Titɩw 1

Titɩ sɛbɛw

Polẁ yállá gùú sɛbɛw ǹ-hã Titɩw

Pol fyãnuugu

Mã́ã Pol, mã́ã mãã Dũnnũ mããcierw, nã̀ã ba Yesu Kɩrsa tĩɛ̃tiiw, mǝ̃n-lǝ mã́ã yállà sɛbɛ wáà.

Gùú tuulii mãã Dũnnũẁ píɛlá-dǝ mǝ̃̀ drɔ, dɩ̀-lǝ dɩ̀-i mǝ̃́ jo nǝ̃ bàá mãã wù níé ǹ-hiil-ba, ba ji hũɔ̃ wù cɔ̃mmã, nã̀ã pɩgaa-ba nǝ̃ sulammã, bá fǝ̃ǝ̃-mã ǹ-da ǹ-ɲǝ̃gãr Dũnnũ cɔ̃mmã nã.

2 Gɩ̀-lǝ gùú ji ce Dũnnũẁ plã wù nũɔ̃gu wà wu ji hã-ba nǝ̃ fɩraa nũmǝ̃nãsǝri, bá piɛ bà nãkruɔgu dɩ̀ drɔ.

Dũnnũẁ sǝ̃n bǝr kwasǝri, wù plã wù nũɔ̃gu gɩ̀ cɔ̃mmã nã nǝ̃ cuuw ji da wú nǝ̃ǝ̃.

3 Dũnnũẁ yáá wùu kra gùú bǝ̃ǝ̃gɩ nã, gɩ̀ jáa hi, wú pɩgaa-yáà nǝ̃ wù cãwandi gbaa.

Dũnnũw mãã yì Kortiiw, wù díilá gɩ̀ tĩɛ̃ri mã́ã nãkruɔgɩ nã-i, wà mǝ̃́ waa-dǝ ǹ-ja cwaaba dɩ́ duu dɩ̀ ɲĩɛ̃ nã, nã́ã́ Dũnnũẁ kárrá dɩ̀ nã nĩĩgu mãã.

4 Titɩ, yíi mãã mǝ̃̀ byahuhorw Dũnnũ cɔ̃m'n hũɔ̃mã nã, yi min yí nǝ̃ yìi hũɔ̃ gùú cɔ̃mmã dɩnmã-i, mǝ̃̀ tĩɛ̃ sɛbɛ wáà mǝ̃̀ hã yíi-i.

Tiiyǝ Dũnnũw, bá nǝ̃ yì Kortii Yesu Kɩrsaw, bá mǝ̃gaa ǹ-ne ǹ yiɛgu, nã̀ã hã-n hyasɩrãgǝgu dugɔ.

Titɩ mããcemmã Krɛtɩ yiɛgu

5 Mǝ̃̀ tíɛ́ nã̀ã kra ǹ nã ń ba dàa Krɛtɩ yiɛgu dìí yuugɩ nã, dɩ̀-i ń tɩgɩnǝ̃ǝ̃ ń faal mããcem'n dɩgaliɛw nã mãã wù yánã́ã, kuu wo kuugɩ́ jãn gɩ̀ fuugɩ nã, nǝ̃ lǝ wo lǝ nã, Dũnnũ bluuba sǝ̃ǝ̃nã, ń ne ń hiil Igɩlisɩ taa'n vũnvãnããba ń kra, nã́ã́ mǝ̃̀ kárrá dɩ̀ nã ǹ-hã nĩĩgu mãã.

6 Curo wo curo mãã ǹ ji ne ǹ-hiil-yǝ gɩ̀ mããcemmã nã, gɩ̀ saa wú ba curow mãã wanyuɔrɔmmã sǝ wù nã, gɩ̀ tiiw saa wú ba ciɛdiintii-i.

Wù tãnkuuraabà saa bá ba yalntaaba, curo'n báa da cɔ̃m bà nã, mã̀ã́ mãã dɩgaa'n yaga yindagǝ nã ǹ-da mã̀ã́ mãã mã̀ pɩgaa wà ba sǝ̃n hũɔ̃ cɔ̃m.

7 Sulammã nã, Igɩlisɩ taa'n vũnvãtiiw mãã yigantasǝrɩ nã Dũnnũ mããcemmã nã, yuɔrɔmmã̀ sǝ̃n saa mã́ da wù nã: wù sǝ̃n saa wú ba wù dwal wù hla nã, yindagǝ nã wù hiɛgá ba gà gǝǝ gà du, yindagǝ nã ǹ-ba wu-ń ce ɲũɔ̃ kwãmmã́ blǝ-yǝ, yindagǝ nã ǹ-ba wù gǝǝ wù mũũ nãkruɔgu, yindagǝ nã wù sǝ̃n saa wú ba jin'n purnĩĩw.

