Esayi (Esaïe) 1

Ésaïe

2 Drɔkuɔl, nɔ̃ ń hã-m! Ɲũũrũũ, jǝ̃ǝ̃ ǹ tɔ̃nɲã! Nã̀ã wa Fɩraa-Dũnnũẃ nìɛ wù wanãã: «Mǝ̃̀ gbǝ́ǝ́ tãnkuuraaba nã̀ã val-ba, nǝ̃ bá suro ǹ-hla bà hla nã mǝ̃̀ yuunã.

3 Nǝ̃ǝ̃ẁ fǝ̃ǝ̃ wù tiiw, nǝ̃ kǝkũmẃ ba wù fǝ̃ǝ̃ wù tii'n kwasǝnɲin'n ɲããwuukaagu; nǝ̃ Isɩrayɛl bluubà sǝ̃n fǝ̃ǝ̃ bà tiiw, mǝ̃̀ bluubà sǝ nǝ̃ cɔ̃nfǝ̃ǝ̃gǝ.»

4 Gùú plǝrii mãã diicĩɛ̃rǝdɩ nã, cwaabaa mãã yuɔrɔmmã̀ dɩ́sɩrǝ́ǝ dɩ̀ drɔ, bàá mãã cobaliɛ'n nũɔ̃ntaaba, tãnkuuraabaa mãã bà vuuraa cwaaba nã, hujãncɔ̃mmã̀ ji hi-ɲã́ã̀! Bà nǝ̃́nǝ̃́ǝ̃ Fɩraa-Dũnnũw nã, Isɩrayɛl Dũnnũw mãã yiyalɩmmã nã, bà díɛlá-yǝ. Bà jĩ́ɛ̃́ ǹ-yiil.

10 Sodɔm lǝ'n mũɔ̃rãã ɲimãã, nṹwã̀ Fɩraa-Dũnnũ cãwandi! Gomɔr lǝntaa ɲimãã, jǝ̃́ǝ̃lã̀ ɲì tɔ̃nɲã ɲí nɔ̃ ɲí hã yì Dũnnũ hlũũgu!

11 Fɩraa-Dũnnũẃ waa wà: «Ɲì siimã-ń ba mã̀ã ɲũrũɔ̃ tam wo tam, mã̀ ji pyar bii dugɔ-i mǝ̃̀ saa? Ɲi mãã ɲì hyã gùú tugɔliɛ'n kũɔ̃mã, nǝ̃ gùú nǝ̃ǝ̃bii'n nɔ̃mmãã mãã, mǝ̃̀ yíé-ɲã. Mǝ̃̀ sǝ̃n da dudwalɩmmã ninbliɛ'n twammã nã nǝ̃ tũmbii'n mǝ̃gãmmã nã nǝ̃ tugɔliɛ'n mǝ̃gãmmã nã.

12 Ɲi-ń juo hiraa mǝ̃̀ yigagɩ nã, halii wa ɲí ba ɲì sa mǝ̃̀ suɔgu nǝ̃ ɲì vyanɲã nnĩĩ tammã?

13 Ɲi mãã ɲì jãn-m nǝ̃ gùú ɲinɲãã mãã, hyárà-ɲã nnĩĩ nã, ɲã̀ sǝ̃n pyar dugɔ! Ɲi mãã ɲì hã-m nǝ̃ gùú siim'n ɲin'n ɲũɔ̃sǝrii mãã, hyárà-dǝ, dɩ́ nǝ̃ dìi bla mǝ̃̀ nã. Ɲi mãã ɲì ce gùú hyarsǝflãn'n paarunɲãã mãã, nǝ̃ gùú fiisaa'n yun'n ɲinɲã yindagǝ nã gɩ̀ dǝ'n paarunɲã, hyárà-ɲã nnĩĩ nã. Mǝ̃̀ sǝ̃n caa diibɩblaarɩ́ gaala Dũnnũ bũũmã.

14 Ɲì hyarsǝflãn'n paarunɲã nǝ̃ ɲì nũɔ̃sǝn paarunɲã́ nǝ̃ ɲã̀ã bla mǝ̃̀ nã: ɲã̀ jáa ba tuul-i mǝ̃̀ drɔ. Mǝ̃̀ jáa gbǝ̃ǝ̃ ǹ-hũɔ̃-mã ǹ-ji ywar.

15 Ɲi-ń jǝ̃ǝ̃ ɲì nãtraga ǹ-hã-m, mǝ̃̀ yinɲã síì da-ga. Halle ɲi-ń ce ɲì cirǝ̃mmã́ ɲũrũɔ̃, mǝ̃̀ sǝ̃n nɔ̃ ǹ-hã-ɲã́ã̀. Twammã̀ bṹũlã́ ɲì nãkrɔnɲã nã.

16 Cíyà ɲì hla nã, pérrà ɲì hla nã, hálàa nǝ̃ ɲì gaaciebɩbliɛga mǝ̃̀ yinɲã nã, yáalà diibɩblar'n cellɩ́ ba!

17 Bláà ɲì ǝ̃ǝ̃lã diifɩnfar'n cellɩ nã, bláà ɲì caa sũɔ̃lɩmmã, bláà ɲì cii bà mãã bà dii bà yinɲã bàá nã mãã, bláà ɲì hũɔ̃ lombinãã'n nɔ̃nɲã, bláà ɲì hũɔ̃ blakuucanãã'n nɔ̃nɲã!»

18 Fɩraa-Dũnnũẃ waa wà: «Jówà yí wanãã: Halle ɲì gaacĩɛ̃yaga-ń ba ciyɛ̃ nã́ã́ dǝ̃ǝ̃m-i, gà ji ba perper nã́ã́ nɔ̃nɔ̃-i; halle ga-ń ba gàa ba yɔryɔr nã́ã́ twam-i, gà ji ba perper nã́ã́ kurando-i.

19 Ɲi-ń hũɔ̃ ǹ-nɔ̃ ǹ-hã-m, ɲi ji wuu yiɛ gúɔ̀gɩ ɲinfɩnfanɲã.

20 Nǝ̃ ɲi-ń hla nã̀ã hla ɲì hla nã, dãngunãw ji jã ǹ-taalaa ɲì nã. Fɩraa-Dũnnũẁ waa dɩ̀-lǝ dɩ̀-i.»