Sabur 19
Dawuda hlǝ̃ǝ̃gu, gɩ̀ hlǝ́rá hlãnhyarriɛ'n yuuntii'n sɛbɛw nã-i.
2 Drɔkuɔlɩ̀ taa Dũnnũ yuuntasǝ'n cɔ̃mmã, ŋmĩɛ̃ga min gà tu wù diicerǝdɩ nã.
3 Yuu wo yuugɩ̀ waa-dǝ gɩ̀ ja gùú yuuguu mãã gɩ̀ duu nã, nǝ̃ yisuɔ wo yisuɔgɩ́ ba gɩ̀ tu-dǝ, gɩ̀ ja gùú yisuɔguu mãã gɩ̀ duu nã.
4 Gɩ̀ sǝ nã́ã́ ɲã waa cãwan-i cwaa'n yinɲã nã, cãwaayii sǝ, tũɔ̃gɩ̀ sǝ̃n nɔ̃ dul nã.
5 Nǝ̃ ɲã̀ cãwandɩ̀ híí cuuw min, ɲã̀ cãwan'n tammã̀ fǝ̃́ǝ̃lã́, ǹ-maar gà hi cuu nũɔ̃gu. Drɔkuɔlɩ nã, Dũnnũẁ cíé kuɔli ǹ-hã bǝ̃ǝ̃gu.
6 Ciibǝǝgu, gɩ́ fǝ̃ǝ̃ ǹ-hlǝ nã́ã́ blanĩĩflãmw mãã wù hlǝ wù duugɩ nã, wùu ba susũɔ̃rkũnkonblaw mãã dudwalɩmmã nã, wù tɩgɩnǝ̃ǝ̃ wù jo wù ji sɔ̃.
7 Gɩ̀ suro drɔkuɔl'n nũɔ̃daagɩ nã, ǹ-faal gɩ̀ susɔ̃lli gɩdaagɩ nã: kuu'n sǝ̃n tar gɩ̀ vuvǝ̃ǝ̃mã nã.
8 Fɩraa-Dũnnũ hlũũgɩ́ nǝ̃ gùu jalliɛ, gɩ̀ hã curow nǝ̃ fãngããgu wú ba nũmǝ̃nãw; Fɩraa-Dũnnũẁ mãã wù waa cɔ̃m wo cɔ̃m, sulam-i, wùú mãã wù sǝ nǝ̃ cɔ̃nfǝ̃ǝ̃gǝgu, wù hã-yǝ nǝ̃-gǝ.
9 Fɩraa-Dũnnũẁ mãã wù hiil cɔ̃m wo cɔ̃m, mã́ nǝ̃ mã̀ã sũɔ̃l, mã̀ jo nǝ̃ kweyi-kweyiw hiɛga nã; Fɩraa-Dũnnũẁ mãã wù kra gàá nã mãã, gá nǝ̃ gàa sũɔ̃l, gà hiil gbɩgbaamã yinɲã nã.
10 Ǹ-sɔ̃ Fɩraa-Dũnnũw nã, gɩ́ nǝ̃ gùu yiyalɩmmã, gɩ̀ sɔ̃llɩ́ nǝ̃ pyandiɛ-i; Fɩraa-Dũnnũ sugojaruugu, sulam-i, gɩ̀ min gɩ́ nǝ̃ gùu sũɔ̃l.
11 Gɩ̀ kuusǝ ǹ-maa sãnãw, ǹ-maa sãnã kwakwaari; gɩ̀ dwal ǹ-maa salli, halle ǹ-maa sallii mãã dɩ̀ sáa hyã.
12 Gùú sugojaruuguu híilà gbɩgbaamã gɩ̀ hã ǹ mããcier yo; gùú mãã tii wù bũũ-gǝ, wù pãllɩ nǝ̃ dugɔ.
13 Cwaaba min bà pe, bà sǝ̃n fǝ̃ǝ̃: mǝ̃̀ mãã mǝ̃̀ sáa fǝ̃ǝ̃ nã̀ã pe nǝ̃ gàá mãã, ce mǝ̃̀ dũndɔw.
14 Báa ya mǝ̃́ kuganãã buɔnhlantaaba nã, ce ba báa hi mǝ̃̀ nã. Gɩ̀-lǝ gɩ̀ nã, mǝ̃̀ síì ba nǝ̃ wanyuɔrɔm'n sùɔ́, nǝ̃ bà síì gbǝ̃ǝ̃ ǹ-bǝr ǹ-dii mǝ̃̀ nã nǝ̃ diigbǝ̃ǝ̃rǝdarǝ.
15 Mǝ̃̀ wáalá kuu wo kuu, nã̀ã kãn-gǝ ǹ yigagɩ nã, gɩ́ dwal ǹ nã, Fɩraa-Dũnnũ yíi mãã mǝ̃̀ tɩntalɩmmã, mǝ̃̀ nɔ̃hũɔ̃rw.