Seremi (Jérémie) 7

1-3 Fɩraa-Dũnnũẁ tĩ́ɛ̃lã́ Seremi mã́ã̀ wù dũndɔ̃llɩ nã, wà mǝ̃́ tu wù cãwandɩ nã. Fɩraa-Dũnnũw, Cuutiiw, Isɩrayɛl bluu'n Dũnnũẁ wáalá mǝ̃́ tu dìí nǝ̃-ɲã́ã̀ dɩ̀-i nnĩĩ nã: «Ɲi min nṹwã̀ Fɩraa-Dũnnũ cãwandi, Suude yiɛntaa ɲimãã min, ɲimãã mãã ɲì jãn nǝ̃ dũndɔ̃lĩɛ̃ gáà ɲì bũũ Fɩraa-Dũnnũw! Véràa ɲì waal'n tammã nã nǝ̃ ɲì gaacie'n tammã nã, nǝ̃ mǝ̃́ ya ɲí ba jirammã nã dìɛ nhlíɛ̀.

4 Gùú cwaabaa mãã bà vuuraa ɲì nã bà gbãlãã, bláá piɛ ɲì nãkrɔnɲã nã bà cãwanĩɛ̃ga nã: “Fɩraa-Dũnnũ bũũsuɔgɩ́ nǝ̃ níɛ́-i, Fɩraa-Dũnnũ bũũsuɔgu, Fɩraa-Dũnnũ bũũsuɔgu!”

5 Nǝ̃ mǝ̃́garà ɲí pɛ ɲì waal'n tammã nǝ̃ ɲì gaacie'n tammã, sulammã nã, bláà sũɔ̃lɩmmã nã nǝ̃ ɲì ɲĩɛ̃.

6 Bláá yiirǝǝ noraaba nã, lombinããba nã nǝ̃ blakuucanããba nã nǝ̃ cɔ̃ncĩɛ̃mã. Bàá mãã bà sáa ce diibɩblar, yáalà bà kukwogá ba nnĩĩ nã. Bláá duu dũnnũdaba nã, bà hã-ɲã́ã̀ nǝ̃ yublaagu.

7 Gɩ̀-lǝ gɩ̀ nã, mǝ̃̀ ji ya ɲí ba dìɛ níɛ́ nã, yiɛ gúɔ̀ nã mãã mǝ̃̀ hlã ɲì tǝvũnvãnããba nǝ̃-gǝ pyandiɛ fɩraa.

8 Nǝ̃ gɩ̀-i nnĩĩ nã, ɲi píɛlá ɲì nãkrɔnɲã gùú cãwanĩɛ̃ga nã mãã bà vuuraa ɲì nã nǝ̃-ga, gà sǝ̃n pyar dugɔ.

9 Hamã-i! ɲi ŋmã, ɲi ko cwaaba, ɲi mǝ̃rǝ̃ǝ̃ nǝ̃ gùú taabaa mãã ɲi sǝ ɲĩ̀ĩ taa ɲì ɲĩɛ̃ nǝ̃-ba, ɲi waasǝ nɔ̃nɲãhǝ̃nhãl waasǝmmã, ɲi tii wusunããw ɲì hã Baalba, ɲi duu niɛriɛ'n dũnnũba nã mãã ɲi sáá ɲì fǝ̃ǝ̃-ba,

10 nã̀ã ga fǝ̃ǝ̃ ǹ-hi ɲí juo hiraa mǝ̃̀ yigagɩ nã, Fɩraa-Dũnnũ bũũsuɔ gúɔ̀ nã mãã mǝ̃̀ yiiri gɩ̀ nã, ǹ-ba ɲì waa wà: “Dũnnũẁ kórrá-yáà!” Gɩ̀-lǝ gɩ̀ tammã, ɲí da ǹ-kã nǝ̃ yiga ǹ-ba ɲì ce gaabɩbliɛga!

11 Fɩraa-Dũnnũ bũũsuɔ gúɔ̀ mãã wù yiiri gɩ̀ nã, ɲi ne gɩ́ ba ŋmãllãã'n kuruu-i? Nǝ̃ mǝ̃̀ da-dǝ nnĩĩ-i. Mã́ã Fɩraa-Dũnnũw, mǝ̃̀ wáalá gɩ̀-lǝ.