ابراهیمینگ ایمانی
۴
اُنسُنگ، بِدِنه گُرَه حاساپلانیان جِدّیمیز ابراهیم باباتدا نَمه آیدیپ بیلِریس؟
۲ اِگِر ابراهیم خودایینگ ناظاریندا یاخشی ایشلِرینینگ اوستو بیلِن آقلانان بُلسا، اُندا، دُغرودان-دا، قووانیپ بیلِردی، اِمّا خودایینگ اُوونده دَل.
۳ چونکی مُقادِّس یازغیلاردا: «ابراهیم خودایا ایمان گِتیردی و خودای اُنی تاقوالی حاساپلادی» دییّپ یازیلاندیر.*
۴ ایشلِیَن آدام اُز چِکِن زَحمِتی اوچین حاق آلیاندیر، بو سُوغات دَلدیر.
۵ اِمّا خودایسیزلاری آقلایان خودایا ایمان گِتیریَن آدام هیچ ایش اِتمِسه-ده، ایمان گِتیریَندیگی اوچین خودایینگ حوضوریندا آقلانیاندیر.
۶ اینه، یاخشی ایشلِری اِتمِسه-ده، خودای طارافیندان آقلانان آدامی داوود هِم خوشواقت حاساپلاپ، شِیله دییَّر:
۷ «خاطالاری باغیشلانان و گونَه‌لِری اُرتولِن آداملار
نَهیلی خوشواقت!
۸ خودای طارافیندان گونَه‌لی حاسابا آلینمایان آدام
نَهیلی خوشواقت!»*
۹ اُندا بو خوشواقتلیق دینگه سونِّتلیلِره دِگیشلیمیدیر؟ یا-دا سونِّتسیزلِره هِم دِگیشلیمیکَه؟ اُزال آیدیشیمیز یالی، خودای ابراهیمینگ ایمانی اوچین اُنی تاقوالی حاساپلادی.
۱۰ اِگِر شِیله بُلسا، خودای هاچان تاقوالی حاساپلادی؟ سونِّتلِنمَکَمی یا-دا سونِّتلِنِندِن سُنگ؟ یُق، سُنگ دَل-ده، اُنگ تاقوالی حاساپلادی!
۱۱ ابراهیم سونِّتلِنمَکَه ایمان گِتیردی، سونِّتی بُلسا ایمانینگ اوستو بیلِن آلان آقلانماسینینگ مُهوری حُکمونده قابول اِتدی. شِیدیپ، ابراهیم سونِّتسیزلیکده ایمان گِتیریپ، تاقوالی حاساپلانان هِر بیر آدامینگ آتاسی بُلدی.
۱۲ شِیله-ده، آتامیز ابراهیم سونِّتلیلِرینگ هِم آتاسیدیر. یُنه شِیله سونِّتلیلِرینگ ایمانی ابراهیمینگ سونِّتلِنمِدِن اُزال ایمان گِتیریشی یالی بُلمالیدیر.
۱۳ خودای ابراهیما و اُنونگ نِسلینه دونیَه‌نی میراث بِرمِگی واعدا بِردی. بو واعدا ابراهیما شِریغاتی بِرجای اِدِندیگی اوچین دَل-ده، ایمان گِتیریپ، خودایینگ ناظاریندا تاقوالی حاساپلاناندیغی اوچین بِریلدی.
۱۴ چونکی شِریغاتی بِرجای اِدیَنلِر دونیَه‌نی میراث آلجاق بُلسالار، اُندا ایمان بیدِرِک و واعدا باطیل بُلاردی.
۱۵ سِبَبی بو شِریغاتینگ پُزولماغی خودایی غاضابلاندیریار. اِمّا شِریغاتینگ بُلمادیق یِرینده شِریغاتی پُزماقلیق-دا یُقدور.
۱۶-۱۷ شُنگا گُرَه-ده، بِرلِن واعدانی ایمانینگ اوستو بیلِن آلیپ بُلیاندیر. واعدا مِرحِمِتلی سُوغات بُلوپ، ابراهیمینگ هِمّه نِسلینه – دینگه شِریغاتا اِیه بُلانلارا دَل، شِیله بُلسا ابراهیم یالی ایمان گِتیریَنلِرینگ بارینا دِگیشلیدیر. مُقادِّس یازغیدا خودایینگ ابراهیما: «سِنی کَن میلِّتلِرینگ آتاسی اِتدیم»* دییشی یالی، ابراهیم خودایینگ ناظاریندا هِمَّه‌میزینگ آتامیزدیر. سِبَبی اُل اُلولِری دیرِلدیَن و یُق زاتلاری بارلیغا چاغیریان خودایا ایمان گِتیردی.
۱۸ خودای ابراهیما «سِنینگ سانسیز نِسلینگ بُلار» دییّپ آیدیپدی.* شُنونگ اوچین-ده، ابراهیم کَن میلِّتلِرینگ آتاسی بُلماغا هیچ اومیدینینگ قالماندیغینا باقمازدان، ایمانی سِبَپلی اومیددان دوشمِدی.
۱۹ اُل یاشینینگ یوزه قُلایلاپ، بیلینده قوواتینینگ قالماندیغینا و سارانینگ دُغُروپ بیلمِیَندیگینه باقمازدان، ایمانیندا قاوشامادی.
۲۰ خودایینگ بِرِن واعداسی یِرینه یِتجِکدیگینَه ایمانسیزلیق بیلِن شِک اِتمِدی. تِرسینه، ایماندا قاییم دوروپ، خودایی بِییکلِندیردی.
۲۱ اُل خودایینگ اُز بِرِن واعداسیندا وِفالیدیغینا قاتی ایناندی.
۲۲ اینه، شِیله ایمانی اوچین خودای «اُنی تاقوالی حاساپلادی.»
۲۳ بو سُزلِر «تاقوالی حاساپلادی» یِکه ابراهیما دِگیشلی دَلدیر.
۲۴ بو بیزه، یَعنی تانگریمیز عیسی مسیحی اُلومدِن دیرِلدِن خودایا ایمان گِتیریپ، تاقوالی حاساپلانیانلارا هِم دِگیشلیدیر.
۲۵ عیسی مسیح بیزینگ گونَه‌لِریمیز اوچین اُلومه تابشیریلیپ، خودایینگ ناظاریندا آقلانیلماغیمیز اوچین دیرِلدیلدی.