Esayi (Esaïe) 55

Ɲi min mãã hũnɲũɔ̃sǝri ɲì nã, jówà hũmmã nãã; halle wùú nǝ̃n ba wù sǝ nǝ̃ worblɩ, jówà ɲí sǝ̃ǝ̃ ɲí wuu! Jówà ɲí sǝ̃ǝ̃ dɩvɛ̃w nǝ̃ nɔ̃nɔ̃w ɲi báa ba nǝ̃ worblɩ, jówà ɲí sǝ̃ǝ̃ mǝ̃ǝ̃lǝ̃ǝ̃-i!

2 Hamã nã-i ɲí ba ɲì bǝ̃ǝ̃lǝ̃ǝ̃ jinɲã nã gùú kuugɩ nã mãã gɩ̀ sǝ̃n val curow? Hamã nã-i ɲí ba ɲì ce mããcemmã gùú kuugɩ nãã mãã gɩ̀ sǝ̃n ye curow? Mǝ̃́garà ɲí nɔ̃ ɲí hã-m, gɩ̀-lǝ gɩ̀ nã, ɲi ji wuu guududwalgǝgu, ɲi ji mǝ̃gaa ɲì hla nǝ̃ ɲããkukɔ̃nɲã.

3 Jǝ̃́ǝ̃lã̀ ɲì tɔ̃nɲã, nǝ̃ ɲí jo mǝ̃̀ nãã; nṹwã̀, gɩ̀-lǝ gɩ̀ nã ɲi ji ba nũmǝ̃nãw! Mǝ̃̀ ji ce yí ce fɩraa twanɲũɔ̃gǝgu, ǹ-da ǹ-ce ɲí dii-dǝ ɲì yunɲã nã, wà mǝ̃ níé Dawuda yiɛgu nǝ̃ gùú ɲinɲã, ɲi ji da-ɲã.

4 Mǝ̃̀ kárrá wù nã, wú ba curow mãã mǝ̃̀ ji ta wù nãã ǹ-pɩgaa coplaaga nǝ̃ mǝ̃̀ fãngããgu, wú ba nã́ã́ tayigantii-i nǝ̃ yuuntiiw bà saa.

5 Ǹ ji be coplaagaa mãã ǹ sǝ̃n fǝ̃ǝ̃-ga, nǝ̃ gùú coplaagaa mãã gà sǝ̃n fǝ̃ǝ̃-n, gà ga sɔ̃ ǹ-jo ǹ nãã Fɩraa-Dũnnũ cɔ̃mmã nã, ǹ Dũnnũw, Isɩrayɛl yow mãã yiyalɩmmã nã, wù mãã wù hã-n nǝ̃ wù faagu.

6 Fɩraa-Dũnnũẁ mãã wù hũɔ̃ bà da-yǝ gùú bǝ̃ǝ̃gu, cáalà-yǝ gùú bǝ̃ǝ̃gɩ-i! Wù mãã ɲì tuɔra gùú nã mãã, bíyà-yǝ gùú bǝ̃ǝ̃gɩ-i!

7 Cobɩblayǝẃ nǝ̃nǝ̃ǝ̃ wù hlũũgɩ nã, nǝ̃ wuucĩɛ̃yǝẃ nǝ̃nǝ̃ǝ̃ wù kãnɩmmã nã! Wú ver Fɩraa-Dũnnũw nãã: wù ji sɔ̃ wù hujãndi. Wú ver yì Dũnnũw nãã, nã̀ã wa wù mǝ̃gaa wù ce dũndɔw piyɛ̃.

8 Sulammã nã, Fɩraa-Dũnnũẁ waa wà: «Ɲì kãnɩmmã sǝ mǝ̃̀ kãnɩm, nǝ̃ mǝ̃̀ hlũsǝrɩ sǝ mǝ̃̀ hlũsǝ.

9 Drɔkuɔlɩ̀ háará ǹ-maa ɲũũrũũgu. Gùú tammã dɩnmã nã-i, mã́ã yo mǝ̃̀ hlũsǝrɩ́ ba ɲì dǝl'n yuugɩ nã, nǝ̃ mǝ̃̀ kãnɩmmã́ ba ɲì mǝ̃gãm'n yuugɩ nã.»

10 Sulammã nã, duɔgu nǝ̃ dɔtrããgà hlǝ drɔgu. Ɲã̀ sǝ̃n ver gɩ̀ sùɔ́gɩ nã nã́ã́ ɲã sáa ce cɔ̃m: ɲã̀ sĩĩ hlɔ̃mmã, ɲã̀ dii sãmmã mã̀ nã, nã̀ã ce ɲin'n tunɲã́ pa. Gɩ̀-lǝ gɩ̀ nã, ɲã̀ hã cwaaba nǝ̃ dudusǝri nã̀ã ba ɲã̀ hã-ba nǝ̃ wuuri.

11 Mǝ̃̀ cãwanĩɛ̃ yo, gá nǝ̃ nnĩĩ-i, gàá mãã gà hlǝ mǝ̃̀ nũɔ̃gɩ nã: gà sǝ̃n ver ǹ-jo mǝ̃̀ nãã nã́ã́ ga sáa ce cɔ̃m, nã́ã́ ga sáa ce mǝ̃̀ yisɩnã cɔ̃mmã nã̀ã ce mǝ̃̀ tĩɛ̃rɩ́ suu.