3
Tu̱gu̱ kaal cik abunna
1 Ti̱lo̱ ol wak a̱tu̱we̱ abunna ming aziye zoz ci gaalau ki ddi̱ki̱ryyo̱k wagge̱k. Abunna ming aziye zoz, kar ku̱tu̱gu̱zzo̱ kaal cik abunna odohize. 2 Gerza ming ozoz e̱e̱ti̱ gerzet, abunna ming alit dango. Abarik, abunna ming e̱e̱ggi̱nnu̱ ol cik gununnik, abunna ming i̱rke̱nnu̱ olle do̱o̱k.
3 Ke̱e̱ggi̱n ba̱li̱ye̱ naga bu̱k tarbale ki i̱yo̱ko̱ ol ne̱k iróng a̱tu̱ zoz ci Ye̱su̱ ko̱. Ol u̱gge̱ cik a̱ti̱kke̱t tu̱, kar kizeta du̱cca̱k cik kireza kaal cik orong e̱le̱tti̱ lo̱rye̱nta̱k. Anyak baizi cinna ṯeel ki meder. Kamartoyya ol, ovvo bo̱do̱k ol amarinetta.
4 Ma̱i̱je̱ zin Ta̱mu̱ta̱dde̱n wa een Ti̱ri̱zo̱i̱t cinna
abunna enne kar gunun.
5 I̱ti̱ri̱zze̱t enne agita,
zo̱ze̱ ci bunnat cinne
iróng een
kaale cik abunna
ku̱tu̱gu̱zzo̱ naga.
Utunya Ta̱mu̱ta̱dde̱n mu̱nye̱n cigga̱c komize
ci Vongiz ci A̱li̱le̱.
Aanyet enne agit kurubta ti̱ra̱ne̱t ci een jor
ki baiz ci ngen akane jor.
6 I̱tto̱na̱i̱t Ta̱mu̱ta̱dde̱n Ye̱su̱ Ki̱ri̱sto̱
Ti̱ri̱zo̱i̱t cinna
kar kaanyet Vongiz cinne.
7 I̱ti̱ri̱zze̱t Ye̱su̱ agit ju̱rru̱m
detene cinne kommog kaal do̱o̱k.
Aanyet gool ci elemanet Ta̱mu̱ta̱dde̱n
kar zoz ci kamuda naga atin
baize ci aave udut.
8 Een zoz ci ka̱du̱wa̱kku̱ng ko̱ de̱de̱. Korongi abunna ming odolnannu zo̱zzo̱we̱ ne̱ko̱ oroot, kar zin ol wak a̱tu̱ Ta̱mu̱ta̱dde̱n ku̱zu̱tte̱ zoz neci, kar ku̱tu̱gu̱zzo̱ kaal cik abunna odohize. Abunna kaala ne̱ko̱ do̱o̱k eela ol do̱o̱k.
9 Abarik, ara ele ngati adangone ol zoz ci obod ki ji̱ji̱ti̱gga̱c. A̱vvu̱ reena olle cik adango zo̱ze̱ ci lo̱ti̱nno̱k cik Yo̱u̱do̱. Een dangonet ci ogon niko ko̱ darace, iróng karuba gi̱i̱ ci abunna to. 10 Ming aave e̱e̱ti̱ ci ogon kaal cik anyaha ngeronet orgene cunno̱ng, ti̱lo̱ nonno lak co̱de̱ icima lak rama bu̱k. Imma ming emena iróng orong kizik, ma ngen edeconik nonno. 11 Abunna ming ka̱gga̱ ol cik ogon niko, utungtek zoz ci een de̱de̱ lo̱o̱c. Ogon nege mu̱nye̱n bak aburnnek e̱le̱tti̱ cigge̱k nong.
Zo̱zzo̱k wak edecak Pa̱u̱lo̱ vu̱rrta̱
12 Korongi ki̱tto̱na̱ki̱ Artemas icima Ticikos rok i̱nne̱ta̱, ming u̱zu̱ca̱i̱n, i̱jja̱ ataman, kar mudaka orog wa een Nikopolis, eci korongi ka̱vvu̱ nginati kedeca tagiz. 13 Eela e̱e̱t ci een zara Zenac wagon a̱li̱ngli̱ng lo̱ki̱ka̱ ko̱, ki Apolo, ti̱ri̱z nogo kaale cik erone. 14 Anyik ol cigga̱c ke̱de̱me̱zzi̱t zoz ci li̱ngli̱ngo̱no̱, abunna ming edemezzek e̱le̱tti̱ zoz ci eelanne nege ol cik apirna.
15 Izayi ol cik kaavtiya ngatu ko̱ do̱o̱k i̱nne̱ta̱. Iza ol wak a̱tu̱we̱ irezet agit ko̱ bu̱k. Anyik deten ci Ta̱mu̱ta̱dde̱no̱ ka̱vvu̱ ngatinno̱ng do̱o̱k.