8 Nǝ̃ cwaabaa mãã bà jo wù nãã, wù saa wú mǝ̃gaa ǹ-hyar-ba, diifɩnfaarɩ́ ba dɩ̀ dwal wù nã.

Wù saa wú ba curow mãã wù blǝ cɔ̃mmã nǝ̃ yigakaalagǝgu, cosũɔ̃lyǝw, ǹ-ba yiyalɩmmã nã, nã̀ã ba wù fǝ̃ǝ̃ wù blǝ wù hla nã.

9 Wù saa wú ba curow mãã wùu mǝ̃gaa ǹ-ɲǝ̃gãr Dũnnũ cãwaahuhordǝdɩ nã, ǹ-vaa nǝ̃ bà kállá-yǝ nǝ̃-dǝ nĩĩguu mãã.

Gɩ̀-lǝ gɩ̀ tammã, wù ji gbǝ̃ǝ̃ ǹ-ba wù kal bà dɩgaliɛw nǝ̃ kalɩmhuhorɩmmã wù hã-ba nǝ̃ hyagbǝ̃ngbãndi, nã̀ã ba wù pɩgaa wù ja cincariɛba nǝ̃ bà yuɔrɔmmã.

Cokallɛkwasǝnããba

10 Sulammã nã, Yahudyabaa mãã Kɩrsa bɩgaaba, bà-lǝ bà sǝ̃ǝ̃nã, cocindɩ́ nìɛ bà sǝ̃n hũɔ̃ cɔ̃m, bà ce baahãrsǝ'n cincaruugu, bà vuuraa cwaaba nã.

11 Gɩ̀ saa ń ce bá suu bà nɔ̃nɲã nã.

Bà bǝ̃ǝ̃lǝ̃ǝ̃ sɔkukuu'n hũɔ̃mã nã.

Dìí mãã bà sǝ̃n saa bá kal cwaaba nǝ̃-dǝ, bà kal-ba nǝ̃ dɩ̀-i ǹ-da ǹ-da dalaagu.

Bàá mãã bà da gɩ̀ dalaa'n tuugu, gɩ̀ saa gɩ́ ce ciiri bà nã.

12 Bàá hla'n yiɛntiidiɛ, bà hla'n tanhiilw, wùú wáalá wà: «Krɛtɩ yiɛntaaba, bǝ̃ǝ̃ wo bǝ̃ǝ̃ kwasǝ-i bà nɔ̃nɲã nã.

Bá nǝ̃ bàa bla nã́ã́ jaraba-i.

Lonãã-i nǝ̃-ba, bà sǝ̃n fǝ̃ǝ̃ mãdamã nã́ã́ kusubɔn'n cɔ̃m sǝ.»

13 Wù mãã wù waa dìí mãã nnĩĩ, sulam-i.

Gɩ̀ sùɔ́gɩ nã, ǹ saa ń mǝ̃gaa ń wanãã bà nã bà hũɔ̃mã́ da ǹ-sũɔ̃l,

14 nǝ̃ ba báa da ǹ-ɲǝ̃gãr gùú cɔ̃mmã nã mãã Yahudyabà yáá ba-ń ce bá jiraa ǹ-taa-mã haasǝgu, nǝ̃ cwaabà kárrá gùú hlũsǝrɩ nã mãã.

Cwaadaabà vérrá bà furũũgu ǹ-hã sulammã, bà-lǝ bàá kárrá gɩ̀ hlũsǝrɩ nã, ǹ-dii cwaaba dɩ̀ nã.

Bà sǝ̃n saa bá nɔ̃ ǹ-hã-ba.

15 Bàá mãã yiyalɩmmã nã, bà-lǝ bà saa, cɔ̃mmã min mã́ nǝ̃ yiyalɩm nã-i.

Nǝ̃ bàá mãã dɩgaagɩ nã, nã̀ã ba bà sáa hũɔ̃ Dũnnũ cɔ̃mmã, bà-lǝ bà saa, cɔ̃m'n sɩriɛ mã̀ã́ mãã yiyalɩmmã nã, nã̀ã wa bà-lǝ bà cɔ̃nfǝ̃ǝ̃gǝgu nǝ̃ dìí mãã bà yunɲã nã, dɩgaagɩ́ nàa ɲã̀ nã.

16 Bà waa wà bà-lǝ ba fǝ̃ǝ̃ Dũnnũw, nǝ̃ bà gaaciegá ba gà pɩgaa dɩ̀ kiɛnw.

Bà gaaciegá nǝ̃ gàa bla ǹ-ji maa gɩ̀ sùɔ́gu, bà sǝ̃n nɔ̃ bà hã curo, nã̀ã ba bà síì gbǝ̃ǝ̃ ǹ-ce halle diifɩnfaar dɩn yo.