Piɛr hǝ̃ǝ̃lnãw 2

Cokallɛkwasǝnãã'n cɔ̃mmã

Tanhiilaakwasǝnãã yo, bà yáá dàa Isɩrayɛl bluuba sǝ̃ǝ̃nã haasǝgu.

Cokallɛkwasǝnããbaa mãã wà ba waa Dũnnũ cãwan-i, bá nìɛ ɲì sǝ̃ǝ̃nã nĩĩgɩ-i.

Bà ga juo vuuraa ǹ-jãn ɲì sǝ̃ǝ̃nã ǹ-ba bà kal-ɲã́ã̀ nǝ̃ kwasiɛga, gàá mãã gà ji bǝ̃ǝ̃lǝ̃ǝ̃ ɲì nã.

Halle Yitiiẁ mãã wù kórrá ǹ-hiil-ba bà gaacĩɛ̃yaga nã, bà hlárá-yǝ.

Gùú cíé Dũnnũẁ síì hǝ̃ǝ̃sǝ nã̀ã juo guu bà nã.

Dɩ̀-lǝ dɩ̀ hlǝ́rá bàá nã-i.

2 Cocindɩ̀ ji tuu bà nǝ̃ǝ̃li ǹ-ba bà ce circɔ̃mmã.

Bàá ji ce cwaabá ba bà tuuraa Dũnnũ hlũũgɩ nã.

3 Gɩ̀ kwasǝnããbà ji duu dalaa'n caamã nã, nã̀ã ba bà vuu bà dugurǝǝ bà hũɔ̃ ɲì nãkruɔɲinɲã nǝ̃ bà kwasiɛga.

Dũnnũẁ járrá bà sugolli ǹ-hã-ba nǝ̃ bà yuɔrɔmmã ǹ-tã, gɩ̀ hǝ̃́ǝ̃sǝ́.

Wú nàa wù fennãã bà nã, wù ji piir-ba.

Wù síì hǝ̃ǝ̃sǝ nã̀ã guu bà nã.

4 Sulammã nã, fufodii, halle mɛlɛgɛbaa mãã nǝ̃ gaacĩɛ̃yaga, Dũnnũẁ sáa ya bá tar sugojaruugɩ nã, nǝ̃ wù nǝ̃́ǝ̃lã́ ǹ-dii-ba jahãlmãw nã, nã̀ã vaa-ba ǹ-kra dudũũmã^a nã, bá ba dàa ǹ-ba bà fennãã wù sugojaryuugɩ nã.

5 Halle haasǝtaabaa mãã bà yáá bàa bla, Nũhũ bǝ̃ǝ̃gu, wù sáa yaa bàá yo.

Wù tĩ́ɛ̃lã́ dɔkɩkandɩ́ juo nɔ̃ ǹ-guu bà min nã, nã̀ã kor Nũhũw nǝ̃ wù suɔntaa nɩrhǝ̃ǝ̃l.

Nã̀ã wa wù-lǝ wùú yáá wù waa hlũsũɔ̃lgǝ'n cɔ̃mmã wù ja cwaaba.

6 Dũnnũẁ hlã Sodɔm lǝri nǝ̃ Gomɔr lǝri nǝ̃ yuɔrɔmmã, nã̀ã hyã ǹ-guu gà nã mǝ̃ga-mǝ̃ga ǹ-pɩgaa diicĩɛ̃rǝntaaba nǝ̃ dìí mãã dɩ̀ ga hi-ba cicuɔgu.

7 Nǝ̃ wù kórrá Lɔtɩẁ dɩn-i.

Wùú dɩn ya cosũɔ̃lyǝw bà sǝ̃ǝ̃nã.

Gɩ̀ liɛntaa'n circɔ̃mmã̀ yáá mã̀ã mǝ̃gaa ǹ-ca wù nã ǹ-car.

8 Nã̀ã wa ǹ-ya cosũɔ̃lyǝ wáà ba gɩ̀ cobaliɛba sǝ̃ǝ̃nã, wù yáá wù da gàá, nã̀ã nɔ̃ dìí, gà yáá gà cor wù hiɛga yuu wo yuu.

9 Gɩ̀-lǝ gɩ̀ nã, bàá mãã bàa sũɔ̃l, Dũnnũẁ fǝ̃́ǝ̃lã́ wù mãã wù ji hiil-ba gbǝ̃ǝ̃mã nã nĩĩguu mãã, nǝ̃ bàá mãã bà sáa sũɔ̃l, wú blǝ ǹ-kra bà nã ǹ-ba wù fennãã sugojaryuugɩ nã, bà piirɩm'n yuugu.

10 Bàá mãã bà duu bà hla'n yisɩnã cɔ̃mmã nã mãã dɩgaa'n cɔ̃mmã, nã̀ã ba bà sǝ̃n hũɔ̃ ǹ-hɩr bà hla nã Dũnnũ yuuntasǝ'n taaragu, bàá dǝllii ga ɲirǝ̃ǝ̃ nã.

Ciciɛsǝri nǝ̃ nɔ̃dwaluugɩ́ nǝ̃ gùu siɛ gɩ̀ cokallɛkwasǝnããba.

Bà sǝ̃n sɔ̃ Dũnnũ ɲããnǝ̃ǝ̃gǝ̃ngãnɲã nã, nǝ̃ ba-ń ce bá ver ǹ-ba bà tuuraa ɲã̀ nã.

