Seremi (Jérémie) 52

4 Gɩ̀-i, Sedesiyasɩ fãngãtasǝ'n bii densǝnãw nã, gɩ̀ hyarsǝ nũɔ̃sɔ̃nãw nã nǝ̃ gɩ̀ bãn nũɔ̃sɔ̃nã yuugu, Babilɔn yiɛ'n yuuntigǝ̃ngã Nabukadɩnɩsaarẃ jo nǝ̃ wù sɩrǝǝsɩba min ǹ-juo du Serusalɛmgɩ nã.

Bá juo nǝ̃nǝ̃ǝ̃ bà kuɔyaga gɩ̀ yigagɩ nã, nã̀ã mã wancĩĩm'n sɔsǝri ǹ-caliɛ gɩ nã.

5 Bà dúú byaarɩ nã nǝ̃ Serusalɛmgu ǹ-ji da Sedesiyasɩ fãngãtasǝ'n bii nũɔ̃sɔ̃ nǝ̃ dɩ̀ diinnã blɩri.

6 Hyarsǝrɩ nnǝ̃ǝ̃nã bãn densǝnã yuugu, nũmmã́ juo ɲirǝ̃ǝ̃ ǹ-ji gbǝ̃ǝ̃ ǹ-car Serusalɛmgu, gɩ̀ yiɛntaabá ji ba bà sáá nǝ̃ wuur bà ji wuu.

7 Babilɔn yiɛntaabá kǝ̃ǝ̃l fuugu, dofũũlɩ nã mãã dɩ̀ yáá dɩ̀ cĩĩ lǝrɩ nã.

Taagà gáa cu, Suuda sɩrǝǝsɩba min bá kwar.

Babilɔn yiɛntaabá juo caliɛ Serusalɛmgɩ nã.

Nǝ̃ dɩ̀-lǝ dɩ̀ min nã, sɩrǝǝsɩbà hlǝ́rá lǝ'n kusuugɩ nã nǝ̃ yuuntigǝ̃ngã'n nãnkuɔ yiɛ'n dũndɔ̃lli mãã dofũyaga hǝ̃ǝ̃l sǝ̃ǝ̃gɩ nã.

Gɩ̀ furũũgɩ nã, bá tuu hlũũgu mãã gɩ̀ kã Surdɛ̃ nɩgǝraagɩ nã.

8 Nǝ̃ gɩ̀-lǝ gɩ̀ bǝ̃ǝ̃gu, Babilɔn sɩrǝǝsɩbá hla nã̀ã ba bà ɲǝ̃ǝ̃ bà duu yuuntigǝ̃ngã Sedesiyasɩw nã ǹ-ga kãã blǝ-yǝ Seriko lǝ'n nɩgǝraagɩ nã; wù sɩrǝǝsɩba min bà yáá bàa nǝ̃nǝ̃ǝ̃ wù nã.

9 Bá blǝ ǹ-ce-yǝ kasoduuntii, nã̀ã kã nǝ̃-yǝ Irbla lǝri, bà yuuntigǝ̃ngãw nãã, Hamatɩ yiɛgu.

Nabukadɩnɩsaarẃ kãã jar wù sugolli.

10 Babilɔn yiɛ'n yuuntigǝ̃ngãẃ ce bá cǝ̃ǝ̃ Sedesiyasɩ byanãã'n bɔ̃nɲã bà tǝ yinɲã nã; nã̀ã ce bá cǝ̃ǝ̃ Suuda yuntaaba min bɔ̃nɲã Irbla lǝri.

11 Nã̀ã fǝ̃ǝ̃ ǹ-ce bá kǝ̃ǝ̃lǝ̃ǝ̃ Sedesiyasɩ yinɲã nã, nã̀ã ce bá vaa-yǝ nǝ̃ kwabyãr'n jɔrgɔba, ǹ-kã nǝ̃ Babilɔn yiɛgu ǹ-kãã dii-yǝ kasoduugɩ nã fuwɔ wù kúúyuugɩ ji hi.

12 Nabukadɩnɩsaar fãngãtasǝ'n bii nũɔ̃sɔ̃ nǝ̃ densǝnãw nã, gɩ̀ hyarsǝrɩ ndiinãw nã nǝ̃ gɩ̀ bãn nũɔ̃sɔ̃ nã yuugu, Nebusaradãnw mãã wù yáá Babilɔn yiɛ'n yuuntigǝ̃ngã'n sɩrǝǝsɩba yuuntiiw, wú jãn Serusalɛmgu.

Wù yáá Babilɔn lǝ'n yuuntigǝ̃ngã'n cogǝ̃ngãdiɛ-i.

13 Wú kãã tii Fɩraa-Dũnnũ bũũsuɔgu, yuuntigǝ̃ngã'n suɔgu nǝ̃ Serusalɛm sɔnɲã min.

Sɔnɲã min mãã ɲã̀ yáá nũɔ̃sǝn ɲinɲã, wú dii dǝ̃ǝ̃mã ɲã̀ min nã.

14 Babilɔn lǝ'n sɩrǝǝsɩba kurɔnɲã nǝ̃n yáá nǝ̃ sɩrǝǝsɩba yuuntiiw, bá hɩr Serusalɛm dofũũli nǝ̃n yáá dìi caliɛ gɩ̀ nã.

15 Sɩrǝǝsɩba yuuntii Nebusaradãnw guur ǹ-kã kwakwaadaaba, nǝ̃ bàá nǝ̃n yáá bàa kãã dii bà hla ǹ-hã Babilɔn yiɛ'n yuuntigǝ̃ngãw ǹ-tã, nǝ̃ nãkruɔ'n mããcieraa'n dɩgaliɛw.

16 Nǝ̃ sɩrǝǝsɩba yuuntii Nebusaradãnẁ yíɛ́ kwakwaadaabá ba dàa ǹ-ba bà kɔ̃ ɛrsɛ̃ tunɲã nǝ̃ fugasǝri.

26 Sɩrǝǝsɩba yuuntii Nebusaradãnẃ blǝ ǹ-kã nǝ̃-ba Babilɔn yiɛ'n yuuntigǝ̃ngãw nãã, Irbla lǝri.

27 Wù-lǝ wú kãã ce bá paa ǹ-ko-ba gbɩla Irbla lǝri, Hamatɩ yiɛgu.

Bà gúurá ǹ-kã nǝ̃ Suuda bluuba nnĩĩ-i niɛriɛ'n yiɛgu, gùu hal nǝ̃ bà yiɛgu.