ̃gãr Dũnnũ cɔ̃mmã nã.

12 Ɲi saa ɲí cii Dũnnũ jol'n yuugu, gɩ́ da ǹ-gǝǝ ǹ-hi kaliɛ.

Gùú yuugɩ-i dǝ̃ǝ̃mã̀ ji guu drɔkuɔlɩ nã, nã̀ã hãnãã drɔɲinɲã nã.

13 Nǝ̃ Dũnnũẁ plã wù nũɔ̃gu nǝ̃-yáà wà wu hã-yáà nǝ̃ drɔkuɔlflããri, nǝ̃ hlɔ̃nflãmmã.

Gɩ̀ sùɔ́gɩ nã, cɔ̃nsũɔ̃lɩm'n dɩn ga ba dàa.

Yi cii dɩ̀-i.

14 Gɩ̀ sùɔ́gɩ nã, mã́ã cituubii ɲimãã, ɲi mãã gùú fennãmmã nã nnĩĩ, gbǝ̃́ǝ̃lã̀ dor'n báa da ɲì nã, yuɔrɔm'n báa da ɲì nã, sɩsɩrãmmã́ ba ɲì hiɛgà nã.

15 Fǝ̃́ǝ̃lã̀ wà Yitiiw nǝ̃ wùu fɛ̃ wù hiɛga hãmĩĩ korɩm'n cɔ̃mmã nã-i.

Yì cituublɩ Polw, wùú yo wù waa gùú gadiindɩ-i nǝ̃-ɲã́ã̀ wù sɛbɛba min kusunã, nǝ̃ cɔ̃nfǝ̃ǝ̃gǝguu mãã Dũnnũẁ hlã-yǝ nǝ̃-gǝ.

16 Wù sɛbɛba min mãã wù yállá-ba, wù bla wu-ń ba wú waa gɩ̀ cɔ̃mmã, wù waa-mã nnĩĩ-i.

Wù sɛbɛba kusunã, gadaagá nìɛ gà fǝ̃ǝ̃mã ca.

Nǝ̃ cwaadaabá nìɛ bàá mãã bà sǝ bàa kal hal ǹ-fǝ̃ǝ̃ kuu Dũnnũ cɔ̃mmã mã, nã̀ã ba bà sǝ bàa mǝ̃gaa ǹ-hiraa mã nã, bà-lǝ ba-ń ce bá ver wù cãwandi kiɛnw.

Bà ce Dũnnũ cãwan'n sɛbɛba dɩgaliɛ yo nnĩĩ-i.

Gɩ̀-lǝ gùú kã́ã̀ nǝ̃-ba bà bǝ̃ǝ̃lǝ̃m'n sùɔ́gɩ nã.

17 Yindiɛ, mã́ã cituubii ɲimãã, mǝ̃̀ gbǝ́ǝ́ ɲì nã ǹ-kra.

Mǝ̃́garà ɲí blǝ ɲì hla nã, bláá ya cobaliɛ'n vuurammã́ gbǝ̃ǝ̃ ɲì nã ǹ-hiil-ɲã́ã̀ ɲì wanhirammã nã Dũnnũ cɔ̃mmã nã.

18 Dũnnũẁ mãã wù níé ɲì yiɛgu, bláà ɲì kã nǝ̃ yiga dìí nã-i nǝ̃ Yitii'n fǝ̃ǝ̃m'n cɔ̃mmã nã, wùú mãã Kortii Yesu Kɩrsaw.

Cwaaba min bá ba bà bũũ wùú dɩn kuɔkuɔgu fuwɔ fɩraa!

Kwaya!