دیرِلیش باراداقی خوش خابار
۱۵
ایندی بُلسا، اِی عزیزلِر، سیزه واغیظ اِدِن خوش خاباریمی یادلاپ گِچمِکچی. سیز اُنی قابول اِدیپ، اُندا قاییم دورسونگیز.
۲ سیزه واغیظ اِدِن خوش خاباریمی اِگِر قاییم توتسانگیز، اُنونگ اوستو بیلِن نِجات تاپارسینگیز. اِمّا توتماسانگیز، بیدِرِک یِره ایمان گِتیردیگینگیز بُلار.
۳ چونکی مِن قابول اِدِنیمی خاص واجیپ خابار حُکمونده سیزه-ده قاوشوردیم. بو خابار، اینه، شوندان عیبارات: مُقادِّس یازغیلارا گُرَه، مسیح بیزینگ گونَه‌لِریمیز اوچین اُلدی.
۴ اُل جایلانیپ، مُقادِّس یازغیلارا گُرَه هِم اوچونجی گون دییلِنده دیرِلدی.
۵ اُنسُنگ پِطرُسا، سُنگ اُن ایکی شَگیرتلِره گُروندی.
۶ موندان سُنگ اُل شُل بیر واقتینگ اُزونده بَش یوزدِن-ده کَنرَک ایماندارا گُروندی. بو ایماندارلارینگ کَبیری آرادان چیقدی، یُنه کَنسی حَضیر هِم دیری.
۷ سُنگرا یعقوبا گُروندی و سُنگ رِسول‍لارینگ هِمّه‌سینه گُروندی.
۸ اینگ آخیریندا بُلسا، بی‌واقت دُغلان چاغا یالی، مانگا گُروندی.
۹ چونکی مِن رِسول‍لارینگ آراسیندا اینگ کیچیسیدیرین. مِن حتّیٰ رِسول آدینی آلماغا-دا میناسیپ دَل، سِبَبی خودایینگ کِلیساسینا آزار بِریپدیم.
۱۰ اِمّا مِن نَهیلی بُلسام-دا، دینگه خودایینگ مِرحِمِتینینگ اوستو بیلِن شِیله بُلدوم. اُنونگ مانگا اِدِن مِرحِمِتی نِتیجه‌سیز بُلمادی. مِن هِمّه‌لِردِن-ده کَن زَحمِت چِکدیم، آصلیندا مونی مِن دَل-ده، مانگا یار بُلان خودایینگ مِرحِمِتی اِتدی.
۱۱ شونلوقدا، ایسله مِن بُلایین، ایسله-ده بِیلِکی رِسول‍لار بُلسون، تَفاوُتی یُق: بیز بو خوش خاباری واغیظ اِدیَریس، سیز-ده اُنگا ایمان گِتیردینگیز.
اُلولِرینگ دیرِلمِگی
۱۲ بیز مسیح دیرِلدی دییّپ واغیظ اِدیَریس. اُندا سیزینگ آرانگیزدان کَبیرلِری نَدیپ اُلولِر دیرِلمِز دییّپ آیدیار؟
۱۳ اِگِر اُلولِر دیرِلمِیَن بُلسا، اُندا مسیح هِم دیرِلِن دَلدیر.
۱۴ و اِگِر مسیح دیرِلمِدیک بُلسا، اُندا بیزینگ واغظیمیز-دا، سیزینگ ایمانینگیز-دا بیدِرِکدیر.
۱۵ شِیلِلیکده مونونگ اوستونه-ده، بیزینگ خودای بارادا یالان شاهاتلیق اِتدیگیمیز بُلیار. سِبَبی بیز خودای عیسی مسیحی دیرِلتدی دییّپ شاهاتلیق اِدیَریس آخیرین. اِگِر اُلولِر دیرِلمِیَن بُلسا، اُندا خودای عیسی مسیحی-ده دیرِلدِن دَلدیر.
۱۶ چونکی، اُلولِر دیرِلمِیَن بُلسا، اُندا عیسی مسیح-ده دیرِلِن دَلدیر.
۱۷ اِگِر عیسی مسیح دیرِلمِدیک بُلسا، اُندا سیزینگ ایمان گِتیرمِگینگیز هِم باطیلدیر و سیز اُوالقینگیز یالی گونَه‌لِرینگیزینگ ایچیندِدیرسینگیز.
۱۸ دییمِک، عیسی مسیحده ایمانلی بُلوپ آرادان چیقانلار هِم هِلَک بُلاندیرلار.
۱۹ اِگِر بیز دینگه بو یاشاییشدا عیسی مسیحه اومید باغلایان بُلساق، هِمّه اینسانلارینگ اینگ بِدباختیدیریس.
۲۰ اِمّا عیسی مسیح حاقیقاتدان-دا اُلولِرینگ اَوَّلکیسی بُلوپ اُلومدِن دیرِلدی.
