Seremi (Jérémie) 31

31 Fɩraa-Dũnnũẃ waa wà: «Fiyãã, mǝ̃̀ ji ce yí ce twanɲũɔ̃flĩɛ̃gu nǝ̃ Isɩrayɛl bluuba nǝ̃ Suuda bluuba.

32 Gɩ̀-lǝ gɩ̀ síì ba nã́ã́ mǝ̃̀ kárrá gùú twanɲũɔ̃gǝgɩ nã mãã nǝ̃ bà tǝvũnvãnããba, gùú nã mãã mǝ̃̀ blǝ́rá bà nãkruɔgu ǹ-hiil-ba Misɩra yiɛgu. Bà-lǝ bà bǝ̃́ǝ̃lǝ̃́ǝ̃ mǝ̃̀ twanɲũɔ̃gǝgɩ nã nǝ̃-ba, nã̀ã da mã́ã yáá bà kaltiiw. Mã́ã Fɩraa-Dũnnũ, mǝ̃̀ wáalá gɩ̀-lǝ.

33 Mǝ̃̀ mãã mǝ̃̀ ji kra gùú twanɲũɔ̃gǝgɩ nã nǝ̃ Isɩrayɛl bluuba gɩ̀-lǝ gɩ̀ bǝ̃ǝ̃gu, gɩ̀-i nnĩĩ nã: mǝ̃̀ síì yal mǝ̃̀ hlũũ'n nǝ̃ǝ̃yaga tɩntrã'n yanɲã nã, nǝ̃ mǝ̃̀ ji yal-ga bà yunɲã nã-i, mǝ̃̀ ji yal-ga bà hiɛga nã. Mǝ̃̀ ji ba bà Dũnnũw, nǝ̃ bà-lǝ bá ba mǝ̃̀ bluuba.»

34 Fɩraa-Dũnnũẃ waa wà: «Curo'n dugɔw síì ba wú kal wù nãcurow yindagǝ nã wù cwanĩĩ wà wú fǝ̃ǝ̃ Fɩraa-Dũnnũw! Sulammã nã, bà min bà ji fǝ̃ǝ̃-m, ǹ-tuu wuusaalaaw nã ǹ-ga kra wuugǝ̃ngãw nã. Mǝ̃̀ ji ce bà yuɔrɔm'n dũndɔw, mǝ̃̀ síì ba mǝ̃̀ kãnãã bà gaacĩɛ̃yaga nã hlo.»