2 Samuel 12

Fɩraa-Dũnnũẃ tĩɛ̃ Natãw Dawudaw nãã.

Wú kãã hi-yǝ nã̀ã waa nǝ̃-yǝ wà: «Lǝdarǝ nã, cwaaba hǝ̃ǝ̃ldaabà yáá dàa, wudiɛ yáá gbaalw nǝ̃ wudiɛẃ ba duɔbaaw.

2 Gbaalẁ yáá nǝ̃ tũmba nǝ̃ ninɲã piyɛ̃.

3 Duɔbaaẁ sáá nǝ̃ kuu gbal gbal, wù yáá nǝ̃ tũmblɩdiɛ dɩn-i yà sǝ̃ǝ̃-yǝ.

Wù yáá wù val-yǝ, wú ba dàa wù vǝ̃ǝ̃ wù suɔgu bá nǝ̃ wù tãnkuuraaba.

Tũmblɩ wáà yáá wù wuu wù tii'n wuuri dɩ̀ sáá tɔ̃nãã dǝl, nã̀ã wù ɲũɔ̃ wù guuɲũɔ̃kuugɩ nã, nã̀ã ba wù yáá wù mǝ̃rǝ̃ǝ̃ wù tii'n nãkrɔnɲã nã-i.

Wù tiiẁ yáá wùu blǝ nã́ã́ wù bisĩɛ̃-i.

4 Waakããrdiɛẃ kãã jo gbaalw nãã, nǝ̃ gbaalẁ sáa ga ba wù ga hũɔ̃ ǹ-jĩɛ̃ wù tũmbiiba nã, yindagǝ nã wù ninɲã nã, ǹ-hĩɛ̃ wuuri ǹ-hã waakããrw mãã wù yáá wùu jo wù nãã.

Wú blǝ kuokuo'n tũmblɩw ǹ-hĩɛ̃-yǝ ǹ-hã biɛw mãã wù yáá wùu jo wù nãã.»

5 Dawudaw hiɛgá juo dũ nǝ̃ biɛ wáà ǹ-ji maa gɩ̀ sùɔ́gu, wú waa nǝ̃ Natãw wà: «Fɩraa-Dũnnũ-ń ba wà wu nìɛ nũmǝ̃nãw sulammã nã, biɛw mãã wù cíé díɛ̀, wù saa nǝ̃ kúú-i!

6 Sulammã nã, wù mãã wù cíé díɛ̀, nã̀ã pɩgaa wà hujãn'n cɔ̃mmã́ sɩraa wù saa, wù ji hiil tũmbiiba nnǝ̃ǝ̃-i, tũmblɩ wáà suɔnãw nã.»

7 Gɩ̀-i, Natãẃ waa nǝ̃-yǝ wà: «Yíi-i biɛ wáà!

Fɩraa-Dũnnũw, Isɩrayɛl bluu'n Dũnnũw, wù mãã wù waa dìi, dɩ̀-i nnĩĩ nã: “Mǝ̃̀ níé ǹ-hiil-n ǹ-tũn nɔ̃mmã ǹ drɔ, ǹ-ce-n yuuntigǝ̃ngãw Isɩrayɛl yuugɩ nã, nã̀ã hiil-n Sayul nãkruɔgɩ nã.

8 Mǝ̃̀ hlã-n nǝ̃ ǹ yuuntii Sayul suɔgu, mǝ̃̀ díilá wù canããba ǹ nãkrɔnɲã nã, nã̀ã hã-n nǝ̃ Isɩrayɛl bluuba nǝ̃ Suuda bluu yo.

Ɲã̀-lǝ ɲã̀ min ɲã̀ nã́ã̀ ɲã̀ã kol, mǝ̃̀ yáá mǝ̃̀ ji piɛ kuu.

9 Hamã nã-i ń diɛ Fɩraa-Dũnnũ yalli ǹ ce dìí mãã diibɩblaari mǝ̃̀ yinɲã nã?

Ǹ kúó Hitɩ nũɔ̃ntii Uri nǝ̃ dãngunãw, ǹ-tuu wù ciɛw ǹ-ce-yǝ ǹ ciɛw, nǝ̃ wù-lǝ ń dii-yǝ Amon bluu'n dãngunãba sǝ̃ǝ̃nã-i ǹ-ko-yǝ.

10 Yindiɛ, ǹ mãã ǹ díɛlá-m, nã̀ã tuu Hitɩ nũɔ̃ntii Uri ciɛw ǹ-ce-yǝ ǹ ciɛw, dãngunãẁ síì hal ǹ suɔgɩ nã.”

11 Fɩraa-Dũnnũw mãã wù waa dìi dɩ̀-i nnĩĩ nã: “Mǝ̃̀ ji ce diibɩblaarɩ́ hlǝ yíi hla'n suɔgɩ-i ǹ yuunã, nã̀ã tuu ǹ hla'n canããba ǹ yinɲã nã, ǹ-hã wudiɛw mǝ̃rǝ̃ǝ̃ nǝ̃-ba, bǝciikrɩnkaagu.