۲۱ چونکی اُلومینگ بو دونیَه بیر آدامینگ اوستو بیلِن گِلشی یالی، اُلومدِن دیرِلیش-ده بیر آدامینگ اوستو بیلِن گِلیَندیر.
۲۲ آدام آتانینگ نِسیل‍لِرینینگ هِمّه‌سی اُلیَر. شونونگ یالی، عیسی مسیحه دِگیشلی بُلانلارینگ-دا هِمّه‌سی یاشایشا قاوشار.
۲۳ یُنه هِر کیم اُز نوبَتیندا دیرِلِر. عیسی مسیح اَوَّلکی بُلوپ دیرِلدی. مسیح گِلِنده، اُنگا دِگیشلی بُلانلار-دا دیرِلِر.
۲۴ عیسی مسیح هِمّه ایختییارلیقلاری، قودراتلاری و گویچلِری یُق اِدیپ، پادیشاهلیغی آتا خودایا تابشیراندا دونیَه‌نینگ آخیری بُلار.
۲۵ چونکی خودای عیسی مسیحینگ هِمّه دوشمانلارینی اُنونگ آیاق آشاغینا سالیانچا، مسیح پادیشاهلیق اِتمِلیدیر.
۲۶ یُق اِدیلمِلی دوشمانلارینگ اینگ سُنگقوسی هِم اُلومدیر.
۲۷ چونکی خودای «هِمّه زادی اُنونگ آیاغینینگ آشاغیندا قُیدی».* هاووا، خودای هِمّه زادی مسیحینگ آیاق آشاغیندا قُیدی. یُنه «هِمّه زادی» دییلِنده، مونونگ خودایا دِگیشلی دَلدیگی مِسه-معلیمدیر.
۲۸ خودای هِمّه زادی اُغلونا موطیع اِدِندِن سُنگ، اُغول هِم اُزونی هِمّه زادی اُنونگ آیاق آشاغینا قُیان خودایا موطیع اِدِر. بو خودایینگ هِر زاتدا و هِمّه زاتدا حُکوم سورمِگی اوچیندیر.
۲۹ اِگِر دیرِلیش یُق بُلسا، اُلولِره دِرِک تَعمید آلانلار نَمه اِدِرکَه؟ اِگِر اُلولِر هیچ هاچان دیرِلمِجِک بُلسا، آداملار نَمه اوچین اُلارا دِرِک تَعمید آلیارقا؟
۳۰ بیز هِم نَمه اوچین جانیمیزی هِر ساغات خاطارینگ آشاغینا سالیارقاق؟
۳۱ تانگریمیز عیسی مسیحینگ حوضوریندا سیزه بُلان قووانجیمدان قاسام ایچیَرین: مِن هِر گون اُلوم بیلِن یوزبه-یوز بُلیارین.
۳۲ اِگِر-ده مِنینگ دِلیل‍لِریم دینگه اینسان دِلیل‍لِری بُلان بُلسا، مِن اُندا اِفِسُسداقی وَحشی حایوانلار بیلِن اوروشارمیدیم؟ موندان نَمه پِیدا قازاناردیم؟ اِگِر اُلولِر دیرِلمِیَن بُلسالار، «گِلینگ، اییِیلینگ و ایچِیلینگ، چونکی اِرتیر بیز اُلِریس!»*
۳۳ آلدانمانگ! یامان یُلداش قاوی آخلاقی هِم آزدیریاندیر.
۳۴ عاقیلینگیزی آیلانگ و گونَه اِتمِگی بِس اِدینگ. سیزینگ آرانگیزدا خودایی تانیمییانلار هِم بار. مِن مونی سیزی اوتاندیرماق اوچین آیدیارین.
دیرِلِن بِدِن
۳۵ یُنه کیمدیر بیری: «اُلولِر نَدیپ دیرِلِر؟ اُلار قایدیپ گِلِنلِرینده بِدِنلِری نَهیلی بُلارقا؟» دییّپ سُراماغی مومکین.
۳۶ نَهیلی نادانلیق سُراق! سِنینگ اِکِن تُخومینگ اُلمِسه، یاشایشا قاووشماز.
۳۷ سِن اِکِنگده سُنگرا گُگِرجِک اُسوملیگی اِکمِیَرسینگ. سِن دینگه تُخوم، میثال اوچین بوغدای یا-دا باشغا بیر اُسوملیگینگ تُخومینی اِکیَرسینگ.
۳۸ اِمّا خودای بُلسا بو تُخوما اُز بِلَّن شِکلینی بِریَر و هِر تُخوم-دا اُز شِکلی یالی بُلیاندیر.
۳۹ بِدِنلِرینگ هِمّه‌سی مِنگزِش دَلدیر. اینسانینگ اُز بِدِنی، حایوانلارینگ اُز بِدِنی، قوشلارینگ اُز بِدِنی، بالیقلارینگ-دا اُز بِدِنی بُلیار.
