Esayi (Esaïe) 40

Ɲì Dũnnũẁ waa wà: «Púɔrà, púɔrà mǝ̃̀ bluuba,

2 bláà ɲì waa cɔ̃mmã nǝ̃ Serusalɛmgu blanãmmã nã, bláà ɲì tu nǝ̃-gǝ wà gɩ̀ mããcegbǝ̃ǝ̃m'n bǝ̃ǝ̃gɩ tĩ́ɛ̃́, wà gɩ yúɔrúɔ nǝ̃ dìí mãã, dɩ̀ dũndɔw cíé, wà wu díɛ́ wù gaacĩɛ̃yaga min ǹ-hlǝ Fɩraa-Dũnnũw saa.»

3 Curodiɛw nàa wù hiil wù yalli wà: «Mǝ̃́garà Fɩraa-Dũnnũ hlũũgu jerkwaarɩ nã, sɔkuulaa gúɔ̀ nã, cíyà hlũũguu mãã gùu mǝ̃gaa ǹ-sũɔ̃l, ɲí hã yì Dũnnũw!

4 Jɔ̃nɲã min ɲã̀ ji gbǝraa, tãnũnɲã nǝ̃ tãmbiiga min ɲã̀ ji hɩrǝǝ. Joriɛga min gà ji hɩrǝǝ, nǝ̃ tɩntalɩm'n sɔsǝrɩ min dɩ̀ ji cesǝ ǹ-ba dɩ̀ vanãã.

5 Gɩ̀-lǝ gɩ̀ nã, Fɩraa-Dũnnũ yuuntasǝ'n gbɩgbaamã̀ ji da, cwaaba min bà ji da-mã. Fɩraa-Dũnnũw nũɔ̃gɩ̀ wáalá dìi, dɩ̀-i nnĩĩ nã.»

6 Curodiɛẃ nàa wù waa wà: «Waa cãwandarǝ!» Mǝ̃́ siɛ wà: «Mǝ̃̀ saa mǝ̃́ waa hadɩ-i?» «Curow, wú nǝ̃ nã́ã́ hĩɛ̃-i, wù faagɩ min gɩ́ nǝ̃ nã́ã́ fuga'n hyãplum-i.

7 Fɩraa-Dũnnũ saluugɩ-ń, hĩɛ̃gɩ̀ kuul, plummã̀ hlɔnãã. Sulammã nã, cwaabá nǝ̃ nã́ã́ hĩɛ̃-i:

8 hĩɛ̃gɩ̀ kuul, plummã̀ hlɔnãã, nǝ̃ hãmĩĩ Dũnnũ cãwandɩ́ nǝ̃ fɩraa-i.»

9 Yugo tãnũdɩdaalaadagǝ, Siyɔ̃ lǝ, ń waa cɔ̃ndudwalɩmmã! Serusalɛm, haar ǹ yalli nǝ̃ fãngããgu, ń waa cɔ̃ndudwalɩmmã! Haar ǹ yalli, báa sɔ̃ cɔ̃m nã! Waa nǝ̃ Suuda yiɛ'n liɛga wà «Ɲì Dũnnũ wɩ̀-i nnĩĩ nã!»

10 Cuutiiw, Fɩraa-Dũnnũw, wù jo nǝ̃ fãngããgu, wù nãkruɔgɩ hã-yǝ nǝ̃ fãngãtasǝri. Wù díɛ́ gùu, wù ver wù jo nǝ̃ gɩ̀-i, wù ver wù jo nǝ̃ wù ywaruu'n sol-i.

11 Wù ji blǝ wù kuruɔgɩ nã, wanciin'n tammã, wù ji tuu tũmbiibaa wù nãkrɔnɲã nã, nã̀ã piɛ-ba wù dǝ̃ngũũgɩ nã; tũmbaa mãã nǝ̃ biiba bà ŋmãsã, wù ji ta bà yigagɩ nã.