Rwîmbo rwa gûkumia Nyomba ya Mwathani
Rwîmbo rwa antû beetîîtie Njerusaremu kûgonga.
132
1 Îî, Mwathani ririkana Ndaundi,na mathîîna monthe mara aûmîîrîîtie.
2 Aathiîtîîrie Mwathani,
na aiga mûthiîtio kîrî Mwene Inya wa Njakubu, auga,
3 “Ntithûngîrîkia nyomba yakwa,
kana ntwa ûrîrî bwakwa.
4 Ntimaama,
kana ng'onta,
5 mwanka rîra nkoonera Mwathani bantû a gûkara,
gîkaro kîa Mwene Inya wa Njakubu.”
6 Itwegiirue mantû maarîo Eburatha,a
na twarîîthîra bieniini bia Njaari.
7 Twauga, “Tûthiini Nyomba ya Mwathani,
na tûmûgonge tûrî mbere ya gîtî gîake,
8 ûkîîra, woû Mwathani, na ûûye bantû aaku a kûnogoka,
woû na îthandûkû rîa kîrîîkanîro rîa inya yaku.
9 Athînjîri baaku baroûyûrwa i wagîru,
atheru baaku baroina i gîkeno.”
10 N'ûntû bwa mûruti ngûgî waku Ndaundi,
na ûtigaatiganîrie mwîtûûrîrua maguta waku.
11 Mwathani n'athiîtîîrie Ndaundi,
mûthiîtio wa mma atakîgarûra.
“Ûmwe wa nciarwa ciaku ciongwa,
nkamwaiga gîtîîni gîaku kîa ûnene.”
12 Aana baaku bakaaya kûmenyeera kîrîîkanîro gîakwa,
na maathana maakwa mara nkûbarutana,
kinya aana baao,
bagaakarîra gîtî gîku gîaku kîa ûnene.
13 N'ûntû Mwathani nathuurîte Sayuuni,
na n'akwenda kûmîtuîkithia gîkaro gîake.
14 “Gîkî i kînogoko gîakwa tene na tene,
ngaatûûraga aaga n'ûntû i bu nkwenda.
15 Nkaathaarima Sayuuni mûno na mweyage bionthe bira endaga,
nkîa ira irî ku ngacia biakûrîa ibae.
16 Nkaûyûria athînjîrî wonokio,
na atheru bagaatûûra bainaga i gîkeno.
17 Ngaatuîkithia Ndaundi mûnene ûrî inya,
nkaarûngîkîra mwîtûûrîrua maguta wakwa taa.
18 Ngeekîrithia anthû baake îgi,
îndî we kîraûni gîgaakengaga kîrî kîongo rîonthe.”