Saburw (Psaumes) 22

Sabur 22

Dawuda hlǝ̃ǝ̃gu, gɩ̀ hlǝ́rá hlãnhyarriɛ'n yuuntii'n sɛbɛw nã-i. Gɩ̀ saa gɩ́ hyar gũnguɔ gúɔ̀ nã-i: «Cǝ̃ǝ̃w, taa'n kaalammã nã».

2 Mǝ̃̀ Dũnnũ, mǝ̃̀ Dũnnũ, hamã nã-i ń nǝ̃nǝ̃ǝ̃ mǝ̃̀ nã? Hamã nã-i ń ba ǹ hal mǝ̃̀ nãã, ǹ sǝ̃n pɛ mǝ̃̀ nã, ǹ sǝ̃n nɔ̃ mǝ̃̀ mããjaamã?

3 Mǝ̃̀ Dũnnũ, mǝ̃-ń ce mǝ̃́ kaasǝ bǝciigǝgu, nǝ̃ ǹ sǝ̃n siɛ-m, yisuɔgu, nǝ̃ mǝ̃̀ sǝ̃n da fiisaagu.

4 Nã̀ã da, ń nǝ̃ yalla, ń nǝ̃ nã̀ã jiraa Isɩrayɛl bluu'n bɩnǝ̃m'n hlãnɲã sǝ̃ǝ̃nã.

5 Yì tǝvũnvãnããbà yáá bàa piɛ bà nãkruɔgu yíi drɔ-i: bà yáá bà piɛ bà nãkruɔgu ǹ drɔ, nǝ̃ ń ba ǹ hiil-ba nãkrɔnɲã nã.

6 Bà yáá bà kaasǝraa bà be-n, nã̀ã ba bà da korɩmmã; bà yáá bà piɛ bà nãkruɔgu ǹ drɔ, bà sáá bà da cir.

7 Nǝ̃ mǝ̃n-lǝ tɩtɩrǝ̃-i nǝ̃-m, curo'n blɩ sǝ nǝ̃-m, cuu cwaa'n ciir-i nǝ̃-m, wùú mãã cwaabà diɛ-yǝ.

8 Bà min mãã bà da-m, bà hiil mǝ̃̀ kwãmmã nã, bà ɲã bà kaasǝraa, bà mɛ̃sã bà yunɲã.

9 Bà waa mǝ̃̀ cɔ̃mmã wà: «Wù píɛlá wù nãkruɔgu Fɩraa-Dũnnũw nã! Wù cɔ̃mmã̀ mãã mã̀ dwal Fɩraa-Dũnnũw nã, wú kor-yǝ, wú hiil-yǝ nãkrɔnɲã nã!»

10 Ũwũũ, ǹ cíé mǝ̃́ hlǝ mǝ̃̀ ɲũ kusuugɩ nã, ǹ ɲã́llã́ mǝ̃̀ nã wù dǝ̃ngũũgu drɔ;

11 mǝ̃̀ kúsúu'n tuum'n bǝ̃ǝ̃gu dìi, yíi bla ǹ cii mǝ̃̀ nã, mǝ̃̀ yíilǝ́ ǹ-ba mǝ̃̀ ɲũ kusuugɩ nã yíi bla mǝ̃̀ Dũnnũw.

12 Yigaɲǝ̃ǝ̃bǝ̃ǝ̃gɩ-ń hi, báa hal mǝ̃̀ nã, gùú nã mãã curo'n sǝ̃n jo wù ji pɛ mǝ̃̀ nã!

13 Ɲããtaacindɩ́ nìɛ dìi caliɛ mǝ̃̀ nã nã́ã́ ninbliɛ-i, ninbliɛbɩbliɛbá nìɛ bàa caliɛ mǝ̃̀ nã.

14 Bà gbáará bà nɔ̃nɲã nã mǝ̃̀ yuunã, nã́ã́ jarabaa mãã bà fa bà jãrãã, nã̀ã ba bà hugũɔ̃.

15 Mǝ̃̀ fãngããgɩ́ nìɛ gɩ̀ maar nã́ã́ hũmmãã mãã mã̀ sɔ̃ nĩĩgu, mǝ̃̀ kukuunɲã min ɲã́ nìɛ ɲã̀ buruɔ; mǝ̃̀ hiɛgá nǝ̃ nã́ã́ sakɩm-i, mã̀ hãnãã mǝ̃̀ kusuugɩ nã.

16 Mǝ̃̀ fãngããgɩ̀ kuul nã́ã́ mǝ̃raa'n jaari, nǝ̃ mǝ̃̀ nãmbendɩ́ ɲǝ̃gãr mǝ̃̀ nɩgarɩngaagɩ nã; ǹ cíé mǝ̃́ ba kúú'n huruugu.

