1 Rois 18

Gɩ̀ furũũgɩ nã, yuncindɩ́ juo ta, nǝ̃ gɩ̀ jáa wa gɩ́ ji da biiga siɛlga, Fɩraa-Dũnnũ cãwandɩ́ juo hi Eliw wà: «Kã n ga hiraa Akabɩ yigagɩ nã, nǝ̃ mǝ̃́ ce duɔgɩ́ nɔ̃ ɲì yiɛgu.»

2 Eliẃ ta wù kã Akabɩw nãã. Gɩ̀-lǝ gɩ̀ bǝ̃ǝ̃gu, ɲããwuunɲã min ɲã̀ yáá ɲã̀ã tã ǹ-tã Samari yiɛgɩ nã ǹ-car.

3 Akabɩ-lǝ, wú fǝ̃ǝ̃ ǹ-ce bá be wù suɔ'n yuuntii Abɩdiasɩw ǹ-hã-yǝ. (Nã̀ã da Abɩdiasɩẁ yáá wù sɔ̃ Fɩraa-Dũnnũw nã;

4 gùú nã mãã Sesabɛlẁ yáá wù ce bá ba bà ko bà guu Dũnnũ tanhiilaa nã, Abɩdiasɩẁ yáá wùu ŋmǝ̃ǝ̃rǝ̃ǝ̃ Dũnnũ tanhiilaa gundii nã (100), wù yáá wùu buruɔ bà nã, gwaahǝ̃ǝ̃l nǝ̃ nũɔ̃sɔ̃ nũɔ̃sɔ̃ tãnfliɛga nã, nã̀ã ba wù kã wù hã-ba nǝ̃ wuuri nǝ̃ hũmmã.)

5 Akabɩẃ waa nǝ̃ Abɩdiasɩw wà: «Jita yi ga waaraa yiɛ gúɔ̀gɩ min nã, yí dǝ̃ǝ̃ hũnnaalaaba min nǝ̃ jurjurǝǝba min. Gɩ-ń hyãl, yi ga da hĩɛ̃gu ǹ-val sǝ̃nsonããba nǝ̃ kwasǝnɲinɲãã mãã ɲã̀ tuu tuuyaga. Nã̀ã wa yi ji ko kwasǝnɲin ɲã́ã̀.»

6 Bá fǝ̃ǝ̃ ǹ-buruɔ ǹ-ta bà yiɛ'n waaraagu; Akabɩẃ ta wù dǝ'n hlũũ, Abɩdiasɩ yo, wú ta nǝ̃ gɩdagǝ.

7 Ǹ-ya Abɩdiasɩẃ ba hlũũgɩ nã, bá kãã jal nǝ̃ Eliw. Abɩdiasɩẁ gáa fǝ̃ǝ̃-yǝ, wú duruu ǹ-curǝǝ ɲũũrũũgu, nã̀ã waa wà: «Nã́ã́ mǝ̃̀ tii Eli yíi-i?»

8 Wú siɛ-yǝ wà: «Mǝ̃n-lǝ mã́ã-i, kã ń waa nǝ̃ ǹ tii Akabɩw wà Eliw júó.»

9 Abɩdiasɩẃ waa wà: «Mǝ̃̀ gáa ce diicĩɛ̃rǝ hadɩ-i nǝ̃ ń ba ǹ dii ǹ mããcierw Akabɩ nãkrɔnɲã nã? Wù ga ce bá ko-m!

10 Fɩraa-Dũnnũw nǝ̃ nũmǝ̃nã! Coplǝrdarǝ'n sɩriɛ, yindagǝ nã yuntaagǝ̃ngĩɛ̃'n yiɛdagǝ'n sɩriɛ gùú sùɔ́gu mãã mǝ̃̀ tii Akabɩẁ sáa tĩɛ̃ curoẃ kãã caa-n. Bà yáá ba-ń wa n sɩraa, wù yáá wù ce gɩ̀ coplǝrɩ, yindagǝ nã gɩ̀ yuuntigǝ̃ngã'n yiɛgɩ́ waasǝ wà ba sáa da-n.

