Xiryaan saboq kedmaay
6
Wa itta waghit lahay qilibba darasa twaasaka wa la Yahud la Yunaaniyat tithaagaw minna Qibriyiin dtarqaw jalla amabbilom xazot minna maqunat la yomiyat lithayaba yaqalaya.
2 Ka la luúkaam la qasir kilót jamaaqatta darasa tlaakaw wa belawom,
“Xina zaqat Rabbi igil nixdag wa maqunaat igil nikaafil waajib iiko.
3 Ka xawna,
min migibkum saboq inaas simqat ghidiit la bom wa ib Rox Ghiddus wa xikmat miláam xiraw ibbilli waajib igil nattaghnitsom.
4 Xina laata waghitna it daqa wa kidmat zaqat Rabbi naxaaliffu.”
5 Ka la jamaaqat killa illi raáy atxayasat.
Ka Istifaanus inaas ib emaan wa Rox Ghiddus milú wa Filibbos wa Burxuras wa Niikaanur wa Tiimun wa Barmiinaas wa Niigulaawas la Andtaaki la mathawid xaraw.
6 Wa asikka luúkaam aghaddamawom igil liddaqaw ilom wa ideyom igil likraw ittom.
7 Ka zaqat Rabbi diib intishaar zaayadat wa diib Orshaliim qilibba darasa twaasaka.
Wa bizxaam minna kahanala Yahud la emaan ib killa albaabom ghablaw.
Matstsabaadt Istifaanus
8 Istifaanus baqal niqimat wa xiilat qala wa migibba shaqab qajaayib wa muqjizaat riít wadde qala.
9 Wa gale minna anfaarra Maqbad la ib Agbir la Qitughaam litámmaro la naayya Yahud la min Al Ghayrawaan wa la Askandariya qaaradawu.
Wa biqidaam min aghaaliim Kiliikiya wa Aasya saanudom qalaw wa igil litkaxodu astabdaw.
10 Laakiin xikmatu wa la Rox la ibbu lithaage qala igil lighaawmo iighadraw.
11 Ka igil gale anfaar rashwat dafqaw igil laxassu ittu wa igil libalo,
“Istifaanus Musa wa Rabbi inde sabbib samqanaahu.”
12 Ka ibbilla tihmat la shaqab wa sabba gats wa qilamala shariiqat it Istifaanos fatnaw ka tsabdtawu wa asikka Majlis amtsáwu.
13 Wa shahaadat zur ashhadaw ittu wa belaw,
“Illi nafar,
matárraad itta haykal la ghiddus wa itta shariiqat iilaátkaarim.
14 Xina Yasoq la Naasiri illi haykal igil laxanfis tu wa la afittaxat la min Musa tkabbatnaaha igil lighayir tu inlibil samqanaahu,”
belaw.
15 Wa killom la itta Majlis xaadram qalaw gatstsu fazzaw wa kimsal gats maláak traáyom.