یِدی یاخشی آدلی
۶
شُل گونلِرده شَگیرتلِرینگ سانی باردیغچا آرتیاردی. اِمّا یونانیچا کِپلِیَن ایماندارلار عِبرانیچا کِپلِیَن ایماندارلارینگ هِر گونکی اییمیت پایلاشیغیندا اُزلِرینینگ دول آیال‍لارینی یاددان چیقاریاندیقلاری اوچین اُلارینگ اوستوندِن شیکایات اِتدیلِر.
۲ شِیلِلیکده، اُن ایکی رِسول هِمّه شَگیرتلِری یانلارینا ییغناپ، اُلارا شِیله دییدیلِر: «خودایینگ خوش خابارینی واغیظ اِتمِگی قُیوپ، بیزینگ ساچاق باشیندا خیدمات اِتمِگیمیز دُغری دَل.
۳ اِی عزیزلِر، اُز آرانگیزدان یِدی آدامی سایلانگ. اُلار مُقادِّس روحدان و حِکمِتدِن دُلی، آدلی-آبرایلی آداملار بُلسونلار. بو خیدماتی شُلارا تابشیرالینگ.
۴ بیز بُلسا اُزومیزی دُغا اِتمَگه و خوداینگ سُزونی واغیظ اِتمَگه باغیشلالینگ.»
۵ بو فیکر هِمّه‌سینینگ گُونوندِن توردی. سُنگرا اُلار ایمانی گویچلی و مُقادِّس روحدان دُلی بُلان اِستیفانی سایلادیلار. شِیله-ده فیلیپُسی، پروخُروسی، نیکانوری، تیمونی، پارمیناسی و انطاکیه‌لی نیکولاسی سایلادیلار. نیکولاس اُنگ یَهودی دینینی قابول اِدِندی، ایندی عیسی ایناندی.
۶ اُنسُنگ بو آداملاری رِسول‍لارینگ حوضورینا گِتیردیلِر. رِسول‍لار هِم اِل‍لِرینی اُلارینگ باشینا قُیوپ، اُلار اوچین خودایا دُغا اِتدیلِر.
۷ شِیلِلیکده، خودایینگ خوش خاباری خاص-دا یایراپ و اورشلیمده شَگیرتلِرینگ سانی باردیقچا کَنِلیَردی و کَن کاهینلار-دا ایمان گِتیردیلِر.
اِستیفان توتولیار
۸ خودایینگ مِرحِمِتیندِن و قودراتیندان دُلی بُلان اِستیفان خالق آراسیندا عجاییپ مُعجِزه‌لِر و عالاماتلار گُرکِزیَردی.
۹ اِمّا آزادلار دییّپ آدلاندیریلیان کِنیسه‌نینگ کَبیر آداملاری قارشی چیقیپ، اُنونگ بیلِن جِدِلِّشمَگه باشلادیلار. اُلار قیرِوانلیلار، اسکندریه‌لیلِر، شِیله هِم کیلیکیه و آسیا وِلایاتلاریندان گِلِنلِردی.
۱۰ مُقادِّس روح اِستیفانا کَن حِکمِت بِردی، شُنونگ اوچین اُلار اِستیفانینگ آیدانلارینا قارشی دوروپ بیلمِدیلِر.
۱۱ شُندا کِنیسه‌نینگ آداملاری بیرنَچه آدامی اُغرینچا ایناندیریپ، اُلارا: «بو آدامینگ موسی و خودایا قارشی کُفر آیدیاندیغینی اِشیتدیک دییّپ آیدینگ» دییدیلِر.
۱۲ شِیدیپ، اُلار خالقی، یاشولیلاری و دین عُلَمالاری کوشگوردیلِر. اِستیفانی توتوپ، مِجلِسه آلیپ گِلدیلِر.
۱۳ اُلار یالان شاهاتلاری گِتیردیلِر. یالان شاهاتلار: «بو آدام ایزینی اوزمَن بو مُقادِّس عیباداتخانا و مُقادِّس شِریغاتا قارشی کِپلِیَر.
۱۴ اُنونگ آیدیشینا گُرَه، ناصِره‌لی عیسی بو مُقادِّس عیباداتخانانی یُق اِتجِکمیش، موسانینگ بیزه بِرِن سونِّتلِرینی هِم اویتگِتجِکمیش» دییدیلِر.
۱۵ مِجلِسده اُتورانلار اِستیفانا ناظار تیکیپ سِراِتدیلِر و اُنونگ یوزونینگ اِدیل پِریشدَه‌نینگ یوزونه مِنگزِیَندیگینی گُردولِر.