17 Ũwũũ, vambá nìɛ bàa caliɛ mǝ̃̀ nã, cobaliɛ'n kuruɔdaagɩ́ nìɛ bàa pɛ̃-m; bà kǝ̃́ǝ̃lã́ mǝ̃̀ nãkrɔnɲã nǝ̃ mǝ̃̀ vyanɲã.

18 Mǝ̃̀ ji gbǝ̃ǝ̃ ǹ-pɩgaa mǝ̃̀ kukuunɲã min; bà-lǝ, bá nìɛ bàa piɛ bà yinɲã mǝ̃̀ drɔ, bà ne-m,

19 bà buruɔ mǝ̃̀ kuulanãmba nã, bà dii trãga ǹ-fǝ̃ǝ̃ wùú mãã wù ji tuu mǝ̃̀ kuulaaw.

20 Nǝ̃ Fɩraa-Dũnnũ yíǹ-lǝ, báa hal! Yíi mãã mǝ̃̀ fãngããgu, jo ǹ gbɩraanã ń ji pɛ mǝ̃̀ nã.

21 Cii mǝ̃̀ yuflǝw nã nǝ̃ dãngunã kuugu! Cii mǝ̃̀ nũmǝ̃nãsǝrɩ nã nǝ̃ gɩ̀ vam'n ɲirãnɲã!

22 Kor ń hiil-m gɩ̀ jaraba nɔ̃nɲã nã nǝ̃ gɩ̀ jer'n nin'n yenĩɛ̃ga nã! Ǹ síɛlá-m!

23 Mǝ̃̀ ji tu ǹ yiirɩ nã ǹ-ja mǝ̃̀ cwanããba, mǝ̃̀ ji bɩnǝ̃ǝ̃ ǹ nã cohuɔgu sǝ̃ǝ̃nã.

24 Ɲi mãã ɲi sɔ̃ Fɩraa-Dũnnũw nã, bláà ɲì bɩnǝ̃ǝ̃ wù nã! Yakuba furũntaa ɲimãã min, bláà ɲì bũũ-yǝ! Bláà ɲì ɲãnãã wù yigagɩ nã, Isɩrayɛl furũntaa ɲimãã min!

25 Sulammã nã, wù sǝ̃n diɛ, yindagǝ nã ǹ-hla hujãncɔ̃mntiiw wù hujãncɔ̃mmã nã, nǝ̃ wù sǝ̃n ŋmǝ̃ǝ̃rǝ̃ǝ̃ wù yigagɩ nã nǝ̃-yǝ, nǝ̃ wu-ń ba wù kaasǝ nǝ̃ wù yiiri, wù nɔ̃ ǹ-hã-yǝ.

26 Cohuɔgu sǝ̃ǝ̃nã, mǝ̃̀ ji ba mǝ̃̀ hyar hlãnɲã mǝ̃̀ bɩnǝ̃ǝ̃ yíi nã-i, mǝ̃̀ mãã mǝ̃̀ caa dìi, mǝ̃̀ ji ce dɩ́ suu bàá mãã bà sɔ̃ ǹ nãã, bà yigagɩ nã.

27 Hujãncɔ̃mntaabà ji wuu ǹ-ye, bàá mãã bà caa Fɩraa-Dũnnũw, bà ji ba bà bũũ-yǝ. Bá ba nũmǝ̃nãw pyandiɛ!

28 Ɲũũrũũ coplaaga min gà ji ba gà kãnãã Fɩraa-Dũnnũ cɔ̃mmã nã, nã̀ã ba bà ver bà jo wù nãã, cuu coplaaga min nũɔ̃ntaabà ga juo kuulǝǝ ǹ yigagɩ nã ǹ-bũũ-n,

29 nã̀ã wa fãngãtasǝrɩ́ nǝ̃ Fɩraa-Dũnnũ saa-i: wù fãngãtasǝrɩ́ nǝ̃ coplaaga min drɔ-i.

30 Ɲũũrũũ cogǝ̃ngĩɛ̃ba min bà ji wuu wuuri nã̀ã kuulǝǝ ǹ-bũũ-yǝ; bà min mãã bà ver hlɔ̃mmã nã, bàá mãã bà síì gbǝ̃ǝ̃ ǹ-ba nũmǝ̃nãw, bà ji tɩsɩnǝ̃ǝ̃ wù yigagɩ nã ǹ-bũũ-yǝ.

31 Bà furũntaabà ji ce mããcemmã ǹ-hã-yǝ; bà furũntaa'n furũntaabà ji ba bà waa Cuutii'n cɔ̃mmã.

32 Bàá mãã bà ji huu furũũgɩ nã, bà ji taa wù cíé dìí mãã ǹ-kor wù bluuba.