12 Sulammã nã, ǹ ŋmã́ã́ ǹ-ce-dǝ-i, nǝ̃ mǝ̃n-lǝ, mǝ̃̀ ji ce-dǝ Isɩrayɛl bluu'n yinɲã nã bǝciikrɩnkaagu.”»

13 Dawudaẃ waa nǝ̃ Natãw: «Mǝ̃̀ cíé Fɩraa-Dũnnũw nǝ̃ diicĩɛ̃rǝdi!»

Natãẃ siɛ-yǝ wa: «Fɩraa-Dũnnũẁ cíé ǹ diicĩɛ̃rǝ'n dũndɔw, ǹ síì ku.

14 Nǝ̃ ǹ mãã ǹ cíé cɔ̃m mã́ã̀, ǹ cíé Fɩraa-Dũnnũ ɲããtaabá bǝ̃ǝ̃lǝ̃ǝ̃ wù yiirɩ nã, ǹ bíɛ́w mãã wù húulá nnĩĩ, wù ji ku.»

15 Natãẃ fǝ̃ǝ̃ ǹ-ver ǹ-kũũ wù suɔgu.

Fɩraa-Dũnnũẃ kãã mũũ ǹ-nar Uri ciɛẁ húulá gùú tãnkuurw mãã, ǹ-hã Dawudaw nǝ̃ hlɔngbǝ̃ǝ̃mdamã.

16 Dawudaẃ cirǝ̃ǝ̃ Dũnnũw nã ǹ-hã tãnkuurw nã̀ã dii sũũw.

Wù gáa kũũ, wú kãã mǝ̃rǝ̃ǝ̃ ɲũũrũũgu ǹ-cɔ.

17 Yuuntasǝ'n suɔ'n yigantaabá kãã jo wù nãã ǹ-juo gbǝ̃ǝ̃ nǝ̃-yǝ wà wú suro, wú hla, nǝ̃ wù sáa kã bá wuu kuu nǝ̃-ba.

18 Gɩ̀ bãn nɩrhǝ̃ǝ̃lnã yuugu, tãnkuurẃ fǝ̃ǝ̃ ǹ-ku.

Gbǝrsǝrɩ̀ yáá dìi blǝ Dawuda mããcieraaba, bá ba bà ji tu nǝ̃-yǝ wà tãnkuurw náalá, nã̀ã wa bà yáá bà waa wà: «Tãnkuurẁ yáá nũmǝ̃nãw gùú nã mãã, yi wáalá yi waa dìi nǝ̃ Dawudaw, wù sáa ba wù caa wú hiraa dɩ̀ nã.

Yi ji ciɛ ǹ-waa nǝ̃-yǝ tam hamã-i wà tãnkuurw kúú?

Wù ga gbǝ̃ǝ̃ ǹ-ce dɩdarǝ dìí mãã yuu'n dǝl sǝ.»

19 Dawudaẁ gáa da wù mããcieraabà tɔ̃nãã bà wanãã nǝ̃ bà ɲĩɛ̃, wú fǝ̃ǝ̃ wà tãnkuurw kúú.

Wú yugu-ba wà: «Tãnkuurẁ kúú-ì?»

Bá siɛ-yǝ wà: «Wù kúú.»

20 Gɩ̀-i, Dawudaẃ fǝ̃ǝ̃ ǹ-suro ɲũũrũũgu.

Wú kãã ca hũmmã, ǹ-tũn latɩkolow wù hla nã, nã̀ã kãã hiil wù kuulanãmba nã̀ã dii badaba.

Nã̀ã fǝ̃ǝ̃ ǹ-suro ǹ-kã Fɩraa-Dũnnũ bũũkuɔlɩ nã ǹ-kãã kuulǝǝ ǹ-bũũ-yǝ.

Wù gáa ver wù kuugɩ nã, wú wa bá hã-yǝ nǝ̃ wuuri, wú hũɔ̃ ǹ-wuu-dǝ.

21 Wù mããcieraabá yugu-yǝ wà: «Ǹ gaacie gáàga yuugɩ-i wanĩĩ?

Ǹ-ya tãnkuurẃ ba wù yáá nũmǝ̃nãw, ǹ yáá ǹ dii sũũw nã̀ã ba kaaluugɩ nã.

