Saburw (Psaumes) 2

Sabur 2

Hamã nã-i, coplaaga min gá suro ǹ-gaala kuugɩ nã? Cwaa báà min bà jar dàa-i.

2 Gà yuntaagǝ̃ngĩɛ̃bá nìɛ bà tɩgɩnǝ̃ǝ̃ byarciegǝgɩ nã, gà yuntaagǝ̃ngĩɛ̃'n byanããbá nìɛ bà da bà ɲĩɛ̃ Fɩraa-Dũnnũw yuunã, nǝ̃ wù níé ǹ-hiil gùú yuuntigǝ̃ngãw mãã wù yuunã, bà waa wà:

3 «Jówà yí fa yí jãrãã bà fãngãã'n ɲĩĩnǝ̃nããba nã, yí hiil yì hla bà fãngããgɩ nã!»

4 Wùú mãã jirammã nã wù drɔkuɔlɩ nã, wú ba wù ɲã, Fɩraa-Dũnnũẁ hiil bà kwãmmã nã.

5 Nã̀ã ji wanãã nǝ̃-ba hyadũũgɩ nã, wù hyadũũgɩ́ ce bá ba bà ɲãnãã.

6 «Mǝ̃n-lǝ mã́ã kárrá mǝ̃̀ yuuntigǝ̃ngãw nã Siyɔ̃ lǝri, mǝ̃̀ tãnũũgɩ nã mãã mã̀ã hiil-gǝ gɩ̀ dǝ!»

7 Fɩraa-Dũnnũẁ mãã wù caa dìi, yáalà mǝ̃́ juo tu-dǝ ǹ-ja-ɲã́ã̀. Wù wáalá nǝ̃-m wà: «Mǝ̃̀ bíɛ́-i nǝ̃-n, mǝ̃̀ húulá-n jimããgu!

8 Cirǝ̃ǝ̃ coplaaga nã mǝ̃̀ saa, mǝ̃́ hã-n nǝ̃-ga, gá ba ǹ sùɔ́'n yuɔri. Cuu hlɔ̃mmã min mã̀ ji ba yíi mǝ̃gãm-i.

9 Ǹ ji karaa bà nã nǝ̃ kwal'n valuugu, ǹ ji mũũraa bà nã nã́ã́ gbaflǝ-i.»

10 Nǝ̃ yindiɛ, yuntaagǝ̃ngĩɛ̃ ɲimãã, bláà ɲì wáà nǝ̃ yigakaalagǝgu, ɲũũrũũ sugojarriɛ ɲimãã, yáalà bá dii-ɲã́ã̀ hlũũgɩ nã!»

11 Bláà ɲì ce mããcemmã ɲì hã Fɩraa-Dũnnũw wù yigansɔ̃llɩ nã, nǝ̃ ɲí ba ɲì ce kweyi-kweyiw ɲì ɲãnãã.

12 Kúulǝ̀ǝ Biɛnĩĩ'n yigagɩ nã, wù hiɛga báa ji dũ, ɲí kurǝǝ yindiinw, nã̀ã wà, wù hyadũũgɩ̀ ji gbǝ̃ǝ̃ ǹ-blǝ nã nã́ã́ dǝ̃ǝ̃m-i. Bàá bà minw mãã bà da wanŋmǝ̃ǝ̃rǝ̃mmã Fɩraa-Dũnnũw saa, bà yunɲã̀ dwállá.