Titɩw 2

Ǹ-kal cwaaba nǝ̃ sulammã

Nǝ̃ Titɩ yíǹ-lǝ, ǹ saa ń kal cwaaba nǝ̃ kalɩmhuhorɩmmãã mãã mã̀ã saa ǹ-vaa nǝ̃ Yesu cɔ̃m'n hũɔ̃mã.

2 Waa nǝ̃ byanvãnããba wà ba báa ba ba-ń ce bá wuu wuuri yindagǝ nã ǹ-ɲũɔ̃ kwãmmã ǹ-ji maa gɩ̀ sùɔ́gu, bá ba cwaabaa mãã bà saa nǝ̃ bũũmã, nã̀ã ba bà fǝ̃ǝ̃ bà blǝ bà hla nã.

Bá hiraa dɩ̀ dɩndɩ nã Yesu cɔ̃m'n hũɔ̃mã nã.

Bá ya cwaa'n cɔ̃mmã́ dwal bà nã, nã̀ã vaa bà hla ǹ-ba bà kã nǝ̃ yiga.

3 Gùú tammã dɩnmã nã-i, ń waa nǝ̃ canvãnãã yo, wà bá ba bà ce bà cɔ̃mmã min yiyalɩmmã nã, nã́ã́ cwaabaa mãã bàa kra bà nã, bà dǝ ǹ-hã Dũnnũw.

Cãwanĩɛ̃bɩbliɛgà sǝ̃n saa gá ba gà hlǝ bà nɔ̃nɲã nã, bà sǝ̃n saa bá ya kwãnyelaagɩ́ blǝ bà yunɲã.

Bá ba bà kal cwaaba nǝ̃ diifɩnfaari.

4 Bá kal caplǝbiiba, ǹ-pɩgaa-ba wà bà blaba nǝ̃ bà tãnkuuraa'n cɔ̃mmã́ saa mã́ gbǝ̃ǝ̃ bà nã.

5 Bà saa bá fǝ̃ǝ̃ bà hla'n blǝmmã, nã̀ã ba yiyalɩmmã nã.

Bá ba bà blǝ bà swammã nã, bá ba nǝ̃ kusufɩnfanɲã, nã̀ã ba bà nɔ̃ bà hã bà blaba, curo'n báa ji tuuraa Dũnnũ cãwandɩ nã.

6 Ba nǝ̃ hã plaa yo nǝ̃ hyagbǝ̃ngbãndi nǝ̃ gùú dɩ dɩndɩ-i wà ba-ń ba bà ce cɔ̃m wo cɔ̃m, bá fǝ̃ǝ̃ bà hla'n blǝmmã mã̀ cellɩ nã.

7 Yíi yo, ǹ cɔ̃mmã min nã, ba ǹ ce gaafɩnfiɛga ǹ pɩgaa-ba, bá da ǹ-tuu ǹ nǝ̃ǝ̃li.

Ǹ mãã ǹ kal-ba nǝ̃ mã̀ã́ mãã mã̀ saa mã́ ba kalɩmhuhorɩm-i, mã̀-lǝ mã̀ã́ sáalà nǝ̃ bũũmã.

8 Ǹ cãwanĩɛ̃gà saa gá ba gàa sũɔ̃l, cincaruugɩ báa da gà nã, ciirɩ́ da ǹ-blǝ yì kuurǝǝba, ba báa da diibɩblar yì nã ǹ-waa.

9 Waa nǝ̃ lwɛba, wà bá ba bà nɔ̃ bà hã bà yuntaaba cɔ̃mmã min nã, wà bá gbǝ̃ǝ̃ ǹ-ya bà cɔ̃mmã́ dwal bà yuntaaba nã, ba báa ba bà ce cincaruugu nǝ̃-ba,

10 yindagǝ nã ǹ-ŋmã bà kuudagǝ.

Bá ba kusufɩnfaantaaba nǝ̃ yalntaaba cɔ̃mmã min nã, gɩ̀-lǝ gɩ̀ nã, bà mãã bà hã-ba nǝ̃ gùú kalɩmmãã mãã yì Kortii Dũnnũ cɔ̃mmã, kalɩm mã́ã̀mã̀ ji da bũũmã.

11 Nã̀ã wa Dũnnũẁ pɩ́gará ǹ-ja cwaaba wà wu níé bà yiɛgu.

Cwaanbiiba min korɩmmã̀ hlǝ gùú sùɔ́gɩ-i.

12 Gɩ̀-lǝ gɩ̀ pɩgaa gɩ̀ ja-yáà wà yi ba yì nǝ̃nǝ̃ǝ̃ gaabɩbliɛ'n cellɩ nã, nǝ̃ cuu wáà yisɩnã cɔ̃mbɩblammã nã, ǹ-ba yì waa hlũsũɔ̃lgǝgɩ nã, nã̀ã fǝ̃ǝ̃ ǹ-blǝ yì hla nã, ǹ-ɲǝ̃gãr Dũnnũ cɔ̃mmã nã, jimããnããw.

13 Gùú ji ce yí ba yì fennãã nũɔ̃sǝn yuugɩ nã, yí nǝ̃ yìi piɛ yì nãkruɔgu dɩ̀ nã wà gɩ ji hi.

Yuu gúɔ̀, Yesu Kɩrsaw mãã yì Dũnnũgǝ̃ngãw, nã̀ã ba yì Kortiiw, wù ga jo, yi ji da-yǝ wù yuuntasǝ'n gbɩgbaamã nã.

14 Wù hlã-ba nǝ̃ wù hla'n yuugu hãmĩĩ cɔ̃mmã nã-i, ǹ-da ǹ-hiil-yáà gaabɩbliɛga nã.

Wù yáá wù caa wú per yì nã, yí ba wù hla'n bɩgaaba, ǹ-ba yì huulaa yì hiɛga nã nǝ̃ diifɩnfar'n celli.

15 Ǹ mãã ǹ saa ń kal-ba nǝ̃ dìí mãã ǹ-da ǹ-hã-ba nǝ̃ hyagbǝ̃ngbãndi, yindagǝ nã ǹ-wanãã bà nã nǝ̃ fãngããgɩ min.

Gɩ̀ sùɔ́gɩ nã, báa ya curoẃ diɛ-n.