Nǝ̃ kuɔkuɔguu mãã wù jáa ku, ń fǝ̃ǝ̃ ǹ-suro, nã̀ã ba ǹ wuu wuuri!»

22 Wú siɛ-ba wà: «Ǹ-ya tãnkuurẃ ba wù yáá nũmǝ̃nãw yugo, mǝ̃̀ yáá mǝ̃̀ dii sũũw, nã̀ã ba mǝ̃̀ kaal, nã̀ã wa mǝ̃̀ yáá mǝ̃̀ waa nǝ̃ mǝ̃̀ hla wà: “Halii fǝ̃ǝ̃?

Nã́ã́ fíí Fɩraa-Dũnnũẁ ji ne mǝ̃̀ yiɛgu yo, nǝ̃ tãnkuurẃ ba nũmǝ̃nãw.”

23 Kuɔkuɔgu mãã wù kúú, mǝ̃̀ dii sũũ hamã nã-i?

Mǝ̃̀ ji naa mǝ̃́ gbǝ̃ǝ̃ ǹ-ce wú ver ǹ-jo-ì?

Mǝ̃n-lǝ mã́ã ji kãã hi-yǝ, wù-lǝ wù sɩga ver ǹ-jo mǝ̃n nãã.»

24 Dawudaẃ hinĩɛ̃ wù ciɛ Batɩseba ɲiɲirãmmã, nã̀ã kuganãã wù nã ǹ-mǝ̃rǝ̃ǝ̃ nǝ̃-yǝ.

Wú huu pũmpɩrblɩ ǹ-suu-yǝ wà Solmãn, nǝ̃ wù cɔ̃mmã́ dwal Fɩraa-Dũnnũw nã.

25 Wú kãã hã Dũnnũ tanhiil Natã nǝ̃-yǝ, wù-lǝ wú fǝ̃ǝ̃ ǹ-suu-yǝ wà Sedidiya Fɩraa-Dũnnũ cɔ̃mmã nã.

26 Gɩ̀-lǝ gɩ̀ bǝ̃ǝ̃gu, Sohabɩẁ yáá dàa byarɩ nã yugo yugo Arba lǝri, Amon bluu'n lǝgǝ̃ngããrɩ nã.

Wú kãã ɲǝ̃ǝ̃ ǹ-hũɔ̃ bà yuuntigǝ̃ngã'n cùúgu.

27 Wú tĩɛ̃ tĩɛ̃taabá kãã waa nǝ̃ Dawudaw wà: «Mǝ̃̀ dúú Arba lǝrɩ nã, mǝ̃̀ hṹɔ̃lã́ hũmmãã mãã gùú cùúgɩ nã.

28 Yindiɛ, tɩgɩnǝ̃ǝ̃ sɩrǝǝsɩba dɩgaliɛw nã, jo n ji jiraa lǝ'n nũɔ̃gɩ nã, nǝ̃ ń hũɔ̃-dǝ nǝ̃ ǹ hla.

Mǝ̃̀ sǝ̃n caa mǝ̃́ hũɔ̃-dǝ nǝ̃ mǝ̃̀ hla, gɩ̀ yiirɩ ji ba mǝ̃̀ dǝlli.»

29 Dawudaẃ fǝ̃ǝ̃ ǹ-tɩgii sɩrǝǝsɩba dɩgaliɛw nã, ǹ-tuu Arba lǝ'n hlũũgu.

Wú kãã du dɩ̀ nã, ǹ-ɲǝ̃ǝ̃ ǹ-hũɔ̃-dǝ.

30 Wú pyar yuntaagǝ̃ngĩɛ̃'n hucuugu Arba lǝ'n yuuntigǝ̃ngã'n yuugɩ nã; gɩ̀ yáá gùu ce nǝ̃ sãnãw mãã wù ji hi culo gur nǝ̃ nũɔ̃sɔ̃w, nǝ̃ bá yalliɛ gɩ̀ nã nǝ̃ tɩntrãkuusǝyaga.

Bá suu-gǝ ǹ-hã Dawudaw.

Wù híilá lǝ díɛ́dɩ gbaasǝcin ǹ-ta nǝ̃-dǝ.

31 Dawudaẃ blǝ ǹ-ta nǝ̃ gɩ̀ lǝntaaba, ǹ-kãã dii-ba fãngãã'n mããcemmã nã, bá ba dapaalaaba, tɩntrãcesǝraaba nǝ̃ dajuuraaba, yindagǝ nã, wú ce bá ba bà mã jaabiiga.

Wù cíé Amon bluu'n liɛga min gùú tammã dɩnmã-i.

Gɩ̀ furũũgɩ nã, wú kũũ Serusalɛmgu nǝ̃ wù byarcekurɔnɲã min.