Esayi (Esaïe) 53

Gùú Dũnnũ cãwandii mãã yi yáá yì waa-dǝ, halii hṹɔ̃lã́-dǝ? Fɩraa-Dũnnũẁ pɩ́gará wù nãkruɔgu ǹ-ja halǝmblǝ-i?

2 Nã̀ã wa mããcierẁ vǝ̃́ǝ̃lã́ Fɩraa-Dũnnũ yigagɩ nã, nã́ã́ tubikusɩrĩɛ̃-i, nã́ã́ gbarnĩĩw mãã wù pa hlɔ̃nkuulammã nã. Wù sáá nǝ̃ faa yindagǝ nã ǹ-ba wù hãnãã wù blǝ yì yinɲã; faa'n sáá wù nã, gùú mãã gɩ̀ dwal yì nã.

3 Cwaabà díɛlá-yǝ nã̀ã hla-yǝ, curow yáá, wùú mãã wù da jaamã, wùu mĩɛ̃ nǝ̃ ywaruugu, wù yáá wù hlǝ curow mãã, curo'n sǝ̃n caa wú ne-yǝ: yi díɛlá-yǝ, yi yáá yì ne wú ba mǝ̃ǝ̃lǝ̃ǝ̃yo-i.

4 Nǝ̃ halle ǹ-da wà yi níé wú ba curow mãã Dũnnũ wùu piir-yǝ, ǹ-mũũ-yǝ, nã̀ã dii ciiri wù nã, wù túulá hãmĩĩ ywaruugɩ-i, gùú jaamã nǝ̃n yáá mã̀ saa nǝ̃-yáà, wù hyã́llã́-mã.

5 Nǝ̃ wù-lǝ, wù yáá wùu kɔsuɔ yì yuɔrɔm'n cɔ̃mmã nã, ǹ-karaa yi yúɔrúɔ nǝ̃ gàá mãã, gà cɔ̃mmã nã: piirɩmmãã mãã mã̀ hã-yáà nǝ̃ sɩsɩrãmmã, mã̀ dúrúu wùú drɔ-i, nǝ̃ yi da hihinǝ̃mmã wù kɔsɔm'n nɔ̃nɲã nã-i.

6 Yì min yi yáá nã́ã́ tũmbiibaa nǝ̃n váaláa: curo wo curo wù vĩɛ̃ wù dǝ'n hlũũgɩ nã, nǝ̃ Fɩraa-Dũnnũẃ fǝ̃ǝ̃ ǹ-ce yì min yi yúɔrúɔ nǝ̃ gàá mãã, gá duruu wù drɔ.

7 Bà kã́nnã́-yǝ, wù hɩ́rrǝ́ wù hla nǝ̃ wù sáa haa-gǝ, nã́ã́ tũmblɩw mãã bà kã nǝ̃-yǝ ɲããkosuɔgɩ nã, nã́ã́ tũmblɩ kũnkunĩĩ-i, wù kwaasǝbǝriɛba saa, wù sáa haa-gǝ.

8 Bà blǝ́rá-yǝ, ǹ-jar wù sugolli, ǹ-ce wù cɔ̃mmã, nǝ̃ wù brǝntaaba sǝ̃ǝ̃nã, halii yáá jã wù cɔ̃mmã? Sulammã nã, bà híilá-yǝ nũmǝ̃nãtaa'n cuuw nã, bà mṹũlã́ ǹ-ko-yǝ wù bluu'n gaabɩbliɛ'n cɔ̃mmã nã.

9 Bà hlã-yǝ nǝ̃ pĩɛ̃nditãnfieri cobaliɛba sǝ̃ǝ̃nã, kúúgɩ nã, bà díilá-yǝ nǝ̃ gbaalaaba, nã̀ã da wù sáa ce hyadũgaacie, nǝ̃ vuuram'n sáa hlǝ wù nũɔ̃gɩ nã.

10 Nǝ̃ Fɩraa-Dũnnũw cáalá wà ywaruugɩ́ karaa wù nã. Nǝ̃-ń ce wù nũmǝ̃nãsǝrɩ́ ba yuɔrɔm'n siimã, wù ji da furũũgu nã̀ã ji ba nũmǝ̃nãw ǹ-hǝ̃ǝ̃sǝ, nǝ̃ ǹ-ta wù-lǝ wù nã Fɩraa-Dũnnũ kusunã cɔ̃mmã́ ji suu.

11 Wù mãã wù gbǝ̃́ǝ̃lã́ ǹ-hũɔ̃ ywaruugu, wù ji da gbɩgbaamã nǝ̃ wù yinɲã́ yu. Mǝ̃̀ mããcierw, wuusũɔ̃lhuhoryǝw, wù ji ce cocindɩ́ ba cosũɔ̃lbaba; nã̀ã wa wù hyã́llã́ bà gaacĩɛ̃yaga.

12 Gùú cíé mǝ̃̀ dii-yǝ baagǝ̃ngĩɛ̃'n tɩntãlũũgu sǝ̃ǝ̃nã-i. Wù ji kã bá yuɔ ɲããtaa'n gbaasǝri nǝ̃ fãngãtaaba. Sulammã nã, wù hṹɔ̃lã́-dǝ bà sáa guur-yǝ sǝ, ǹ-ku nǝ̃ bá dii-yǝ cobaliɛba sǝ̃ǝ̃nã. Wù hyã́llã́ cocin'n gaacĩɛ̃yaga, nã̀ã dii wù nũɔ̃gu yuɔrɔtaa'n cɔ̃mmã nã.