Isɩrayɛl Bluu'n Waali (Exode) 24

Dũnnũẁ ce bà ɲũɔ̃ twammã nǝ̃ Isɩrayɛl bluuba

Fɩraa-Dũnnũẃ fǝ̃ǝ̃ ǹ-waa nǝ̃ Musaw wà: «Yíì, ɲí nǝ̃ Arɩnãw, nǝ̃ wù byanããba hǝ̃ǝ̃lba: Nadabɩw, nǝ̃ Abihuw, yúguràa ɲí jo mǝ̃̀ nãã, ɲì min nǝ̃ Isɩrayɛl bluu'n vũnvãnãã gwasiɛl nǝ̃ nũɔ̃sɔ̃. Ɲi ji kuulǝǝ halbaa mǝ̃̀ yigagɩ nã.

2 Yíi dɩn ji kuganãã mǝ̃̀ nãã, bà-lǝ bà síì da ǹ-kuganãã mǝ̃̀ nãã, nǝ̃ Isɩrayɛl bluu yo bà síì da ǹ-kã ɲí yuguraa.»

3 Musaẃ ver ǹ-juo taa Fɩraa-Dũnnũ cãwanĩɛ̃ gáá min nǝ̃ wù kárrá dìí nã mãã ǹ-hã-ba, ǹ-ja Isɩrayɛl bluuba. Bà min bá siɛ-yǝ nǝ̃ yal dɩndɩndi wà: «Fɩraa-Dũnnũẁ wáalá kuu wo kuu, yi ji ce-gǝ.»

4 Wù díilá kuu wo kuu mãã Musa tũɔ̃gɩ nã, Musaẃ yal gɩ̀ min. Gɩ̀ taakaalgu, wú curuɔ ǹ-suro, ǹ-mã siijãnkuudagǝ tãnũũ'n nĩɛ̃l nã, nã̀ã caa tɩntrã nũɔ̃sɔ̃ nǝ̃ gà hǝ̃ǝ̃lga ǹ-kra. Isɩrayɛl bluu'n vũnvãnãã nũɔ̃sɔ̃ nǝ̃ bà hǝ̃ǝ̃l báàbà nɔ̃nɲã nã, nũɔ̃ wo nũɔ̃ tɩntãndɩ dɩn.

5 Nã̀ã hiil plaaba Isɩrayɛl bluuba sǝ̃ǝ̃nã, bá kãã jãn siimãã mãã bà ye-mã nǝ̃ yellɩ nã nã̀ã ko ninɲã̀ã jãn paaruu'n siimã ǹ-hã Fɩraa-Dũnnũw.

6 Musaẃ tiɛriɛ twamdaamã nã ǹ-dii-mã gbãmɔ̃nɲã nã, nã̀ã tũn mãdaamã siijãnkuugu drɔ.

7 Wú tuu twanɲũɔ̃sɛbɛw ǹ-kal-yǝ Isɩrayɛl bluu'n yinɲã nã. Bá fǝ̃ǝ̃ ǹ-waa nǝ̃-yǝ wà: «Fɩraa-Dũnnũẁ wáalá kuu wo kuu, yi ji ce-gǝ, yi ji ba yi wáà gɩ̀ hlũũgu.»

8 Musaẃ tuu twammã ǹ-mɛ̃sã-mã ǹ-tũn cwaaba drɔ, nã̀ã waa wà: «Twam mã́ã̀mãã pɩ́garà wà Fɩraa-Dũnnũw cíé yí ɲũɔ̃ twammã, ǹ-vaa nǝ̃ wù hlũũ'n nǝ̃ǝ̃yaga min.»

9 Gɩ̀-i, Musaẃ ver ǹ-yuguraa bá nǝ̃ Arɩnãw, nǝ̃ Nadabɩw, nǝ̃ Abihuw nǝ̃ Isɩrayɛl bluu'n vũnvãnãã gwasiɛl nǝ̃ nũɔ̃sɔ̃.

10 Bá da Isɩrayɛl bluu'n Dũnnũw, wù vyan'n taaragɩ caalaa nã́ã́ ba cállá-gǝ nǝ̃ kwajũm-i. Gùu ba lɩgǝlɩgǝ nã́ã́ drɔkuɔl-i nǝ̃ dɩ̀ hla.

11 Isɩrayɛl bluubà níé ǹ-hiil gùú nũɔ̃sǝn cwaabaa mãã, wù sáa ce-ba nǝ̃ kuu. Bá kãã ne Dũnnũw, ǹ-wuu wuuri, nã̀ã ɲũɔ̃ ɲããɲũɔ̃nɲã.

12 Fɩraa-Dũnnũẃ waa nǝ̃ Musaw wà: «Yugo ń jo mǝ̃̀ nãã tãnũũgɩ nã, ń ji ba dìɛ. Mǝ̃̀ ji hã-n nǝ̃ tɩntãnyanɲãã mãã mã̀ã yal ɲã̀ drɔ, nã̀ã hã-n nǝ̃ mǝ̃̀ hlũũgu, nǝ̃ mǝ̃̀ hlũũ'n nǝ̃ǝ̃yaga n ga kal Isɩrayɛl bluuba nǝ̃-ɲã.»

13 Musabá fǝ̃ǝ̃ suro ǹ-ta nǝ̃ wù mããcier Sosuwew. Musaẃ kãã yugo Dũnnũ tãnũũgɩ nã,

14 nã̀ã waa nǝ̃ vũnvãnããba wà: «Bláà ɲì fennãã yì nã nhlíɛ̀, fuwɔ yi ga da yi ver ǹ-jo. Arɩnãba nǝ̃ Hurw, bá nìɛ, cɔ̃mmã-ń hi curo, bláà ɲì ne bà-i.»

15 Musa yugurammã nã tãnũũgɩ nã, ɲũɔ̃sǝrɩ suu gɩ̀ nã.

16 Fɩraa-Dũnnũ yuuntasǝ'n gbɩgbaamã́ ba Sɩnãyi tãnũũgɩ nã bãn nãndien kusuugɩ nã, nǝ̃ ɲũɔ̃sǝrɩ suu gɩ̀ nã. Bãn nɩrhǝ̃ǝ̃lnã yuugu, Dũnnũẃ fǝ̃ǝ̃ ǹ-ba ɲũɔ̃sǝri sǝ̃ǝ̃nã, nã̀ã be Musaw.

17 Fɩraa-Dũnnũ yuuntasǝ'n gbɩgbaamã̀ yáá nã́ã́ dãncaalam-i tãnũũgɩ nã, Isɩrayɛl bluu'n yinɲã nã.

18 Musaẃ jãn ɲũɔ̃sǝ díɛ́ kusunã, ǹ-ba wù yuguraa wù maar tãnũũgu drɔ, ǹ-kãã ce bãn gwaahǝ̃ǝ̃l nǝ̃ yisɔsǝ gwaahǝ̃ǝ̃l.