Esayi (Esaïe) 9

Gùú cwaabaa nǝ̃n yáá bà wáà dudũũmã nã, bà díɛ́ gbɩgbaamcindamã. Bàá nǝ̃n yáá kuududũũmã nã, gbɩgbaamdaamã̀ cáaláa bà drɔ.

2 Yitii, ce ǹ yiɛntaabá ɲũrũɔ̃, piɛ kuu bà dudwalɩmmã nã; bà ce kweyi-kweyiw ǹ yigagɩ nã, nã́ã́ bà mãã ce-yǝ dũtɩgibǝ̃ǝ̃gu nĩĩgu mãã, nã́ã́ bà mãã bà ce kweyi-kweyiw dalaa'n yuɔm'n bǝ̃ǝ̃gu nĩĩgu mãã.

3 Nã̀ã wa, gùú tuuli nǝ̃n yáá wù yuugɩ nã, gùú valuugu nǝ̃n yáá gɩ̀ kuul wù furũũgu, wùú mãã wù díɛ́-yǝ, wù valblɩri, ǹ káráa ɲã̀ nã nã́ã́ ǹ cíé-dǝ, ǹ-gbǝ̃ǝ̃ Mãdiyã yiɛntaaba nã nĩĩgu mãã.

4 Viɛtaagǝ viɛtaagǝ mãã gɩ̀ díilá byarcesuɔgɩ nã nǝ̃ kuulaa kuulaa mãã wù binǝ̃ǝ̃ twammã nã, ɲã̀ ji dii dǝ̃ǝ̃mã nã ǹ-cin cuugu.

5 Nã̀ã wa, tãnkuurdiɛẁ húulá yì saa, Dũnnũẁ hlã-yáà nǝ̃ biɛnĩĩ, fãngãtasǝrɩ̀ ji ba wù saa; bà ji ba bà be-yǝ Cɔ̃nfǝ̃hããrfɩnfayǝ, Fãngããgɩmintii-Dũnnũ, Tiiyǝw mãã Fɩraa, Sɩsɩrãm'n Yuuntigǝ̃ngã'n Biɛw.

6 Wù ji pisɩrĩɛ̃ fãngãtasǝrɩ nã nã̀ã jo nǝ̃ sɩsɩrãmmãã mãã mã̀ sǝ nǝ̃ kǝr. Wù ji jiraa Dawuda yuuntasǝ'n guujirakuugu drɔ, nã̀ã ba wù fãngãtasǝ'n yiɛ'n yigagɩ nã. Wù mãã wù ji ce bá ba bà wáà hlũũgu, nã̀ã ce bá ba sũɔ̃lɩmmã nã, gùú ji ce wu ba wù ji kra gɩ̀ nã, nã̀ã ce gɩ́ ba nǝ̃ kɩkǝmmã ǹ-tuu kuɔkuɔgu nǝ̃ fɩraa: wù ji ba wù pɛ yiɛ gúɔ̀gɩ nã, nã̀ã ce gɩ́ hiraa dɩ̀ dɩndɩ nã ǹ-vaa nǝ̃ hlũũgu, nǝ̃ sũɔ̃lɩmmã. Cuutiiẁ ji ce díɛ̀-i ǹ-pɩgaa wà cwaa'n cɔ̃m'n dudwalɩm híyã̀ wù hiɛga.