Gal. 5

Kɩrsaẁ ce yí da yì hla nã

Kɩrsaẁ hṹɔ̃lã́-yáà wasǝrɩ nã, ǹ-nǝ̃nǝ̃ǝ̃, yí da ǹ-da yì hla nã gbɩla.

Gɩ̀ sùɔ́gɩ nã, hiraa dɩ̀ dɩndɩ nã, ɲi báa ji ver ɲì jãn wasǝrɩ nã.

2 Mã́ã Pol, mǝ̃n-lǝ mã́ã wáalà-dǝ nǝ̃-ɲã́ã̀, ɲi-ń ver ǹ-ce bá ba bà síì bibyanããba ɲì sǝ̃ǝ̃nã, gɩ̀ pɩgaa wà Kɩrsaẃ juo ǹ-ji ce kuu wo kuu ǹ-hã-ɲã́ã̀, gɩ̀ sǝ̃n pyar dugɔ ɲì saa.

3 Mǝ̃̀ ver ǹ-waa ǹ-dĩĩ dɩ̀ nã ǹ-tu, curo wo curo, wu-ń ce bá síì-yǝ, fãngãã-i wú ba wù wáà Musa hlũũgɩ min gɩ̀ tammã nã.

4 Ɲimãã mãã wà ɲi caa Dũnnũẃ ce-ɲã́ã̀ cosũɔ̃lbaba Musa hlũũ'n waam'n cɔ̃mmã nã, ɲi búrúɔ nǝ̃ Kɩrsaw, wù mãã wù ne yì yiɛgu dìí nã mãã, ɲì nũɔ̃gɩ sɩraa dɩ nã.

5 Nã̀ã wa Dũnnũw ji ce yí ba cosũɔ̃lbaba yì hũɔ̃m'n cɔ̃mmã nã.

Dũnnũ Yuflǝw-i yà ce yí ba yì fennãã dɩ̀-lǝ dɩ̀ nã.

6 Curow-ń hũɔ̃ ǹ-kã bá ba sùɔ́gɩ dɩngu nǝ̃ Kɩrsaw, ya síì wo, wù sáa síì wo, gɩ̀-lǝ gɩ̀ sǝ̃n pyar dugɔ.

Dìí mãã nũɔ̃sǝn dǝlli, dɩ̀-i, yí hũɔ̃ Yesu cɔ̃mmã.

Gɩ̀-lǝ gùú hũɔ̃mãã ji ce yì nãcuro'n cɔ̃mmã́ dwal yì nã.

7 Gɩ̀ dullɩ nã, ɲi yáá ɲì kã nǝ̃ yigagu, halii gáa juo paa ǹ-cii-ɲã́ã̀, ǹ-ce ɲí nǝ̃nǝ̃ǝ̃ sulammã nã?

8 Fǝ̃́ǝ̃lã̀ wà kãnɩmbɩblam mã́ã̀mã̀ sáa hlǝ Dũnnũw mãã wù bíé-ɲã́ã̀ wùú nã sǝ.

9 Mã́ nǝ̃ nã́ã́ bà mãã ba-ń dii leviirw fiyãã burduɔgɩ nã, wú ce gɩ̀ min gɩ́ ɲǝ̃ǝ̃ nĩĩguu mãã.

10 Nǝ̃ mǝ̃n saa, Yitiiẃ nǝ̃ yà ce mǝ̃́ piɛ mǝ̃̀ nãkruɔgu ɲì nã wà ɲimãã-lǝ ɲi sɩga kãn mãdamã ǹ-maa mǝ̃n dǝlli.

Nǝ̃ gùú tii nǝ̃n gaala ɲì nã, wu-ń ba wùu ba tam wo tam, wù ji da wù yuɔrɔmmã.

11 Mã́ã cwanãã, gɩ nã́ã̀ ce nã́ã́ mǝ̃́ waa síìm'n cɔ̃m-i mǝ̃̀ ja cwaaba, wà mã̀ã́ kórrá-ba, bà yáá bà ji cuɔl-m hadɩ-i yuunã-i?

Dìí nã́ã̀ ba, mǝ̃̀ mãã mǝ̃̀ waa Yesu gbǝl'n cɔ̃mmãã mãã daagɩ nã, mã̀ sáá mã̀ ji ce curoẃ ver furũũ!

12 Bàá mãã bà dii bà gaala ɲì nã, bá kãã bǝr ǹ-pyar bà bibyasǝri!

13 Mã́ã cwanãã ɲimãã, Dũnnũẁ bíé-ɲã́ã̀, ɲí da ǹ-ba ɲì hla nã, nǝ̃ bláá tuu dɩ̀-lǝ ɲí ba ɲì ce ɲì hla'n yisɩnã cɔ̃mmã.

Yáalà ɲì ɲĩɛ̃ cɔ̃mmã́ dwal ɲì ɲĩɛ̃ nã, ɲí ba ɲì fa ɲì ɲĩɛ̃ cɔ̃mmã.

