Isɩrayɛl Bluu'n Waali (Exode) 25

Isɩrayɛl bluubà pɛ bà ɲĩɛ̃ nã ǹ-nǝ̃ǝ̃ Dũnnũ kuɔli

Fɩraa-Dũnnũẃ waa nǝ̃ Musaw wà:

2 «Waa nǝ̃ Isɩrayɛl bluuba wà bá nǝ̃ǝ̃ bà nãkruɔɲinɲã ǹ-hã-m, curo wo curo mãã kusufɩnfaantiiw, wú ce-dǝ ǹ-hã-m.

3 Bà mãã bà ji nǝ̃ǝ̃ gùú ɲinɲãã mãã, ɲã̀-i nnĩĩ: sãnãw, kwaplaari, nǝ̃ kwabyããri,

4 nǝ̃ kuulaajũmmãã mãã mããbɩblɩmmã, yindagǝ nã mããbumbɛ̃mmã, nǝ̃ korɩnkuulkuulaajũmmãã mãã bàa sɔ̃-mã ɲũgɔ̃ɲũgɔ̃, nǝ̃ wurɔkwaa'n kuulaajũmmã^a,

5 nǝ̃ tugɔliɛ'n cãlũnɲãã mãã bàa ku-ɲã ɲããbumbɛ̃mãnɲã, nǝ̃ lwaakɩnkan'n kwasǝnɲinɲãã mãã bà be-ɲã wà dofɛ̃, ɲã̀ cãlũnɲã nǝ̃ piɛtun'n danɲã,

6 nǝ̃ fitɩnǝ̃ǝ̃ba nɔ̃mmã, nǝ̃ ɲinɲãã mãã ɲã̀ hũũgɩ dwal, ba ji gaala Dũnnũ mããcem'n nɔ̃mmã nã, nǝ̃ wusunããw yo,

7 nǝ̃ gùú ɲinɲãã mãã nã́ã́ tɩntrã-i ɲã̀ kuusǝ bà be-ɲã wà onisɩ, ǹ-pɛ ɲããkuusǝndaɲã nã, ɲã̀ã́ yo ɲã́ nǝ̃ nã́ã́ tɩntrã-i, puruɔntaa'n yuuntigǝ̃ngã'n kuulaadiiyǝw, nǝ̃ wù mãã wù vaa gùú kuulaayiɛguu mãã wù dǝ̃ngũũgɩ nã, bà ji par-ɲã, nǝ̃ ɲã̀-i.

8 Bà ji sa nũɔ̃sǝn kuɔlii mãã dìi kra dɩ̀ dǝ ǹ-ba mã́ã dǝlli, ǹ-hã-m, nǝ̃ mǝ̃́ da ǹ-juo jiraa bà sǝ̃ǝ̃nã.

9 Ɲi mãã ɲì ji sa mǝ̃̀ kuɔli gùú tammãã mãã, nã̀ã ce dɩ̀ wariɛga min mãã ɲì ji kra gà nã gà dǝ, gá ba mã́ã yaga, mǝ̃̀ ji pɩgaa-dǝ ǹ-ja-n.»