مَحتَج ایماندارلار اوچین مادّی کُمِک ییغناماق
۹
اورشلیمدَکی ایماندارلارا مادّی کُمِگینی بِرمِک بارادا سیزه یازماغینگ گِرِگی یُق.
۲ چونکی مِن سیزینگ یاردیم اِتمِکدَکی ایخلاصینگیزی بیلیَرین. مِن: «آخائیه وِلایاتی گِچِن ییلدان بَری کُمِک بِرمَگه تاییاردیر» دییّپ، مَقدونیه‌لِرینگ یانیندا سیز باباتدا قووانیارین. سیزینگ شِیله ایخلاصینگیز کَن آداملاری هُوِسلِندیردی.
۳ مِن دُغانلارا سیزینگ تاییاردیغینگیز و مادّی کُمِگینینگ اِییَم ییغنالاندیغینی آیدیپدیم. اینه، شو زاتلارا گُز یِتیرمِک اوچین، اُلاری سیزینگ یانینگیزا ایبِریَرین. مِن سیز باراداقی قووانجیمینگ یالان بُلوپ چیقماغینی ایسلَمُق.
۴ یُغسا مَقدونیه‌لِر مِنینگ بیلِن باریپ-دا، سیزینگ تاییار دَلدیگیزینگی گُرسِلِر، بیز و کَنرَک سیزلِر سیز باباتدا شِیله ایناملی گورلَنیمیزه قاتی اوتاناریس.
۵ شُنگا گُرَه-ده، واعدا اِدیلِن مادّی کُمِگینگیزینگ تاییاردیغینا گُز یِتیرمِک اوچین، اُزوم بارمازدان اُنگ دُغانلاریمیزی یانینگیزا ایبِرمِلی دییِن قارارا گِلدیم. یُنه مِن مادّی کُمِگینگیزینگ مِجبورلیق بیلِن دَل-ده، اُندان باشغا هُوِسجِنگلیک بیلِن بِرلِن سُوغات بُلماغینی ایسلِیَرین.
۶ شونی اونوتمانگ: قیسغانیپ اِکیَن آدام آز اُریاندیر، ساخیلیق بیلِن اِکیَن آدام، بُل اُریاندیر.
۷ گُوونسیزلیک یا مِجبورلیق بیلِن دَل-ده، هِر کِس گُونوندِن چیقیانی بِرسین. چونکی خودای هُوِسجِنگلیک بیلِن بِریَن آدامی حالایاندیر.
۸ هِمیشه هِمّه زادینگیز بِس بُلوپ، ایسلِندیک یاخشی ایشه بُل مومکینچیلیگینگیز بُلار یالی، خودای سیزه مِرحِمِتینی بُلدان-بُل بِرمِگی باشاریاندیر.
۹ بو باباتدا مُقادِّس یازغیلاردا شِیله یازیلاندیر:
«اُل ساخیلیق بیلِن پایلادی و مَحتَجلِره بِردی،
اُنونگ یاخشیلیغی اِبِدی دُوام اِدِر.»*
۱۰ خودای تایخانینگ اِکجِک تُخومینی، اییجِک چُرِگینی یِتیریَندیر. شُنگا گُرَه-ده، اُل سیزینگ اِکِنینگیزی بُلدان-بُل آرتدیریپ، یاخشیلیغینگیزینگ بُل حاصیلینی یِتیشدیرمِگی هِم باشارار.
۱۱ سیز هِر زاتدا ساخی بُلوپ بیلِرینگیز یالی، هِمّه زادا بای بُلارسینگیز. بیز سیزینگ ساخاواتلی کُمِگینگیزی اِلتیپ بِرِنیمیزده، اورشلیمدَکی ایماندارلار خودایا شوکور اِدِرلِر.
۱۲ چونکی سیزینگ بو کُمِگینگیز ایماندارلارینگ مَحتَجلیکلِرینینگ عُوِضینی دُلدورماق بیلِن قاناغاتلِنمَن، شِیله بُلسا خودایا اِدیلیَن شوکورلِرینگ دُلوپ-آقماغینا هِم سِبَپ بُلار.
۱۳ سیزینگ بو کُمِگینگیز عیسی مسیح باراداقی خوش خابارا صادیقدیغینگیزی بِلّی اِدیَر. سیز اِلده بارینگیزی اُلارا و بِیلِکی ایماندارلارا ساخیلیق بیلِن بِریَرسینگیز. اینه، شولارینگ باری اوچین ایماندارلار خودایی بِییکلِندیرِرلِر.
۱۴ خودایینگ سیزه بِرِن بُلدان-بُل مِرحِمِتینی گُروپ، اُلار سیزینگ اوچین دُغالار اِدِرلِر و سیزینگ بیلِن دیدارلاشماغی کویسَرلِر.
۱۵ خودایینگ شِیله اولی سیلاغی اوچین اُنگا شوکورلِر بُلسون!