11 Halle mɛlɛgɛba nǝ̃ bà hla, bà sǝ̃n hũɔ̃ ǹ-tuuraa bà nã, nã̀ã da bà-lǝ bà fãngããgɩ ta gɩ̀ cwaa'n kuugɩ nã.

12 Nǝ̃ gɩ̀-lǝ gɩ̀ cwaa-lǝ, bà ce bà cɔ̃mmã min bà dii, nã́ã́ jerbɩganããbaa mãã ba-ń ce bá huu ǹ-ba bà fennãã cwaaba nã, bá ba bà blǝ bà ko-ba bà wuu.

Kuu wo kuu mãã bà sǝ̃n fǝ̃ǝ̃ gɩ̀ tam, ba-ń ce bá ba bà tuuraa gɩ̀ nã.

Dũnnũẁ ga guu bàá yo bà nã jerbɩganãã'n tammã-i.

13 Bà píɛlá gùú ywaruuguu mãã cwaa'n dɩgaliɛw nã, Dũnnũ yo wù ga pã-ba nǝ̃ gɩ̀-i.

Bà ce ciryaga bǝ̃ciikarkaagu, bà mãã ba-ń kã curo'n paaruugɩ nã, bà da bà dudwalɩmmã cwaa'n vuuram nã-i, fuwɔ ɲi-ń jiraa juwuukaagɩ nã nǝ̃-ba gɩ́ ba nǝ̃ ciiri ɲì nã.

14 Bà yinɲã̀ hlǝ canããba min nã.

Bà sǝ̃n ye diicĩɛ̃rǝdi.

Ba-ń ce bá ba bà vuuraa bàá mãã bà sǝ bàa hi ǹ-mǝ̃gaa ǹ-ɲǝ̃gãr Dũnnũ cɔ̃mmã nã, ba da ǹ-duruu diicĩɛ̃rǝdɩ nã.

Dũnnũẁ píɛlá wù nãkrɔbɩblaagu gɩ̀ cwaa'n tuugu drɔ.

15 Bà mãã bà gáa nǝ̃nǝ̃ǝ̃ hlũsũɔ̃lgǝgɩ nã ǹ-ga vaalaa, bá fǝ̃ǝ̃ ǹ-tuu Bosɔr bíɛ́ Balam nǝ̃ǝ̃li.

Wù-lǝ, gùú mãã gɩ̀ yáá gɩ̀ dwal wù nã, gùú yáá bá pã ǹ-hã-yǝ nǝ̃ wú kãã ce diibɩblaari,

16 nǝ̃ Dũnnũẁ ga juo wanãã wù nã wù gaacĩɛ̃ya'n cɔ̃mmã nã, fuwɔ ǹ-ce kǝkũm nǝ̃nũɔ̃n kũnkũnĩĩẃ wanãã nǝ̃-yǝ curo'n tammã, gɩ̀-lǝ gùú cíé Dũnnũ tanhiil Balamw nǝ̃nǝ̃ǝ̃ wù baahãrsǝrɩ nã.

17 Gɩ̀-lǝ gɩ̀ cokallɛkwasǝnãã'n tuugɩ nǝ̃ nã́ã́ hũnfon-i ɲã̀ã́ mãã ɲã̀ã fo, nã̀ã ba nã́ã́ kurkaaraa'n yiilun-i.

Dudũũmãã mãã dudũũmã mã̀-lǝ mã̀ã́ fennãã bà nã Dũnnũ suɔgu.

18 Nɔ̃dwaluugu nǝ̃ mǝ̃ǝ̃lǝ̃ǝ̃cãwanĩɛ̃gà dwal bà nã.

Bà yisɩnã yaga min cirya-i, bà ce gà-i bà vuuraa bà blǝ bàá mãã bà tárrá ǹ-hiil bà hla diicĩɛ̃rǝntaaba sǝ̃ǝ̃nã gɩ̀ sáa hǝ̃ǝ̃sǝ.

19 Ba-ń ce bá ba bà waa nǝ̃-ba wà ba ji hiil-ba wasǝrɩ nã ǹ-nǝ̃nǝ̃ǝ̃, bá da ǹ-da bà hla nã.

Nǝ̃ bàá nǝ̃ bà hla bá ba bǝ̃ǝ̃lǝ̃m'n wasǝrɩ nã.

Nã̀ã wa yíi mãã ǹ ya cɔ̃mmã́ yugo ǹ yuugu, yíǹ-lǝ ǹ cíé gɩ̀ cɔ̃m'n wabiɛ-i.

20 Sulammã nã, bàá mãã ba-ń fǝ̃ǝ̃ Yitii Yesu Kɩrsaw, wùú mãã yì Kortiiw, nã̀ã hiil bà nɔ̃nɲã cuu dɩgaa'n yaga nã, bà-lǝ bà tuugɩ-ń ver ǹ-jãn dɩgaa'n yaga nã, ǹ-ya gá yugo bà yunɲã, bà cɔ̃mmã juo ɲirǝ̃ǝ̃ ǹ-bla ǹ-maa bà haasǝ cɔ̃mmã.

21 Gɩ̀ tuutaaba nã́ã̀ ba bà sáa hi ǹ-fǝ̃ǝ̃ hlũsũɔ̃lgǝgu, gùú yáá gùu buɔ bà nã, bá fǝ̃ǝ̃-gǝ, nã̀ã ver bà furũũgu ǹ-hã Dũnnũw mãã wù kárrá dìí nã ǹ-hã-ba.

22 Cwaaba-ń ce bá ba bà tu cãwaadũũmã mã́ã̀-i, sulam-i nǝ̃-mã, ba-ń ce bá ba bà waa wà: «Vaaẁ gáa ver ǹ-ba wù nãn wù huusaagɩ-i.»^b

Nã̀ã ba bà waa hlo wà: «Ba-ń ca Pyarw nã ǹ-ba bà nǝ̃nǝ̃ǝ̃ wù nã, wù ver nunugɔluɔgu kusunã-i.»