11 Nǝ̃ yindiɛ, yín fǝ̃ǝ̃ ǹ-waa nǝ̃-m, wà mǝ̃́ kãã waa nǝ̃ mǝ̃̀ tiiw wà Eliw júó!

12 Mǝ̃-ń ji ta ǹ-hal ǹ nãã gùú nã mãã, Dũnnũ Yuflǝẁ ga juo tuu ǹ-ta nǝ̃-n binsùɔ́gɩ nã. Gɩ̀-lǝ gɩ̀ nã, mǝ̃-ń ga kãã waa nǝ̃ Akabɩw, nǝ̃ wù mãã wù sɩga juo da-n sǝ, wù ga ko-m. Nã̀ã da, mã́ã mãã ǹ mããcierw, mǝ̃̀ sɔ̃ Fɩraa-Dũnnũw nã, mǝ̃̀ pũmpǝrsǝ'n bǝ̃ǝ̃gu dìi.

13 Bà sáa waa nǝ̃ mǝ̃̀ tiiw, mǝ̃̀ cíé dìí mãã, gùú nã mãã Sesabɛlẁ yáá wù ko Fɩraa-Dũnnũ tanhiilaaba-ì? Mǝ̃̀ ŋmǝ̃́ǝ̃rǝ̃́ǝ̃ Fɩraa-Dũnnũ tanhiilaa gundii bà nã, tãnfliɛga nã, nã̀ã buruɔ bà nã gwaahǝ̃ǝ̃l nǝ̃ nũɔ̃sɔ̃ nũɔ̃sɔ̃ kurɔnɲã nã, nã̀ã ba mǝ̃̀ val-ba nǝ̃ wuuri nǝ̃ hũmmã.

14 Nǝ̃ yindiɛ, yíǹ fǝ̃ǝ̃ ǹ-waa nǝ̃-m wà mǝ̃́ kãã waa nǝ̃ mǝ̃̀ tii Akabɩw, wà Eliw júó! Wù ga ko-m.»

15 Eliẃ siɛ-yǝ wà: «Fɩraa-Dũnnũw mãã cuu yuuntiiw, mǝ̃̀ mãã wùú mãã wù mããcemmã nã, wú nǝ̃ nũmǝ̃nã! Jimããgu, mǝ̃̀ ji kãã hiraa Akabɩ yigagɩ nã.»

16 Abɩdiasɩẃ kã Akabɩw nãã ǹ-kãã ja-yǝ nǝ̃ dìí mãã dìɛ. Gɩ̀-i, Akabɩẃ fǝ̃ǝ̃ ǹ-ta Eli nãã.

17 Wù gáa yii ǹ-da-yǝ, wú waa nǝ̃-yǝ wà: «Yíi-i nnĩĩ, yíǹ-lǝ yíi jówà nǝ̃ hujãncɔ̃mmã Isɩrayɛl bluuba drɔ!»

18 Eliẃ siɛ-yǝ wà: «Mã́ã sǝ̃n gaala Isɩrayɛl yiɛgɩ nã. Nǝ̃ yíǹ-lǝ, yíi-i nǝ̃ ǹ suɔntaaba, ɲimãã cíyà-dǝ, ɲi mãã ɲì gáa nǝ̃nǝ̃ǝ̃ Fɩraa-Dũnnũẁ kárrá dìí nã ǹ-hã-ɲã́ã̀, nã̀ã ba ɲì duu dũnnũba nã mãã bà be-ba wà Baalba.

