Qadaalat
23
“Akbaar xisey iitinghal wa gor sab shar it shahaadat zur iititqaawan.
2 Asik ikkiit maxaabir iitittaale.
Wa dolat shahaadat it kilaaf titdtallab minka,
ibba maxaabir iitijle qadaalat igil titwe
3 wa ajil sadayit xaagil it shakaahu,
shahaadatka iitinawne.
4 Wa biqiraay abaayka aw adgu qaarib inintu min rakkibbu,
bilassu ittu.
5 Wa adig gherxaayka darabu ighum ittu inintu min saadfakka,
iitxilaafu.
Bidaalu bidtar wa sidayu.
6 Min ansafot maskiin it shakaahu,
tim iitibal.
7 Min xikim it daqaawi xassat riim wa it baríi wa baqal amaan ib mot iitxikam jalla ana sarraadt yiíbarí.
8 Rashwat iitiblaq jalliib rashwat qintaat ghaadyotaat taqaawir wa ghol sab amaan taátxase.
9 Gaana iitidaayigh.
Intim gaana mi kim lissammaqu taámro jalla it arid Masir gunuyaam qalkum.
Shariiqat sabit
10 Igil sis sanat garhatka xiras wa bitak.
11 Wa itta sanat la saabqayit,
attakrimma diburaam shaqabye igil libloqo minna wa minnom la tarrif aawaatta kadan tballuqu.
Wa la ma qinabka wa la zetunka kimsalehu widayu.
12 Wa sis amqil shaghghe wa itta saabqayit taqabadtdtil wa illa igilla biqiraayka wa la adigka firsat qirif tgabbí.
Wa bardu igilla agbirka wa la gaana la halla goka mahalat rakbo.
13 Xisaabkum widaw wa la ibelakkum tu killu it maqaal awqulu.
Wa asmaay aalihat biqidat iitirfaqo wa iitinghamo ibba ma.”
La qaayaad la salas
14 “It sanat,
salas dol qayido igilye.
15 Qiid Fadtiir qayido wa saboq miqil fadtiir bilqo it waghtu it warex Abiib kimma ammarkokum ta sabab ittu min Masir fagarkum.
Ghadameye imbal sadaghat,
nafar iilaábhiz.
16 Wa bardu ib Qiid Batiik axtafilo ib ghaddamot salfayit itteykum la itta garhat xaraskumu.
Wa it makallasila sanat ib Qiid Akkabot axtafilo waan itteykum taákibo.
17 Salas dol it sanat la sab killom ghadam Molaay Rabbi badtro.
18 Wa dam karaamachche iitikqe asikka kamiir halla.
Wa shibex karaamat qiijje,
asik fajrata iilitmaye.
19 Min salfayit ardatka la xesat asik bet Rabbi Molaayka amtsaá.
Wa nawiid diib xaliib immu iitábshil.”
Addaalayot gabey
20 “Wa aze ana illi ana ghadameka maláakye ilík halleko igil liqighabakka it killa la tkayidda wa asikka arid la ilu addaaleko ikka igil limraxakka.
21 Ka baal kire ilu wa dtiqu wa iitqisayu sabab mamasilye gabá wa hitu zinubkum iilaqaghaffir.
22 Laakiin ib maddaggaag min dtayqu wa ib killa taqaaliimye min titmarrax,
abbachka abbe wa matgaadbatka itgaadab
23 jallaab maláakye ghadameka igil laherir gabá wa asikka baladda Amuriyiin wa la Xissiyiin wa la Firiziyiin wa la Kanqaaniyiin wa la Xiwiyiin wa la Yabusiyiin igil laámtsaákka tu igil tiskanna.
Wa ib milóm igil asrittom tu.
24 Wa igil aalihatom igil tisjad aw igil tiqibadda alabka wa la wadaddiitom la sharraariit iititxaagag.
Bidaalu afiniyom wa la asnaamom haddim.
25 Iyye,
Rabbi Molaaykum ledta igil tiqibado halla ikkum.
Illa min waddu,
billaqka wa siitoka ibaarik wa qaadaar atxaaglakkum.
26 It baladka qaghalloqot wa mikkinna igil lahalle iiko wa qimirka igil ariim tu it mitaq.
27 Xanicce ghadameka igil indá tu wa kil la ghadameka badtdtir niyatu igil xaacir tu wa killom abbachka dinaabatom kim laárúka igil idayom tu.
28 Ghadameka xanajjir igil indá tu la Xiwiyiin wa la Kanqaaniyiin wa la Xissiyiin min gatska igil iwarke.
29 Laakiin it xatte sanat igil idtraddom iiko la ardat dibnat igil iitigbá wa la aawaat igil iititbaazax wa ajal igil iitigbá itkum.
30 Ib xud xud igil iddaagannom tu asik intim tbazzaxo wa la ardat tmalko.
31 Wa xidudka min Baxar Ghayaxa asik Baxar Migbayit wa min dangarat asik Nahar Furaat igil idayu tu.
Wa la shaqab la itta balad saakin igil isalmakka tu wa gatska igil taáttarxiyom.
32 Mislom wa taru misil aalihatom ittifaaghiyat iitide.
33 Wa it baladka iitattaáskinnom ichche igil iilaáttaznibuka.
Aalihatom min taqabbid,
diib sharak shirik titkarre.”