۴۰ شِیله-ده، آسمانلارا یا یِره دِگیشلی زاتلار-دا باردیر. آسمانلارا دِگیشلی زاتلارینگ اُز بِییکلیگی، یِره دِگیشلی زاتلارینگ-دا اُز بِییکلیگی باردیر.
۴۱ گونونگ اُز بِییکلیگی، آیینگ اُز بِییکلیگی باردیر، ییلدیزلارینگ-دا اُز بِییکلیگی باردیر. بیر ییلدیزینگ بِییکلیگی بِیلِکی ییلدیزینگقیدان تَفاوُتلیدیر.
۴۲ اُلولِرینگ دیرِلیشی-ده شونگا مِنگزِیَندیر. چویرییَن بِدِن-ده جایلانیپ، چویریمِجِک بِدِن-ده دیرِلیَر.
۴۳ پِسلیکده جایلانیپ، بِییکلیکدَه دیرِلیَر. اِجیزلیکده جایلانیپ، گویچ-قوواتدا دیرِلیَر.
۴۴ فانی بِدِنده جایلانیپ، اِبِدی بِدِنده دیرِلیَر. فانی بِدِن بار بُلسا، اِبِدی بِدِن هِم بُلیاندیر.
۴۵ چونکی مُقادِّس یازغیلاردا شِیله یازیلاندیر: «اَوَّلکی اینسان، یَعنی آدام، جانلی یاشایان بُلدی».* آخیرقی آدام، یَعنی عیسی، یاشاییش بِریَن روح بُلدی.
۴۶ اِبِدی بِدِن فانی بِدِندِن اُوونچَک بُلوپ بیلمِیَر. تِرسینه، اَوَّل فانی بِدِن بُلیار، سُنگرا بُلسا اِبِدی بِدِن بُلیار.
۴۷ اَوَّلکی اینسان یِرینگ تُپراغینداندی، ایکینجی اینسان بُلسا آسمانداندی.
۴۸ تُپراقدان یارادیلان اَوَّلکی اینسان نَهیلی بُلسا، یِردَکی اینسانلار هِم شِیلِدیر. آسماندان اینِن اینسان نَهیلی بُلسا، آسمانا دِگیشلی اینسانلار هِم شِیلِدیر.
۴۹ بیز تُپراقدان یارادیلان اینسانا نَهیلی مِنگزَن بُلساق، آسماندان بُلانا هِم شِیله مِنگزَریس.
۵۰ شُنگا گُرَه-ده، اِی عزیزلِر، مِن سیزه آیتجاق زادیم: اِت بیلِن قاندان بُلان یِردَکی اینسان خودایینگ پادیشاهلیغینی میراث آلیپ بیلیَن دَلدیر. چویرییَن بِدِن چویریمِیَن بِدِنه شِریک بُلوپ بیلیَن دَلدیر.
۵۱ قولاق قُیونگ، سیزه بیر سیری آیان اِدِیین: بیز اُلمِریس، یُنه هِمَّه‌میز اویتگِدیلِریس.
۵۲ بو اینگ آخیرقی سورنای چالناندا گُز-آچیپ یومّاسی سالیمدا، بیر دِمده یِرینه یِتِر. سورنای چالنار، اُلولِر چویریمِجِک حالدا دیرِلدیلِر و بیز هِم اویتگِدیلِریس.
۵۳ چونکی چویرییَن بِدِن چویریمِجِک دُنونا، اُلیَن بِدِن اُلمِجِک دُنونا گِیینمِلیدیر.
۵۴ شونلوقدا، چویرییَن بِدِن چویریمِزلیگه، اُلیَن بِدِن اُلمِزلیگه گِیینِنده، «پیروزی اُلومی یوووتدی»* دییلِن سُزلِر بِرجای بُلار.
۵۵ «اِی اُلوم، هانی سِنینگ پیروزینگ؟ اِی اُلوم، هانی سِنینگ زَهِرلی نیشینگ؟»*
۵۶ اُلومینگ زَهِرلی نیشی گونَه‌دیر و گونَه‌نینگ گویچ-قوواتی شِریغاتدیر.
۵۷ یُنه خودایا مونگ-ده بیر شوکور! اُل تانگریمیز عیسی مسیحینگ اوستو بیلِن بیزه اوتماغی بِردی.
۵۸ شُنگا گُرَه-ده، اِی عزیزلِریم، قاییم دورونگ. قُی، سیزی آصلا هیچ زات تیترِتمِسین. خودایینگ ایشینه ایخلاصلی یاپیشینگ. چونکی خودایینگ اوغروندا چِکِن زَحمِتینگیزینگ بیدِرِک دَلدیگینی اُزونگیز-ده بیلیَنسینگیز.