Seremi (Jérémie) 17

5 Fɩraa-Dũnnũw mãã wù waa dìi dɩ̀-i nnĩĩ: «Curow mãã wù piɛ wù nãkruɔgu curo'n blɩw drɔ, wù nɩsɩ wù suro Dũnnũ ɲããnǝ̃ǝ̃ɲã drɔ, nã̀ã hiil mǝ̃n cɔ̃mmã wù hiɛga nã, wù cɔ̃mmã́ bǝ̃ǝ̃lǝ̃ǝ̃!

6 Wù hlǝ partuuguu mãã gùu hlǝ hlɔ̃surɔmmã nã: gɩ̀ síì da faagu! Gɩ̀ ji ba nnĩĩ-i jerkwar'n tɩntrãga sǝ̃ǝ̃nã, hlɔ̃mmã nã mãã nǝ̃ dɔ̃mmã, curo'n sǝ dàa jirammã nã mã̀ nã.

7 «Nǝ̃ gùú tii mãã wùu piɛ wù nãkruɔgu mǝ̃̀ drɔ, nã̀ã ba wù nɩsɩ mǝ̃̀ drɔ wù suro mã́ã Fɩraa-Dũnnũ mã́ã drɔ, mǝ̃̀ piɛ mǝ̃̀ nãkrɔfɩnfaagu wù drɔ.

8 Wù hlǝ tubikuuguu mãã bàa so-gǝ hũm'n nũɔ̃gɩ nã, nǝ̃ gɩ̀ ɲũmǝ̃nǝ̃ǝ̃bá ba bà nǝ̃ǝ̃rǝ̃ǝ̃ bà kã kwabii'n nũɔ̃gɩ nã: wù sǝ̃n sɔ̃ vuvǝ̃ǝ̃m'n jol'n bǝ̃ǝ̃gɩ nã, nã̀ã wa wù pɩpɩrãn yo, ɲããsɩrãn-i. Gɩ̀ sǝ̃n jã kũmũũ'n blɩ'n cɔ̃mmã nã, gɩ̀ sǝ̃n hiraa ŋmǝ̃ǝ̃m yo mã̀ nã.

9 Curo'n blɩ'n hiɛgà vuuraa ǹ-ɲǝ̃ǝ̃ ɲinɲã min! Curo'n síì gbǝ̃ǝ̃ ǹ-ce gá buɔ; halǝmblǝ ji gbǝ̃ǝ̃ ǹ-fǝ̃ǝ̃ gà tam?

10 Mã́ã Fɩraa-Dũnnũ, mǝ̃̀ da hiɛga gà taarɩ nã dìi, mǝ̃̀ gbǝ̃ǝ̃ mǝ̃̀ da cwaa'n kusunã cɔ̃mmã. Gɩ̀-lǝ gɩ̀ tammã, mǝ̃̀ pã curo wo curo ǹ-vaa nǝ̃ wù waal'n tammã, nǝ̃ wù gaacie'n tɔ̃nɩw.»