Sugojarriɛba (Juges) 2

7 Isɩrayɛl bluubà cíé mããcemmã ǹ-hã Fɩraa-Dũnnũw Sosuwe nũmǝ̃nãsǝ'n bǝ̃ǝ̃gɩ min nã. Wù kúú furũũ yo gɩ̀ nã, bá nìɛ bà kã nǝ̃ yiga bà ce-mã, bà vũnvãnããbaa mãã bà díɛ́ Fɩraa-Dũnnũẁ cíé gùú cɔ̃ngǝ̃ngãmmã mãã ǹ-pɛ Isɩrayɛl bluuba nã, bà nũmǝ̃nãsǝ'n bǝ̃ǝ̃gɩ min nã.

8 Nũnɩ bíɛ́ Sosuwew, Fɩraa-Dũnnũ mããcierw, wù díɛ́ bii gundii nǝ̃ bii nũɔ̃sɔ̃ wɩ̀-i nã̀ã fǝ̃ǝ̃ ǹ-ku.

9 Bà yáá bàa hã-yǝ nǝ̃ gùú hlɔ̃mmã mãã wú tuu-mã nǝ̃ sùɔ́gu, Timmatɩ-Herɛsɩ lǝri, bá dii-yǝ gùú sùɔ́gu Efrayim tãnsǝ'n yiɛgu, ǹ-kã Gaasɩ tãnũũ'n bǝ̃ǝ̃'n pal'n ɲiɲũɔ̃ yiɛgu.

10 Wù brǝntaaba min curo wo curo wù bǝ̃ǝ̃gɩ-ń hi wú ta. Gɩ̀ dǝ'n brǝnnũɔ̃gɩ́ juo suro, ǹ-ba bà sǝ̃n fǝ̃ǝ̃ Fɩraa-Dũnnũw, nã̀ã ba bà sáa fǝ̃ǝ̃ wù cíé gàá mãã ǹ-pɛ Isɩrayɛl bluuba nã.

11 Gɩ̀-i, Isɩrayɛl bluubá fǝ̃ǝ̃ ǹ-ba bà ce dìí mãã diibɩblaari Dũnnũ yinɲã nã, bà bũũ dũnnũbaa mãã bà be-ba wà Baalba.

12 Bá fǝ̃ǝ̃ ǹ-nǝ̃nǝ̃ǝ̃ Fɩraa-Dũnnũw nã, bà tǝvũnvãnãã'n Dũnnũw mãã wù yáá wùu hiil-ba Misɩra yiɛgu, nã̀ã ta ǹ-kãã ɲǝ̃gãr dũnnũdaba nã, gùú coplaaga nǝ̃n yáá gàa caliɛ bà nã, bà-lǝ bà dũnnũba. Bá fǝ̃ǝ̃ ǹ-kãã kuulǝǝ ǹ-bũũ gɩ̀ dũnnũba ǹ-dũ Fɩraa-Dũnnũ hiɛga.

13 Bà nǝ̃́nǝ̃́ǝ̃ Fɩraa-Dũnnũw nã nĩĩgɩ-i, ǹ-kãã ba bà bũũ Baalba nǝ̃ Asɩtarteba.

14 Gɩ̀-i, Fɩraa-Dũnnũ hiɛgá dũ nǝ̃ Isɩrayɛl bluuba, wú ya bá ba cobaliɛ'n nãkruɔgɩ nã bá ba bà ŋmã-ba, ǹ-dii-ba bà ɲããtaa'n nãkrɔnɲã nã, bá juo caliɛ bà nã fuwɔ bá ba bà síì gbǝ̃ǝ̃ ǹ-ciɛ ǹ-cii.

15 Bà yáá ba-ń ba bà maar byarcegu bǝ̃ǝ̃ wo bǝ̃ǝ̃, Fɩraa-Dũnnũẁ yáá wu-ń ce wú ce bá gbǝ̃ǝ̃ bà nã nã́ã́ wù yáá waa-dǝ nǝ̃-ba, nã̀ã waasǝ-dǝ nĩĩguu mãã. Bá juo yanãã ǹ-ba hujãncɔ̃mmã nã.