19 Yindiɛ, tɩgii Isɩrayɛl bluuba min mǝ̃̀ nãã, Karmɛl tãnũũgɩ nã, nǝ̃ dũnnũw mãã bà be-yǝ wà Baal wù tanhiilaa tũndii nǝ̃ gwaahǝ̃ǝ̃l nǝ̃ nũɔ̃sɔ̃w (450) nǝ̃ wùú mãã bà be-yǝ Asɩtarte wù tanhiilaa tũndiiw (400) mãã bà wuu Sesabɛl juwuukaagɩ nã.»

20 Akabɩẃ tĩɛ̃ tĩɛ̃ri ǹ-hã Isɩrayɛl bluuba min, nã̀ã tɩgii tanhiilaaba nã Karmɛl tãnũũgɩ nã.

21 Gɩ̀-i, Eliẃ fǝ̃ǝ̃ ǹ-kuganãã bà min nãã, nã̀ã waa wà: «Ɲi ji ba ɲì veraa cwaaba hǝ̃ǝ̃l sǝ̃ǝ̃gɩ nã ǹ-ga hiraa bii bǝ̃ǝ̃-i? Fɩraa-Dũnnũ nǝ̃n ba Dũnnũw, bláà ɲì duu wù nã! Baal nǝ̃n ba, bláà ɲì duu wù nã.» Curo'n sáa waa cɔ̃m bà sǝ̃ǝ̃nã.

22 Eliẃ waa nǝ̃-ba, mã́ã dɩn bla dìɛ Fɩraa-Dũnnũ tanhiilw, nǝ̃ Baal tanhiilaabá ba tũndii nǝ̃ gwaahǝ̃ǝ̃l nǝ̃ nũɔ̃sɔ̃ (450).

23 Bá jo nǝ̃ ninɲã hǝ̃ǝ̃lɲã ǹ-ji hã-yáà. Bá ne ǹ-hiil nǝ̃ǝ̃diɛ ɲã̀ sǝ̃ǝ̃nã, ǹ-bǝraa wù nã gugwa gugwa ǹ-piɛ danɲã nã, nǝ̃ ba báa dii dǝ̃ǝ̃mã. Mã́ã yo, mǝ̃̀ ji tɩgɩnǝ̃ǝ̃ nǝ̃ǝ̃diɛ wáá nã, ǹ-piɛ danɲã drɔ; mǝ̃̀ síì dii dǝ̃ǝ̃mã.

24 Nǝ̃ ɲí be ɲì dũnnũw. Mã́ã mǝ̃n ji be Fɩraa-Dũnnũw. Gùú dũnnũw-ń siɛ nǝ̃ dǝ̃ǝ̃mã, wù-lǝ wùú ji ba Dũnnũw.» Bà min bá siɛ wà: «Gɩ̀ sáalá!»

25 Eliẃ fǝ̃ǝ̃ ǹ-waa nǝ̃ Baal tanhiilaaba wà: «Ɲi mãã ɲĩ̀ĩ ɲũrũɔ̃, níyà ɲí hiil nǝ̃ǝ̃diɛ ɲi tɩgɩnǝ̃ǝ̃ wù nã dĩɛ̃lãmmã nã. Nǝ̃ ɲí be ɲì dũnnũw, nǝ̃ bláá dii dǝ̃ǝ̃mã.»

26 Bá tuu nǝ̃ǝ̃w mãã bà hlã-ba nǝ̃-yǝ ǹ-tɩgɩnǝ̃ǝ̃ wù nã. Nã̀ã juo ba bà be Baal yiiri ǹ-tuu ciibǝǝgu dìi ǹ-ji vaa nǝ̃ bǝciigǝgu, bà waa wà: «Baal, siɛ-yáà!» Nǝ̃ halle ǹ-da wà ba yáá bà sãlãã siijãnkuuguu mãã bà cíé-gǝ gɩ̀ yigagɩ nã, curo'n sáa nɔ̃ yal nã, curo'n sáa da siɛm.

