دُولِته موطیع‌لیق
۱۳
۱-۲ هِر بیر اینسان اُز اوستوندِن حُکوم سوریَن دُولِته موطیع بُلسون، سِبَبی خودای طارافیندان بُلمادیق دُولِت یُقدور. حُکوم سوریَن دُولِتلِر خودای طارافیندان بِلِّنِندیر. شُنگا گُرَه، دُولِته قارشی چیقیان هِر کِس آصلیندا خودایا قارشی چیقیپ، جِزا دوچار بُلار.
۳ یاخشی ایش اِدیَنلِر دُولِت یُلباشچیلاریندان قُرقمایارلار. اُلاردان یامان ایش اِدیَنلِر قُرقیاندیرلار. دُولِتدِن قُرقمان یاشاسینگ گِلیَرمی؟ یاخشی ایشلِری اِت، شُندا دُولِت سِنی تعریفلار.
۴ سِبَبی دُولِت یُلباشچیسی سِنینگ یاخشیلیغینگ اوچین خودایینگ خیدماتکَریدیر. یامان ایش اِدیَن بُلسانگ، دُولِت یُلباشچیسیندان قُرق، سِبَبی اُل قیلیجینی یُنه یِره گُتِریَن دَلدیر. اُل خودایینگ خیدماتکَریدیر، یامان ایش اِدیَنی جِزالاندیریپ، خودایینگ غاضابینی اُنونگ اوستوندِن ایندِریَندیر.
۵ شُنگا گُرَه، دینگه جِزا دوچار بُلماق قُرقوسیندان دَل، شِیله بُلسا وِجدانینگیزی پَک ساقلاماق اوچین دُولِته موطیع بُلمالیدیر.
۶ سیز مالییاتلاری هِم شو سِبَبه گُرَه بِریَنسینگیز. سِبَبی دُولِت یُلباشچیلاری اُز وِظیفه‌لِرینی بِرجای اِتمِک بیلِن، خودایا خیدمات اِدیَندیرلِر.
۷ شُنگا گُرَه-ده، هِر کِسه بِریلمِلیسینی: مالییات بُلسا – مالییاتی، گُمرُک بُلسا – گُمرُگی، قُرقی بُلسا – قُرقینی، حُرمات بُلسا – حُرماتی بِرینگ.
بیری-بیرینگیزی سُیونگ
۸ بیری-بیرینگیزه سُیگودِن باشغا بِرگینگیز بُلماسین، سِبَبی باشغا بیرینی سُییَن آدام شِریغاتی بِرجای اِدیَندیر.
۹ چونکی «زینا اِتمه، آدام اُلدورمه، اُغورلیق اِتمه، باشغا بیرینینگ زادینا گُز تیکمه» دییِن و باشغا حُکوملِرینگ باری «هِمسایانگی اُزونگی سُیشونگ یالی سُی» دییِن حُکومده جِملِنِندیر.*
۱۰ هِمسایانی سُییَن آدام اُنگا یامانلیق اِدیَن دَلدیر. شِیدیپ، باشغالاری سُییَن آدام شِریغاتی بِرجای اِدیَندیر.
۱۱ موندان باشغا حَضیرکی زامانانینگ نَهیلیدیگینی بیلیَنسینگیز. اوقودان اُیانمالی ساغادیمیز گِلیپ یِتدی، سِبَبی ایندی نِجات تاپماغیمیز ایمان گِتیرِن واقتیمیزدان خاص قُلایدیر.
۱۲ گیجه گِچیپ، گوندیز قُلایلادی. شُنگا گُرَه قارانگقیلیقینگ ایشلِرینی چیقاریپ، نورینگ یاراغلارینی داقینایلینگ.
۱۳ عایش-عِشرِت، سِرخُشلوق، زیناکَرلیک، آخلاقسیزلیق، باخیلچیلیق و داعوا-جِنجِل اِتمَن، گِلینگ گوندیزدَکیلِر یالی میناسیپ یُلدا اِدِبلی یاشایلینگ.
۱۴ اینسان هُوِسلِرینگیزی نَدیپ راضیلاندیرارقام دییّپ فیکرلِنمِنگ-ده، قایتام، تانگریمیز عیسی مسیحه گِیینینگ.