Esayi (Esaïe) 6

Yuuntigǝ̃ngã Osiyasɩ kúúblɩri, mǝ̃̀ díɛ́ Yitiiw wùu jiraa yuuntasǝ'n guujirakuudagǝ nã gùu mǝ̃gaa ǹ-haar; wù kuulaa nũɔ̃gɩ̀ yáá gùu yu Dũnnũ bũũduugu.

2 Mɛlɛgɛbaa mãã bà be-ba serafɛ̃ba, bà yáá wù yuu'n yiɛgu. Bà yáá hawɩ-i hawɩ-i yo nǝ̃ tãmpɩrãn nãndien: bà yáá bà suu bà yigagɩ nã nǝ̃ ɲã̀ hǝ̃ǝ̃lɲã, ɲã̀ hǝ̃ǝ̃lɲã́ ba ɲã̀ suu bà vyanɲã nã, nã̀ã ba bà yuu nǝ̃ ɲã̀ hǝ̃ǝ̃lɲã.

3 Bà yáá bà kaasǝ nǝ̃ bà ɲĩɛ̃ wa: «Yiyalɩmmã, yiyalɩmmã, Fɩraa-Dũnnũw nǝ̃ yiyalɩmmã nã, Cuu yuuntiiw! Wù yuuntasǝ'n gbɩgbaamã̀ yúú ɲũũrũũgɩ min!»

4 Bà yaliɛgaa mãã gà yáá gà hlǝ, gá ce flagá du nã ǹ-ba gà saaraa gà bɩmbãnĩɛ̃ga nã, Dũnnũ bũũduugɩ min gɩ́ juo yu nǝ̃ ɲũɔ̃sǝri.

5 Gɩ̀-i, mǝ̃́ fǝ̃ǝ̃ ǹ-waa wà: «Mǝ̃̀ cɔ̃mmã̀ tĩ́ɛ̃́, hujãncɔ̃mmã̀ ji hi-m! Nã̀ã wa curo-i nǝ̃-m, wùú mãã wù nɔ̃biɛnɲã sǝ yiyalɩmmã nã. Mǝ̃́ nǝ̃ mã̀ã juo ba cwaabaa mãã bà nɔ̃biɛnɲã sǝ yiyalɩmmã nã, bà sǝ̃ǝ̃nã nǝ̃ mǝ̃̀ yinɲã́ da yuuntigǝ̃ngãw, Fɩraa-Dũnnũw, cuu yuuntiiw!»

6 Nǝ̃ gɩ̀-lǝ gɩ̀ nã, serafɛ̃diɛẃ yuu ǹ-jo mǝ̃̀ nãã, nǝ̃ dãncaari, wùu tuu-dǝ siijãnkuugu drɔ nǝ̃ pɛ̃nsɩbiidaba.

7 Wú juo jĩɛ̃ mǝ̃̀ nũɔ̃gɩ nã nǝ̃-dǝ, nã̀ã waa wà: «Díɛ̀dɩ̀ mãã dɩ̀ jĩ́ɛ̃lã́ ǹ nɔ̃biɛnɲã nã, ǹ yúɔrúɔ nǝ̃ dìí mãã, dɩ̀ pyárrá ǹ yuunã, nǝ̃ ǹ diicĩɛ̃rǝ dũndɔ yo, wú ce.»

8 Mǝ̃̀ nṹɔ̃́ Yitiiẃ waa wà: «Mǝ̃̀ ji tĩɛ̃ halǝmblǝ-i? Halii ji kã yì sùɔ́nãw?» Mǝ̃́ siɛ-yǝ wà: «Mã́ã-i nnĩĩ, tĩɛ̃-m!»