27 Bǝciigǝgɩ nã, Eliẃ ba wù hiil bà kwãmmã nã wù waa wà: «Wù mãã dũnnũw, bláà ɲì kaasǝraa bolbol! Wù ga ba dàa wù kãn gɩdagǝ'n cɔ̃m-i, yindagǝ nã wù yigagɩ́ nàa gùu huu, yindagǝ nã wú nǝ̃ waal'n hlũũ nã-i. Yindagǝ nã wù ga ba dàa wù duɔsǝ-i, nã̀ã ji ba wù ji nĩĩ.»

28 Bá juo ba bà kaasǝraa bolbol, nǝ̃ ǹ-vaa nǝ̃ bà hlũũgu, bá juo ba bà taalaa bà hla nã nǝ̃ dãngunãba nǝ̃ haanɲã fuwɔ twammã ji ba mã̀ hlǝ bà nã.

29 Bǝ̃ǝ̃gɩ̀ gáa tar gùú nã mãã, bá ba bà be Baalw, nǝ̃ tãrãmmã hlo, ǹ-ji da bàa ga ba bà jãn siimã. Nǝ̃ curo'n sáa nɔ̃ yal nã, curo'n sáa nɔ̃ siɛm nã, curo'n sáa da cɔ̃m.

30 Gɩ̀-i, Eliẃ fǝ̃ǝ̃ ǹ-waa nǝ̃ bà min wà: «Kuganãã mǝ̃̀ nãã!» Bà min bá kuganãã wù nãã. Eliẃ mǝ̃gaa Fɩraa-Dũnnũ siijãnkuuguu mãã gɩ̀ yáá gùu hɩr.

31 Wú tuu tɩntrã nũɔ̃sɔ̃ nǝ̃ gà hǝ̃ǝ̃lga ǹ-vaa Isɩrayɛl nũɔ̃ntaa'n nũɔ̃sɔ̃ nǝ̃ bà hǝ̃ǝ̃lbaa mãã bà hlǝ́rá Yakuba byanããba nã, Yakubaw mãã Fɩraa-Dũnnũẁ yáá wùu waa nǝ̃-yǝ wà: «Bà ji ba bà be-n Isɩrayɛl-i.»

32 Wú tuu tɩntrã gáà ǹ-mã siijãnkuugu Fɩraa-Dũnnũ yiirɩ nã. Wú ce fuudagǝ ǹ-caliɛ siijãnkuugɩ nã, gùú mãã liitɩr yin ywargǝ tuugɩ̀ ji gbǝ̃ǝ̃ ǹ-jãn gɩ̀ nã.

33 Wú tɩgɩnǝ̃ǝ̃ danɲã nã, ǹ-bǝraa nǝ̃ǝ̃w nã gugwa gugwa ǹ-piɛ-yǝ danɲã drɔ.

34 Nã̀ã fǝ̃ǝ̃ ǹ-waa wà: «Yúrǝ̀ǝ gbafiɛga nnǝ̃ǝ̃ga nã, ɲi ji tũn siijãn kũɔ̃mã nã nǝ̃ danɲã nã.» Nã̀ã waa nǝ̃-ba wà: «Cíyà-dǝ yin hǝ̃ǝ̃lnãw.» Nã̀ã waa nǝ̃-ba wà: «Cíyà-dǝ yin siɛlnãw.»

35 Hũmmã́ juo ba mã̀ ta, ǹ-ji caliɛ siijãnkuugɩ nã nã̀ã yu fuu gúɔ̀ yo.

36 Siijãn bǝ̃ǝ̃gu, Dũnnũ tanhiil Eliẃ kuganãã nã̀ã waa wà: «Fɩraa-Dũnnũ, Ibramãw, Isiyaga bá nǝ̃ Isɩrayɛl Dũnnũ! Bá fǝ̃ǝ̃ jimããgu, wà yíi-i Dũnnũw Isɩrayɛlgu, nǝ̃ wà mã́ã-i ǹ mããcierw, nǝ̃ wà yíi kárrá dɩ̀ nã ǹ-hã-m mǝ̃́ ce díɛ̀!