14 Nã̀ã wa Musa hlũũgɩ min gɩ́ nǝ̃ cãwaayisɩ díɛ́ nã-i: «Ǹ saa ń ya ǹ nãcuro'n cɔ̃mmã́ dwal ǹ nã nã́ã́ ǹ hla-i.»

15 Nǝ̃ ɲimãã, ɲi-ń ver ǹ-suro ɲì ɲĩɛ̃ yuunã nã́ã́ jerbɩganãã-i ǹ-ba ɲì duu ɲì ɲĩɛ̃, nã̀ã ba ɲì kɔsuɔ ɲì ɲĩɛ̃, blǝ́rà ɲì hla nã, ɲi báa ji bǝ̃ǝ̃lǝ̃ǝ̃ ɲì ɲĩɛ̃ nã.

Yáalà Dũnnũ Yuflǝẃ ta ɲì yigagɩ nã

16 Gɩ̀-i, mǝ̃́ wa hããw: yáalà Dũnnũ Yuflǝẃ ta ɲì yigagɩ nã, gɩ̀-lǝ gɩ̀ nã, ɲi síì ce ɲì hla'n yisɩnã cɔ̃mmã.

17 Nã̀ã wa curo'n blɩ'n yisɩnã cɔ̃mmã̀ mãã mã̀ caa dìí, dɩ̀ sǝ̃n dwal Dũnnũ Yuflǝw nã, Dũnnũ Yuflǝ yo wù mãã wù caa dìí, dɩ̀ sǝ̃n dwal curo'n blɩ'n yisɩnã cɔ̃mmã nã.

Gɩ̀ ɲinɲã hǝ̃ǝ̃lɲã̀ gãnãã nǝ̃ ɲì ɲĩɛ̃ fuwɔ ǹ-ce ɲí ba ɲì sǝ̃n ce dìí mãã ɲì yáá ɲì caa ɲí ce-dǝ.

18 Nǝ̃ Dũnnũ Yuflǝw-ń ta ɲì yigagɩ nã, gɩ̀-lǝ gɩ̀ nã, ɲí sǝ Musa hlũũ'n fãngããgɩ nã.

19 Nǝ̃ yì min yi fǝ̃́ǝ̃lã́ curo'n yisɩnã cɔ̃mmã̀ mãã mã̀ caa mã́ ba mã̀ ce dìí, dɩ̀-lǝ dɩ̀-i: durkũmsǝri, dɩgaa'n yaga nǝ̃ circɔ̃mmã,

20 siijãnũũgu, kaaraagu, ɲããsǝri, byaari, kusuguugu, hyadũũgu, fi-ǹ-ɲĩɛ̃w, tũɔ̃lɩmmã, burɔmmã,

21 ǹ-ce yisɩri, kwãnyelaagu, pursǝri nǝ̃ gɩ̀ ɲin'n tuugu.

Nǝ̃ mǝ̃̀ ji ver ǹ-gbǝ ɲì nã ǹ-tu, bàá mãã bà ce gà-lǝ, bà sɩga jãn Dũnnũ yuuntasǝrɩ nã ǹ-da.

22 Nǝ̃ Dũnnũ Yuflǝ-lǝ, wù mãã wù ce dìí mãã curo'n blɩ'n hiɛga nã, dɩ̀-lǝ dɩ̀-i: yì ɲĩɛ̃ cɔ̃mmã́ dwal yì ɲĩɛ̃ nã, dudwalɩmmã, hyasɩrãgǝgu, hyafɛ̃gǝgu, hujãndi, kusufɩnfaagu, nǝ̃ yalntasǝri,

23 blanãmmã, blǝnhlanw.

Dɩ̀ káaláa hlũũdagǝ'n sɩriɛ gùú mãã gɩ̀ gǝ̃ǝ̃ nǝ̃ gɩ̀-lǝ gɩ̀ ɲinɲã min.

24 Nǝ̃ bàá mãã Kɩrsa bɩgaaba, bà-lǝ bà gbǝ́ǝ́ bà hla yisɩnã cɔ̃mmã nǝ̃ mã̀ nũũ'n ɲinɲã daagɩ nã, ǹ-nǝ̃nǝ̃ǝ̃ mã̀ nã.

25 Dũnnũ Yuflǝẁ mãã wù hã-yáà nǝ̃ nũmǝ̃nãsǝri, gɩ̀ sùɔ́gɩ nã, yáalà wú ba wù ta yigagɩ nã.

26 Bláá ya yí ba yì huɔruɔ yì hla nã.

Bláá ya yí ba yì caa yì ɲĩɛ̃ nɔ̃nɲã, ǹ-ba yì ce yì ɲĩɛ̃ nǝ̃ holsǝri.