37 Siɛ-m Fɩraa-Dũnnũ, siɛ-m, bluu báàbá da ǹ-fǝ̃ǝ̃ wà Fɩraa-Dũnnũ yíi-i, Dũnnũw, wà yíi vérrá bà hiɛgá jo ǹ nãã!»

38 Fɩraa-Dũnnũ dǝ̃ǝ̃mã́ juo bà mã̀ hlǝ drɔgu mã̀ duruu. Mã́ hyã kũɔ̃mã, danɲã, tɩntrãga nǝ̃ hlɔ̃mmã, nã̀ã kuul hũmmã nǝ̃n yáá dàa fuugɩ nã.

39 Bà gáa da dɩ̀-lǝ, bluu báà min bá duruu ǹ-curǝǝ ɲũũrũũgu nã̀ã waa wà: «Fɩraa-Dũnnũw-i Dũnnũw! Fɩraa-Dũnnũw-i Dũnnũw!

40 Eliẃ fǝ̃ǝ̃ ǹ-waa nǝ̃-ba wà: «Blǝ́rà Baal tanhiilaaba, wù dɩn yo wu báa tar!» Bá fǝ̃ǝ̃ ǹ-juo cu bà min nã. Eliẃ ce bá hɩr ǹ-kã Kisɔ̃ jurjurw nã, ǹ-kãã cǝ̃ǝ̃ bà bɔ̃nɲã.

41 Eli nã̀ã fǝ̃ǝ̃ ǹ-waa nǝ̃ Akabɩw wà: «Yuguraa ń kã n ga wuu nǝ̃ ń ɲũɔ̃, nã̀ã wa duɔgɩ́ nìɛ gɩ̀ du.»

42 Akabɩẃ yuguraa ǹ-kãã wuu nã̀ã ɲũɔ̃. Nǝ̃ Eli-lǝ wú yuguraa Karmɛl tãnũũ'n yuugɩ nã, ǹ-kãã tɩsɩnǝ̃ǝ̃ fuwɔ wù yuugɩ́ juo hlǝ wù gũn'n sǝ̃ǝ̃gɩ nã.

43 Nã̀ã fǝ̃ǝ̃ ǹ-waa nǝ̃ wù mããcierw wà: «Yuguraa ń ne lwaakɩnkan'n yiɛgu.» Mããcierẃ yuguraa ǹ-kãã ne nã̀ã waa wà: «Kuu'n sɩraa.» Eliẁ tĩ́ɛ̃lã́ wú kãã ne ǹ-ji da yin nɩrhǝ̃ǝ̃l.

44 Yin nɩrhǝ̃ǝ̃lnãw, mããcierẃ waa wà: «Yiiluubiidaagɩ́ nàa gɩ̀ hlǝ lwaakɩnkandɩ nã gɩ̀ yuguraa. Gɩ̀ sáa bũũ ǹ-maa nãkruɔgu.» Gɩ̀-i, Eliẃ fǝ̃ǝ̃ ǹ-waa nǝ̃-yǝ wà: «Kã ń ga waa nǝ̃ Akabɩw wà wú vaa wù sǝ̃nsonããba ǹ-ver ǹ-hɩr, duɔgɩ báa ji suu wù nã.»

45 Gɩ̀ jáa ce fiyãã, yiilunɲã́ suu drɔkuɔlɩ nã, saluugɩ́ suro, dɔbyardaarɩ́ juo nɔ̃. Akabɩẃ yugo wù sǝ̃nsuu wotorow ǹ-ta Sisɩrɛl lǝri.

46 Fɩraa-Dũnnũ nãkruɔgɩ́ juo ba Eli drɔ, wú vaa wù cãngbaagu, ǹ-ta Akabɩ sǝ̃nsuu wotoro yigagɩ nã fuwɔ ba ga hi Sisɩrɛl lǝ'n nũɔ̃gu.